ەكسپو-2017 كورمەسىنىڭ قارساڭىندا ۇيىمداستىرىلعان سۋرەتشىنىڭ جەكە كورمەسىنە ەلوردالىق زيالى قاۋىم وكىلدەرى مولىنان جينالدى. كورمەنى مادەنيەت جانە سپورت ءمينيسترى ارىستانبەك مۇحامەدي ۇلى اشتى. ال سىرتقى ىستەر ءمينيسترى قايرات ءابدىراحمانوۆ, اكادەميك مىرزاتاي جولداسبەكوۆ, Cەنات دەپۋتاتى بىرعانىم ءايتىموۆالار سۋرەتشىنىڭ ونەرى تۋرالى ءوز ويلارىمەن ءبولىستى.
ايگىلى سۋرەتشىنىڭ جەكە كورمەسى ەلورداداعى ۇلتتىق مۋزەيدە ءوتتى. كورمە نە ءۇشىن «بەس كۇن» اتالدى؟ نەگە ونى اناسىنا ارنادى؟ قولتاڭباسىنىڭ دارالىعىمەن, بوياۋىنىڭ ايقىندىعىمەن ەرەكشەلەنەتىن سۋرەتشىنىڭ دۇنيەگە, تىرشىلىككە, ادامي قارىم-قاتىناستارعا دەگەن كوزقاراسىنا اناسىنىڭ ىقپالى زور بولعان سياقتى.
سۋرەتشى بىلاي دەيدى: «انام مارقۇم ءومىر بويى ەمشىلىكپەن اينالىستى. ۇلدار ەدى ەسىمى. ول كەزدە ءبىز بالامىز. كۇندە تاڭەرتەڭ ۇيقىدان تۇرىپ, تاڭەرتەڭگى ءشايدى ىشەيىك دەسەك, ۇيدە كەمىندە 10-15 بەيتانىس كىسى وتىرادى. ءبىز وتباسى بولىپ وڭاشا ءشاي ءىشىپ كورمەپپىز. انام ايتاتىن ادامدار اراسىنداعى قارىم-قاتىناس, جارىق دۇنيە مەن و دۇنيە تۋرالى اڭگىمەلەر قۇلاعىمدا قالىپ قويىپتى. كورمەدەگى جۇمىستارىم وسى تاقىرىپتىڭ اينالاسىندا».
دەگەنمەن, سۋرەتشىنىڭ ءوزى بەس كۇنگە تولىقتاي تۇسىنىكتەمە بەرگەن جوق. بىزدىڭشە, سۋرەتشى «بەس كۇن» ارقىلى سوزدىك قورىمىزعا تۇراقتى تىركەس بوپ ەنگەن «بەس كۇن جالعاندى» بەينەلەگەن بولار؟! ول سونداي-اق, وسى ومىردەگى ايەلدىڭ ميسسياسىن ەرەكشە سەزىمتالدىقپەن, پالساپاشىلدىقپەن بوياۋ تىلىنە كوشىرگەن. ول بەينەلەگەن كەيىپكەرلەردىڭ بارلىعى دا ءتۇرلى-ءتۇرلى كوڭىل-كۇيمەن وزىنە باۋرايدى. ءبىر سۋرەتتەگى انا, ەكىنشى ءبىر سۋرەتتەگى كەلىن, ءۇشىنشى ءبىر «اسپانعا ۇشۋ» اتتى سۋرەتتەگى جاس بويجەتكەن, «رەنىش», ء«ۇمىت», «اجىراسۋ» نە «العاشقى ماحاببات», «جاس جۇبايلار» اتتى پولوتنولارداعى كەيىپكەرلەردىڭ بارلىعى دا سەزىمتال, سەرگەك, ومىرگە قۇشتار بەينەلەر.
كورمەدەن العان اسەرىمەن ءماجىلىس دەپۋتاتى ساۋىتبەك ابدراحمانوۆ بىلايشا ءبولىستى:
«كورمەنىڭ اتىنىڭ ءوزى كوپ-كوپ ويعا قالدىرادى. ابايدىڭ «ۋايىم – ەر قورعانى, ەسى بارلىق. قيىنى بۇل دۇنيەنىڭ – قولى تارلىق. «ەھە-ەھەگە» ەلىرمە بوزبالالار, بۇل بەس كۇندىك ءبىر مايدان ەر سىنارلىق» دەگەن ءسوزى بار. ەربولاتتىڭ اناسى دا ۇلىنا : «بۇل بەس كۇندىك دۇنيە, وتەدى دە شىعادى», دەپ ايتىپ وتىرادى ەكەن. سۋرەتشى كورمەسى وسى بەس كۇندىك (اپتاعا دا تولمايتىن!) دۇنيەنىڭ سان سىرىن سان قىرىنان ايقارا اشىپ بەرۋىمەن جۇرەك تولقىتادى.
ايگۇل سەيىلوۆا,
«ەگەمەن قازاقستان»
