ءباسپاسوز ءماسليحاتى باستالا سالا جۋرناليستەر دجەكي چاننان ديماش قۇدايبەرگەنمەن كەزدەسۋ تۋرالى سۇراپ, دجەكيدىڭ ديماش تۋرالى ويىن ءبىلدى. «كەزدەيسوق تەلەديدارىمدى قوسىپ قالسام, سىزدەردىڭ تالانتتى انشىلەرىڭىز ولەڭ ايتىپ جاتىر ەكەن. ونىڭ ونەرىنە, وزىندىك ەرەكشە داۋىسىنا تاڭ قالدىم. كەيىنىرەك بىلسەم, ول مەنىڭ جانكۇيەرىم ەكەن. ديماشپەن تانىسىپ, كەزدەسكەنىمە قۋانىشتىمىن. بۇيىرسا, ول كينو الەمىنىڭ ۇلكەن جۇلدىزى بولادى», - دەيدى دجەكي.
سونداي-اق, ول جۋرناليستەردىڭ «قازاقستاندا كينو ءتۇسىرۋ ويىڭىزدا بار ما؟» دەگەن سۇراعىنا اكتەر ەلىمىزدە كينو ءتۇسىرۋ جوسپارىندا بار ەكەنىن, بىراق, ۋاقىتتىڭ تاپشىلىعى قول بايلاۋ بولىپ تۇرعانىن ايتادى. دەگەنمەن, بولاشاقتا مىندەتتى قازاقستاندا كينو تۇسىرەتىنىن جەتكىزدى.
الەمدى مويىنداتقان مايتالمان اكتەر بولۋىنىڭ باستى سەبەبى رەتىندە دجەكي چان تىنباي ەڭبەكتەنۋدى, بوس نارسەمەن اينالىسۋدان, ماسەلەن, ينتەرنەتتە وتىرۋدان, اركىمنىڭ ءومىرىن اڭدىپ وتىرۋدان قاشۋدى جانە وزىڭنەن الدەقايدا جاعدايى تومەن جاندارعا قايىرىمدىلىق جاساۋدى اتاپ كورسەتتى.
– مەن وسى دەڭگەيگە ءبىر كۇندە جەتكەن جوقپىن. بارىنە ءوز ۋاقىتىمەن, تاجىريبە ارقىلى قول جەتكىزدىم. مەندە ءبىر كينونى ءتۇسىرىپ بولعاسىن دەمالۋ دەگەن جوق. كينو ءتۇسىرۋ, رولدە ويناۋ, ونىڭ ستسەناريىن جازۋ, ەڭ اياعى مۋزىكاسى مەن دىبىسىن تەكسەرىپ, مونتاج جۇمىسىمەن اينالىسۋدان ءلاززات الماسام, شارشاعان ەمەسپىن, – دەيدى ول.
بەيجىڭدە كۋنگ-فۋ بويىنشا جاتتىعۋلار جۇرگىزىپ جۇرگەن اكتەر الداعى ۋاقىتتا قازاقستاندا دا كۋنگ-فۋ مەكتەبىن اشۋعا نيەتتى. «بولاشاقتا الەمنىڭ بارلىق ەلىندە كۋنگ-فۋ مەكتەپتەرىن اشقىم كەلەدى. مۇمكىن قازاقستاندا دا اشىلىپ قالار», - دەدى دجەكي چان.
جۋرناليستەرمەن كەزدەسۋدەن سوڭ دجەكي چان قازاقستان-قىتاي كينوفەستيۆالىنىڭ اشىلۋ سالتاناتىنا قاتىسىپ, وتاندى سۇيۋگە, وتانشىلدىققا باۋليتىن قىتاي تىلىندەگى «وتان» ءانىن شىرقاپ بەردى. دجەكي چاننىڭ انىنەن كەيىن ساحناعا ديماش قۇدايبەرگەن شىعىپ, «Singer» جوباسىندا شىرقاعان «كۇزگى مۇڭ» ءانىن قىتايشا ورىنداپ بەردى.
ەسكە سالا كەتەيىك, استانادا 7-18 ماۋسىم ارالىعىندا وتەتىن قىتاي كينوفەستيۆالى اياسىندا ەلوردالىقتار مەن قالا قوناقتارى «ىلە وزەنى», «شىنايى ماحاببات», «گ ۇلىم», «قاتەرلى ىسىك مىرزا, كەتىڭىز», «قاسقىر توتەمى» سىندى تۋىندىلاردى تاماشالاي الادى.
ءالي بيتورە,
«ەگەمەن قازاقستان»
