قۇجاتتا ەلىمىزدىڭ ون ءبىر زاڭىنا تۇزەتۋلەر ەنگىزىلەدى. ەنگىزىلەتىن وزگەرىستەر ىشىندە زەينەتاقى مەن الەۋمەتتىك جاردەماقىلاردى تاعايىنداۋ ماسەلەلەرىن رەتتەيتىن ەرەجەلەر بار.
جوباعا سايكەس, 2017 جىلعى 1 شىلدەدەن باستاپ جاسىنا جانە ەڭبەك سىڭىرگەن جىلدارى ءۇشىن بەرىلەتىن زەينەتاقى تولەمدەرى جانە بالا تۋعا بايلانىستى جاردەماقى مولشەرلەرى 20 پايىزعا وسەدى. جاسى بويىنشا زەينەتاقى تاعايىنداۋدا قاجەت تابىستىڭ ەڭ جوعارى مولشەرى 41-دەن 46 ايلىق ەسەپتىك كورسەتكىشكە دەيىن ارتادى. جۇمىس بەرۋشىگە 5 پايىز كولەمىندەگى مىندەتتى زەينەتاقى جارنالارىن ەنگىزۋ 2018 جىلدان 2020 جىلعا اۋىستىرىلادى.
زاڭ جوباسى مۇگەدەك بالالاردىڭ اتا-انالارىنا تولەنەتىن جاردەماقىنى تاعايىنداۋ پروتسەسىن وڭتايلاندىرۋدى كوزدەيدى. اتاپ ايتقاندا, ەندى مۇگەدەكتىكتى باستاپقى بەلگىلەۋ جونىندەگى مەديتسينالىق-الەۋمەتتىك ساراپتامادان ءوتۋ كەزىندە ءبىر مەزگىلدە وسىنداي جاردەماقىنى تاعايىنداۋعا ارنالعان ءوتىنىشتى «ەلەكتروندىق ۇكىمەت» ۆەب-پورتالى ارقىلى بەرە الادى.
سونداي-اق, زاڭ جوباسىنا بىرمەزگىلدە جاسى بويىنشا الاتىن زەينەتاقى جانە ەڭبەك سىڭىرگەن جىلدارى ءۇشىن بەرىلەتىن زەينەتاقى تولەمدەرىنە قۇقىعى بار ادامدارعا تاڭداۋ مۇمكىندىگىن ناقتىلايتىن ەرەجەلەر ەنگىزىلەدى. قىزمەتىن دوعارعان, ءومىر بويى قامتاماسىز ەتىلگەن سۋديالارعا ەڭبەك سىڭىرگەن جىلدارىنا بايلانىستى زەينەتاقى تولەمدەرى تاعايىندالمايدى.
زاڭ جوباسى پالاتانىڭ قاراۋىنا جىبەرىلدى.
