– گاملەت تورەحان ۇلى, ەلباسى بۇقارالىق سپورتتى دامىتۋ كەرەكتىگىن ءجيى ايتىپ كەلەدى. بۇل ماقساتتا وڭىردە ايتا قالارلىقتاي جەتىستىكتەر بار ما؟
– قازىرگى تاڭدا وڭىردە دەنەشىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى حالىقتىڭ 26,9 پايىزىن قۇراپ وتىر. جالپى, وتكەن جىلى وبلىس سپورتشىلارى الەم, ازيا چەمپيوناتتارى مەن كۋبوك سىندارىندا 166 مەدالعا, ەل چەمپيوناتتارى مەن كۋبوك جارىستارىندا 714 جۇلدەگە جانە حالىقارالىق تۋرنيرلەردە 159 مەدالعا قول جەتكىزدى. سالانى دامىتۋعا بيىل بارلىعى 5,8 ميلليارد تەڭگە ءبولىندى. سوڭعى ەكى جىلدا 5 سپورت كەشەنىنىڭ پايدالانۋعا بەرىلگەنى دە بۇقارالىق سپورتتىڭ دامۋىنا جول اشىپ وتىر. سونداي-اق, تاراز قالاسى مەن اۋدانداردا 1600-دەن استام مۇمكىندىگى شەكتەۋلى ازاماتتار سپورتتىڭ ءار تۇرىمەن شۇعىلدانادى.
ءبىر ايتا كەتەرلىگى, جىل سايىن جاستار اراسىندا دەنەشىنىقتىرۋ جانە سپورتپەن شۇعىلدانۋشىلار سانى ارتىپ كەلەدى. بۇل قۋانتارلىق جايت. ماسەلەن, بۇگىندە 131 مىڭنان استام جاس سپورتپەن اينالىسادى. اتالعان كورسەتكىشتەردىڭ ءبارى دە وڭىردە بۇقارالىق سپورتتىڭ دامىعانىن ايقىندايدى.
– بىرقاتار اۋدانداردا بۇقارالىق سپورتتى قارجىلاندىرۋ كولەمى ويداعىداي ەمەس ەكەن. بۇل ماسەلە توڭىرەگىندە قانداي جۇمىستار اتقارىلىپ جاتىر؟
– ارينە, وڭ وزگەرىستەرمەن قاتار, نازار اۋداراتىن وزەكتى ماسەلەلەر دە بار. ماسەلەن, وتكەن جىلى بۇقارالىق سپورتتى قارجىلاندىرۋ كولەمى مەركى اۋدانىندا 3,3 ملن تەڭگە جانە مويىنقۇم اۋدانىندا 5,0 ملن تەڭگە دەڭگەيىندە بولسا, بيىل مويىنقۇم اۋدانى قارجىنى تەك 500 مىڭ تەڭگەگە عانا وسىرگەن. سونىمەن قاتار, بايزاق اۋدانىندا – 13, مويىنقۇم اۋدانىندا 11 جانە مەركى اۋدانىندا 2 نۇسقاۋشى ادىسكەر بىرلىكتەرىن اشۋ قاجەت. ال شۋ جانە سارىسۋ اۋداندارىندا نۇسقاۋشى-ادىسكەر بىرلىكتەرى قىسقارعان. اۋىلدىق وكرۋگتەردە سپورت بويىنشا نۇسقاۋشى-ادىسكەرسىز بۇقارالىق سپورتتى دامىتۋ قيىنعا تۇسەدى. وبلىس اكىمى كارىم كوكىرەكباەۆ بۇل ماسەلە بويىنشا اۋدان باسشىلارىنا تاپسىرما دا بەرگەن بولاتىن.
– ءسىز بىردە وڭىردە اۋا رايىنىڭ جاعدايىنا بايلانىستى قىسقى سپورت تۇرلەرىن دامىتۋعا مۇمكىندىك بولماي وتىرعانىن ايتىپ ەدىڭىز. سونداي-اق, تارازداعى باۋىرجان مومىش ۇلى اتىنداعى ساياباق ىشىنەن جاساندى مۇز ايدىنى سالىنادى دەگەلى كوپ بولدى. بىراق ناتيجە ءالى جوق. نەگە؟
– ءبىر كاسىپكەر مۇندا جاساندى مۇز ايدىنىن سالماقشى بولعان. وكىنىشكە قاراي, حالىق كوپ كۇتكەن مۇز ايدىنىنىڭ قۇرىلىسى قازىر توقتاپ قالدى. دەگەنمەن, بۇگىندە تاراز قالاسىنان مۇز ايدىنىن سالۋ جۇمىستارى جوسپارلانىپ وتىر. ەگەر اتالعان مۇز ايدىنى سالىنسا, وڭىردە قىسقى سپورت تۇرلەرىن دامىتۋعا مول مۇمكىندىك تۋادى.
– «تاراز ارەنا» عيماراتى − ەلباسىنىڭ قاتىسۋىمەن اشىلعان ۇلكەن كەشەن. دەگەنمەن, سول سپورت نىسانى بۇگىندە قارجىلىق جاعىنان ءوزىن ءوزى اقتاي الىپ وتىر ما؟
– بۇل شارۋاشىلىق جۇرگىزۋ قۇقىعىنداعى مەملەكەتتىك كاسىپورىن. ەندى قارجىلىق جاعىنا كەلسەك, كەشەنگە ارعى جىلى 60 ميلليون تەڭگە تابۋ مىندەتتەلگەن بولاتىن. بۇل مەجەگە جەتتىك. سونداي-اق, وتكەن جىلى ءتيىستى 100 ميلليون تەڭگەنىڭ 90 پايىزى ورىندالدى. مۇنداعى ماقسات – جەرگىلىكتى بيۋدجەتكە سالماق تۇسىرمەۋ بولىپ وتىر. ەندى مەكەمە توڭىرەگىندە تالداۋ جاساپ, قارجىلىق جاعىنان شىنىمەن ءوزىن ءوزى اقتاي الا ما, جوق پا دەگەن ماسەلە توڭىرەگىندە زەرتتەۋ جۇمىستارىن جۇرگىزەتىن بولامىز.
– «تاراز» فۋتبول كلۋبىنىڭ اتىنا ءجيى سىن ايتىلادى. ءارى قارجى شىعىنداپ, سىرتتان مامان اكەلۋ جايى تاعى بار. بىراق, سول مامانداردىڭ دا كەيدە كومەگى تيمەي جاتادى. جالپى, تاراز فۋتبولىنىڭ تاعدىرى تۋرالى نە ايتاسىز؟
– بۇگىندە «تاراز» فۋتبول كلۋبىندا جاتتىقتىرۋشى بولىپ جۇرگەن ۆايت تالگاەۆ 1996 جىلى سول «تارازدى» چەمپيون قىلعان. ال ەندى سىرتتان مامان اكەلۋ جايىنا كەلسەك, بۇگىنگى فۋتبول كومانداسىنىڭ جەتپىس پايىزى جەرگىلىكتى ويىنشىلار. شىنى كەرەك, «تاراز» فۋتبول كلۋبىنىڭ دا جەتىستىكتەرگە جەتسەك دەگەن ماقساتتارى بار.
– وليمپيا ويىندارىندا توپ جارعان جەرلەستەرىمىز بارشىلىق. بولاشاقتا دا وڭىردەن شىعاتىن وليمپيادا جەڭىمپازدارىن دايىنداۋعا مۇمكىندىك بار ما؟
– جامبىل وڭىرىنەن ءار وليمپيادا سايىن جەڭىمپازدار مەن جۇلدەگەرلەر شىققان. سوڭعى كەزەڭدەگى اقجۇرەك تاڭاتاروۆ, ءزۇلفيا گابيدۋللينا, ەلدوس سمەتوۆتى ايتساق جەتكىلىكتى. ارينە, بولاشاق جەڭىمپازداردى دايىنداۋعا مۇمكىندىك بار. سىرتتان مامان الدىرماي-اق, بۇل ماسەلەگە جەرگىلىكتى باپكەرلەردىڭ دە مۇمكىندىگى تولىق جەتەدى.
اڭگىمەلەسكەن
حاميت ەسامان,
«ەگەمەن قازاقستان»
