وبلىستىق دەنساۋلىق ساقتاۋ باسقارماسىنىڭ مالىمەتىنشە, مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ جۇمىستارى باستالعالى وبلىس كولەمىندە ءبىرشاما جۇمىستار اتقارىلعان. بۇگىندە وبلىستا 38 ارنايى كابينەت اشىلىپ, مىندەتتى الەۋمەتتىك مەديتسينالىق ساقتاندىرۋ جۇيەسى جونىندە 3452 ازاماتقا ءتۇسىندىرۋ جۇمىستارى جۇرگىزىلدى.
وبلىس تۇرعىندارىنىڭ ءمامس اياسىنداعى مارتەبەسىن انىقتاۋ دا ماڭىزدى ماسەلەنىڭ ءبىرى. ەڭبەك جانە حالىقتى الەۋمەتتىك قورعاۋ مينيسترلىگى تاراپىنان مارتەبەسى انىقتالماعان 393 613 وبلىس تۇرعىنىنىڭ ءتىزىمى كەلىپ تۇسكەن. بۇل وبلىس حالقىنىڭ 35,3 پايىزىن قۇرايدى. الايدا وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى جورابەك باۋبەكوۆ وتباسىنىڭ بارلىق مۇشەلەرىنىڭ مارتەبەسىن انىقتاۋ ماقساتىندا ءۇي شارۋاشىلىقتارىن ارالاۋ بويىنشا بەلسەندى جۇمىستار جۇرگىزىلۋدە, دەيدى. اتالعان جۇمىستار ناتيجەسىندە 393 279 ادامنىڭ مارتەبەسى انىقتالعان. دەگەنمەن, جامبىل وبلىسىندا جۇمىس ىستەگەنىمەن الەۋمەتتىك جارنا اۋدارىمدارى جوق جانە ءوز بەتىنشە جۇمىسپەن قامتىلعانىمەن تىركەلمەگەن ادامدار باسىم بولىپ وتىر. ماسەلەن, تاراز قالاسىنىڭ وزىندە 17 مىڭنان استام ادامنىڭ اۋدارىمدارى جوق ەكەنى بەلگىلى بولدى. سونداي-اق, بايزاق, شۋ, جامبىل, مەركى, قورداي جانە تالاس اۋداندارىندا دا وسىنداي ماسەلەلەر بار.
بۇگىندە بىرقاتار ەل تويحانا, ءدامحانا, دۇكەن سياقتى ورىنداردا جۇمىس ىستەپ, كۇن كورەدى. ال بۇل جەكەمەنشىك جۇمىس بولعاندىقتان, وعان كۇندەلىكتى كەلىسىلگەن اقشادان باسقا ەشتەڭە دە تولەنبەيدى. سوندىقتان دا تۇرعىنداردىڭ اراسىندا ءتۇرلى ماسەلەلەر تۋىندايدى. ايتالىق, قورداي, بايزاق, مەركى, شۋ اۋداندارىندا بارلىعى 32842 ادام تىركەلمەگەن. سونداي-اق, ناتيجەسىز جۇمىسپەن قامتىلعاندار سانى 97923 ادامدى قۇراپ وتىرعانىن دا ايتا كەتكەن ءجون.
ەلباسى ايتقانداي, مەملەكەتىمىز بۇگىندە الەمدەگى ەڭ دامىعان وتىز ەلدىڭ قاتارىنا كىرۋدە باسەكەگە قابىلەتتى بولىپ وتىر. بۇل تۇرعىدا بارلىق وڭىرلەردە ءتيىستى جۇمىستار اتقارىلۋدا. اۋىلدى جەرلەردەگى ازاماتتاردىڭ مارتەبەسىن انىقتاۋ ماقساتىندا, كومپيۋتەرلەر الۋ ءۇشىن 180 ميلليون تەڭگە ءبولىنىپتى. ەگەر ءاربىر وتباسىنىڭ الەۋمەتتىك كارتاسى جاساقتالىپ, ءتيىستى مالىمەتتەر بازاعا ەنگىزىلەتىن بولسا, ەندىگى جەردە مارتەبە انىقتاۋدا ماسەلە تۋىنداي قويماسى انىق.
حاميت ەسامان,
«ەگەمەن قازاقستان»
جامبىل وبلىسى
