جيىنعا ۇلتتىق ەكونوميكا, ينۆەستيتسيالار جانە دامۋ, ەنەرگەتيكا, سىرتقى ىستەر مينيسترلىكتەرىنىڭ, «KAZAKH INVEST» ۇك», «دامۋ» كاسىپكەرلىكتى دامىتۋ قورى» اق, «قازاقستان مەملەكەتتىك-جەكە ارىپتەستىك ورتالىعى» اق, «استانا» حالىقارالىق قارجى ورتالىعى اكىمشىلىگى» اق وكىلدەرىنەن تۇراتىن قازاقستاندىق دەلەگاتسيا قاتىستى. ەلىمىزدىڭ دەلەگاتسياسىن ۇلتتىق ەكونوميكا ءمينيسترىنىڭ ءبىرىنشى ورىنباسارى رۋسلان دالەنوۆ باستاپ باردى.
جيىندا ساۋدا, كولىك, تۋريزم, اقپاراتتىق-كوممۋنيكاتسيالىق تەحنولوگيالار جانە يننوۆاتسيالار, ينۆەستيتسيالار, شاعىن جانە ورتا بيزنەستى دامىتۋ, اۋىل شارۋاشىلىعى, يسلامدىق قارجىلاندىرۋ سالالارىنا قاتىستى وزەكتى ماسەلەلەر تالقىلاندى.
وتىرىس بارىسىندا ءسوز سويلەگەن ر.دالەنوۆ شاعىن جانە ورتا كاسىپكەرلىك, ساۋدا, تۋريزم سالالارىنداعى مالايزيالىق تاجىريبە قازاقستان ءۇشىن مەيلىنشە قىزىعۋشىلىق تۋدىراتىنىن جەتكىزدى. سونداي-اق, ول قازاقستاننىڭ «حالال-وندىرۋشىلەر» جاھاندىق تىزبەگىنە قوسىلۋ پەرسپەكتيۆاسى تۋرالى اڭگىمەلەي كەلىپ, مالايزيانىڭ الەمدەگى ءىرى حالال-يندۋستريا حابتارىنىڭ ءبىرى رەتىندەگى اۋقىمدى تاجىريبەسىن اتاپ ءوتتى. سونىمەن بىرگە, قازاقستاندا تۋريستىك قىزمەتتى مەملەكەتتىك قولداۋدىڭ اناعۇرلىم ءتيىمدى شارالارى ەنگىزىلگەنى, ول قازاقستانداعى باسىم سالالاردىڭ ءبىرى رەتىندە بەلگىلەنىپ وتىرعانى ءسوز بولدى.
وتىرىس شەڭبەرىندە بىرنەشە باعىتتاعى ىنتىماقتاستىق بويىنشا جۇمىس توبىن قۇرۋ تۋرالى ۋاعدالاستىققا قول جەتكىزىلدى. بۇدان بولەك, ەكىجاقتى ىنتىماقتاستىقتىڭ باسىم باعىتتارى بەلگىلەنگەن حاتتاماعا قول قويىلدى.
سونىمەن قاتار, ساپار اياسىندا «قازاقستان رەسپۋبليكاسىنىڭ بيزنەستەگى جاڭا مۇمكىندىكتەرى» تاقىرىبىندا بيزنەس-فورۋم ۇيىمداستىرىلىپ, وعان ەكى ەلدىڭ مەملەكەتتىك ورگاندارى مەن ىسكەر توپ وكىلدەرى قاتىستى.
ايتا كەتەيىك, 2016 جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 82,9 ملن اقش دوللارى بولىپتى. سوڭعى 11 جىل ىشىندە (2005 − 2016 ج.ج.) مالايزيادان قازاقستانعا تارتىلعان تىكەلەي ينۆەستيتسيالاردىڭ جالپى كولەمى 28,2 ملن اقش دوللارىن, ال مالايزيا ەكونوميكاسىنا قازاقستان تاراپىنان قۇيىلعان ينۆەستيتسيالار 3,0 ملن اقش دوللارىن قۇراعان.
