جيىندا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قامتىلعان «قازاقستاننىڭ 100 جاڭا تۇلعاسى» جوباسى جان-جاقتى تالقىلاندى. ساراپشى ماماندار ء«بىزدىڭ زامانداسىمىزدىڭ الەۋمەتتىك بەينەسى قانداي؟ «قازاقستاننىڭ 100 جاڭا تۇلعاسى» قۇرامىنا كىم ۇمىتكەر بولا الادى؟ ۇمىتكەرلەردى تاڭداۋ ءۇشىن قانداي كريتەريلەر مەن باعدارلاردى جاساۋ قاجەت؟ جوبانى ىسكە اسىرۋ ءۇشىن قانداي قۇرالدار ءتيىمدى بولۋى مۇمكىن؟ قازاقستاندا ىسكە اسقان قانداي جوبالار قويىلعان تاپسىرمالاردى ىسكە اسىرۋ ءۇشىن باستاما بولا الادى؟ بۇل جوبانىڭ اقپاراتتىق سۇيەمەلدەۋى قانداي بولۋى قاجەت؟» دەگەن نەگىزگى ساۋالدارعا جاۋاپ ىزدەدى.
– پرەزيدەنتىمىز ءوزىنىڭ «بولاشاققا باعدار: رۋحاني جاڭعىرۋ ماقالاسىندا «قازاقستاننىڭ 100 جاڭا تۇلعاسى» جوباسىنىڭ باستاۋىن بەلگىلەپ بەردى. جوبا ناقتى ماسەلەلەردى شەشۋگە باعدارلانعان: «قوعامعا ءوز اقىلىمەن, قولدارىمەن جانە تالانتىمەن زاماناۋي قازاقستاندى جاساۋعا ات سالىسقان ادامداردىڭ شىن كەلبەتىن كورسەتۋ, اقپاراتتىق قولداۋ كورسەتۋدىڭ جاڭا مۋلتيمەديالىق الاڭىن قۇرۋ جانە ءبىزدىڭ اتاقتى زامانداستارىمىزدى ايگىلەندىرۋ, «100 جاڭا تۇلعالار» جوبالارىنىڭ تەك جالپىۇلتتىق قانا ەمەس, سونىمەن قاتار, ايماقتىق جوبالارىن قۇرۋ. قازاقستان جەتىستىگىنىڭ تاريحى – بۇل ونىڭ ونەگەلى ازاماتتارىنىڭ ءىس-ارەكەتتەرىنىڭ ناتيجەسى. ءار جەڭىستىڭ ارتىندا, ەلدىڭ ءار جەتىستىكتەرىنىڭ ارتىندا ءبىزدىڭ زامانداستارىمىزدىڭ جەكە جەتىستىكتەرى تۇر. ولاردىڭ ەڭبەكتەرىنىڭ سينەرگيالىق سەرپىلىسى, تاۋەلسىزدىك جىلدارى ىشىندە قازاقستانعا ادامي دامۋدىڭ جوعارى الەۋەتى بار ەلدەردىڭ سانىنا كىرۋدى عانا ەمەس, سونىمەن قاتار, ودان ءارى قارقىندى دامۋ ءۇشىن جاعداي جاسايدى» دەپ ەلباسىمىز ءوز ماقالاسىندا بۇل جوبانىڭ ماڭىزدىلىعىنا كەڭ مازمۇندا توقتالعان بولاتىن. شىن مانىندە, بۇل مەملەكەتتىڭ بولاشاعى ءۇشىن اۋاداي قاجەت يگى باستاما. دانا حالقىمىز «ەرىم دەيتىن ەل بولماسا, ەلىم دەيتىن ەر قايدان بولسىن» دەپ تەگىن ايتپاسا كەرەك. ازاماتتاردىڭ ەل يگىلىگى جولىندا اتقارعان تاباندى ەڭبەگى مەن تاريحي ەرلىكتەرى جىلدار پاراعىندا قاتتالىپ, كەلەر ۇرپاق ءۇشىن ساقتالۋ كەرەك. تەك وسىنى جۇيەلى تۇردە ىسكە اسىرۋ ءۇشىن, ادىلەتتى, دۇرىس تاڭداۋ جاسالۋى قاجەت – دەيدى قسزي الەۋمەتتىك-ەكونوميكالىق زەرتتەۋلەر ءبولىمىنىڭ باسشىسى, الەۋمەتتانۋ عىلىمدارىنىڭ دوكتورى ءلاززات نۇرقاتوۆا.
«ۇمىتكەرلەردى ىرىكتەۋ ەلىمىزدىڭ بارلىق وڭىرلەرى بويىنشا جۇرگىزىلەدى. بۇل ازاماتتار قۇرامىنان تەك تانىمال تۇلعالاردى عانا ەمەس, ءومىر جولى ۇلگى تۇتۋعا لايىق, قاراپايىم ازاماتتاردى دا كورۋىمىز كەرەك. بۇل ەشقانداي دا بايگە ەمەس, ەلىمىزدىڭ كوركەيۋىنە زور ۇلەس قوسقان ناعىز ازاماتتاردىڭ شىنايى بولمىسىن جالپاق جۇرتقا ۇلگى ەتىپ كورسەتۋ», دەيدى ماماندار.
تالقىلاۋعا قاتىسقان عىلىمي-زەرتتەۋ ينستيتۋتتارىنىڭ جەتەكشى ساراپشىلارى, تاريحشىلار, قوعام قايراتكەرلەرى مەن ءار سالانىڭ كوشباسشىلارى اتالمىش جوبانىڭ ەل ومىرىندەگى ماڭىزدىلىعىنا توقتالىپ, ءوز وي-پىكىرلەرىن ورتاعا سالدى. ولاردىڭ ويىنشا «بۇل ەسىمگە لايىق ازاماتتار ساپىندا, تاۋەلسىزدىكتىڭ قادىرىن بىلەتىن, حالىقتىڭ تانىم-تاريحىمەن تەرەڭ تامىرلانعان تۇلعالار بولۋى ءتيىس».
ارمان وكتيابر,
«ەگەمەن قازاقستان»
الماتى
