«استانا قالاسى الماتى اۋداندىق №2 سوتى كۇدىكتى بيشىمباەۆ قۋاندىق ءۋاليحان ۇلىنىڭ قاماۋدا ۇستاۋ مەرزىمىن 2017 جىلدىڭ 10 شىلدەسىنە دەيىن ۇزارتتى», دەدى استانا قالالىق سوتىنىڭ ءباسپاسوز حاتشىسى بوتاگوز بايانوۆا.
ايتا كەتەيىك, «بايتەرەك ۇبح» اق باسقارماسىنىڭ بۇرىنعى توراعاسى قۋاندىق بيشىمباەۆقا قاتىستى قىلمىستىق تەرگەۋ امالدارى ءجۇرىپ جاتىر. سىبايلاس جەمقورلىققا قارسى ءىس-قيمىل ۇلتتىق بيۋروسى حابارلاعانداي, ول ءبىر توپ اداممەن الدىن الا كەلىسىپ, ءىرى كولەمدە بىرنەشە مارتە پارا الدى دەپ ايىپتالۋدا. بيشىمباەۆ قىزىلوردا قالاسىندا شىنى تاباق شىعاراتىن جانە وڭدەيتىن زاۋىت سالۋ كەزىندە «Orda Glass» جشس-نىڭ ۆەدومستۆولىق باعىنىستاعى كومپانياسى مەن ونىڭ مەردىگەرلىك ۇيىمى «شىمكەنتحيممونتاج» جشس ارقىلى 1 ملرد تەڭگە جىمقىرۋ قىلمىستىق سحەماسىن ۇيىمداستىرعان دەپ كۇدىككە ءىلىندى.
12 قاڭتار كۇنى استانا قالاسى الماتى اۋداندىق №2 سوتى قۋاندىق بيشىمباەۆقا قاتىستى ونى «قاماۋعا الۋ» تۋرالى سانكتسيا بەردى. تەرگەۋ نۇسقاسى بويىنشا, بيشىمباەۆ زاڭسىز جولمەن العان اقشالاي قاراجاتتى جەكە قاجەتتىلىكتەرىنە جۇمساعان.
قۋاندىق بيشىمباەۆ پرەزيدەنتتىڭ جارلىعىمەن 2016 جىلدىڭ 28 جەلتوقسانىندا مينيستر قىزمەتىنەن بوساتىلدى. ول بۇل قىزمەتىندە 8 اي جۇمىس ىستەدى. 2013 جىلدىڭ 30 مامىرىنان 2016 جىلدىڭ 5 مامىرىنا دەيىن «بايتەرەك» ۇلتتىق باسقارۋ حولدينگىنىڭ باسقارما توراعاسى بولدى.
