رايىمبەك اۋدانىنىڭ كەگەن اۋىلدىق ايماعىندا تابيعات توسىن مىنەز تانىتتى. قىستىگۇنى كەتكەن ەسەسىن ەندى قايتارعىسى كەلگەن بولسا كەرەك, كۇنى كەشە, ياعني, ماۋسىم ايىنىڭ 6-سىنان 7-سىنە قاراعان ءتۇنى قار جاۋا باستادى. و باستا توسىرقاعانداي بولعانمەن, ازدان كەيىن-اق بوي ۇيرەتە باستاعان تۇرعىندار جازدىڭ قارىنا تاڭىرقاپ ەمەس, قىزىقتاپ قانا قارايدى. ءبىردى-ەكىلى تۇرعىندارمەن تەلەفون ارقىلى تىلدەسكەنىمىزدە جاز بويى تاۋدىڭ باسىندا جاتاتىن قاردىڭ ارا-تۇرا ەتەككە ءتۇسىپ, «قوناق» بولىپ كەتەتىنى زاڭدى نارسە سياقتى اسەر ەتكەنىن اڭدادىق. وسىدان ءبىر اپتا بۇرىن باستالعان جاۋىن-شاشىن تاۋلى ايماقتاعى كۇن رايىن الدەقايدا سۋىتىپ جىبەرگەن. ءبىر جەتى جاۋعان جاڭبىردىڭ سوڭى قارعا اينالۋى زاڭدى دا, ويتكەنى, ەتەكتەگى اۋىلعا جاڭبىر جاۋسا, ەرتەڭىنە ىرگەدەگى تاۋدىڭ باسىنىڭ اعارىپ شىعا كەلگەنىنە تۇرعىندار ابدەن ۇيرەنگەن.
وبلىستىق «قازگيدرومەت» ورتالىعى ماماندارىنىڭ ايتۋىنشا, تاۋلى ايماقتارعا جاز مەزگىلىندە تۇسەتىن قاردى الدىن الا بولجاۋ قيىن. سەبەبى, اتموسفەرالىق فرونتتار مەن تسيكلوندار سۋىق جەل ارقىلى وتەدى. جازدىگۇنى جاۋىن-شاشىننىڭ قار تۇرىندە ءتۇسۋى, كوپ جاعدايدا, سولتۇستىك جەل اعىسىنىڭ اسەرىنەن بولادى. ەگەر جەردەگى جىلۋ 15 گرادۋس بولسا, بۇلت قاباتىنداعى تەمپەراتۋرا نولدەن تومەن كورسەتكىشكە تۇسەدى دە, جاۋىن-شاشىن قارعا اينالادى دەيدى.
«مالدى اۋىلدار, جايلاۋعا ەندى قونعان مالشىلار قانداي كۇيدە؟» دەگەن ساۋالىمىزعا: «ەتەكتەگى كەگەندە مىناداي جاعداي بولىپ جاتقاندا, تاۋ قويناۋىنا سۇعىنا كىرگەن جايلاۋلاردا ءسوز جوق قار بارى انىق, بالكىم, بۇدان دا قالىڭ بولۋى. بۇل ءوز كەزەگىندە جاڭا تۋعان تولگە قيىندىق تۋعىزاتىنى انىق. دەگەنمەن, مال شىعىنى بار دەگەن اقپارات تۇسكەن جوق. ونىڭ ۇستىنە, قاردىڭ قالىڭدىعى 1-2 سانتيمەتردەن اسپاعان», دەيدى وبلىستىق توتەنشە جاعدايلار دەپارتامەنتىنىڭ وكىلى ازامات جۇرتباەۆ.
جەرگىلىكتى جۇرت ۇيرەنىپ قالعان تابيعاتتىڭ مۇنداي مىنەزىن «باسىنا لاباسىنىڭ بۇلت ىلىكسە, بار ايماق كۇرك-كۇرك جوتەلەدى», دەيتىن مۇقاعاليدىڭ سوزىمەن دە تۇسىندىرۋگە بولادى...
الماس ءنۇسىپ,
«ەگەمەن قازاقستان»
الماتى وبلىسى
