كەشە اتالمىش كىتاپحانادا وتكەن قىرعىزستان رەسپۋبليكاسى ۇلتتىق كىتاپحاناسىنىڭ ديرەكتورى جىلدىز باكاشەۆامەن كەزدەسۋ وسى اكتسيانىڭ شەڭبەرىندە ۇيىمداستىرىلدى.
كەزدەسۋ بارىسىندا جىلدىز كەمەلقىزى مادەني ىنتىماقتاستىقتى دامىتۋعا قاتىستى تاجىريبەسىمەن ءبولىستى. قىرعىزستانداعى كىتاپحانالاردىڭ, كىتاپحانا قىزمەتكەرلەرىنىڭ جاعدايىنان حاباردار ەتتى. ءوزى باسقاراتىن ۇلتتىق كىتاپحانانىڭ بۇگىندە تەك وقىرمان تارتۋ جۇمىسىمەن شەكتەلمەي, حالىقارالىق جانە مەملەكەتتىك شارالاردىڭ ۇيىتقىسى بولىپ وتىرعانىن باياندادى. ول سونداي-اق, م.اۋەزوۆتىڭ 120 جىلدىق مەرەيتويىن قىرعىزستاننىڭ ۇلتتىق كىتاپحاناسى دا كۇز مەزگىلىندە ءوز دەڭگەيىندە اتاپ وتۋگە پەيىلدى ەكەنىن جەتكىزدى.
جىلدىز حانىم ەڭ العاش «ماناستى» ورىس تىلىنە اۋدارىپ, قىرعىز ادەبيەتىنە مول ەڭبەك سىڭىرگەن ەتنوگراف-عالىم شوقان ءۋاليحانوۆ, «ماناس» حاقىندا زەرتتەۋ جازعان قازاقتىڭ ۇلى جازۋشىسى مۇحتار اۋەزوۆ تۋرالى, جامبىل مەن توقتاعۇلدىڭ دوستىعىن, اكادەميك زەينوللا قابدولوۆتىڭ ونەگەسىن اڭگىمەلەدى. ۇلتتىق كىتاپحانادا ولاردىڭ ەڭبەكتەرى تۇرعانىن جەتكىزدى. كىتاپحانا ديرەكتورى ۇلتتىق اكادەميالىق كىتاپحاناداعى «قىرعىزستان ادەبيەت ورتالىعىنىڭ» قورىن تولىقتىرۋ ماقساتىندا قىرعىزدىڭ اتاقتى جىرشىسى ساياقباي قارالاەۆ جىرلاعان «ماناستىڭ» تولىق, ەنتسيكلوپەديالىق نۇسقاداعى كىتابىن, «ماناس» داستانىنىڭ ديسكىسىن, «ايتماتوۆ قالامى», «كىرگىز اكىلماندىعى», تاعى باسقا قىرعىزدار ءۇشىن وتە ماڭىزدى دەگەن بىرنەشە كىتاپتى سىيعا تارتتى.
كەزدەسۋدى جۇرگىزگەن ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆا ەكى ەلدىڭ اراسىنداعى مادەني بايلانىستاردىڭ ورىستەي بەرەتىنىن ايتا كەلە, كەلەر جىلى قىرعىزدىڭ اتاقتى جازۋشىسى شىڭعىس ايتماتوۆتىڭ 90 جىلدىق مەرەيتويى كەلە جاتقانىن ەسكە سالىپ, جازۋشىنىڭ مەرەيتويىن تويلاۋدا قازاق باۋىرلاردىڭ دا شەت قالمايتىنىن اتاپ ءوتتى.
ءىس-شاراعا قازاقستانداعى قىرعىزستان رەسپۋبليكاسى ەلشىلىگىنىڭ ءبىرىنشى حاتشىسى چولپوناي ادجيماتوۆا, اقىن, دراماتۋرگ, جىرشى-جىراۋ بايانعالي ءالىمجانوۆ, قىرعىزستاننىڭ شۆەتسياداعى قۇرمەتتى كونسۋلى نۇرلان مامىروۆ قاتىستى.
ايگۇل سەيىلوۆا,
«ەگەمەن قازاقستان»
