ارحانگەلسكوە اۋىلى تۇرعىندارىنىڭ قولداۋىمەن ۆوسمايا كوشەسىنە – جاستار, وديننادتساتايا كوشەسىنە – بەرەكە, اتاۋى جوق كوشەلەرگە: بولاشاق, دوستىق, بىرلىك اتاۋلارىن بەرۋ تۋرالى شەشىم قابىلدانعان. ءجون-اق. سول سياقتى ترەتيا, رەپەينايا, پارتيزانسكايا كوشەلەرىن بىرىكتىرىپ, جەڭىس كوشەسى دەپ اتاۋدى ۇيعارعان. ءارى قاراي كوشەلەردى قازاقشالاۋعا سوزدىك قورلارى تاۋسىلىپ قالعان سىڭايلى. ال نوۆوكامەنكالىقتار بىرقاتار كوشەلەردىڭ اتاۋلارىن وزگەرتۋگە تالپىنىس جاساعان. لەنين كوشەسىن – تاۋەلسىزدىك, كراسنايا كوشەسىن – جاڭاتالاپ دەپ وزگەرتسە, اتاۋلارى جوق كوشەلەرگە – لەسنايا, يۋبيلەينايا, جۇلدىز دەگەن اتتاردى تاڭا سالعان. بۇلار دا زامان تالابىنا لايىق اتاۋلاردى تاپپاعانعا ۇقسايدى. پەرۆايا مەن بەرەگوۆايا كوشەلەرىن – بەرەگوۆايا, ترەتيا, تسەنترالنايا جانە چاپاەۆ كوشەلەرىن – تسەنترالنايا دەپ اتاۋمەن شەكتەلگەن. ءتىزىم وسىلاي جالعاسا بەرەدى. پەتەرفەلد اۋىلدىق وكرۋگىنىڭ بوروۆسكوە اۋىلىنداعى پەرۆايا كوشەسىن – سادوۆايا, ۆتورايا كوشەسىن – پاركوۆايا, ترەتيا كوشەسىن – لەسنايا دەپ وزگەرتكەننەن كىم نە ۇتتى دەگەن ورىندى ساۋال تۋادى. قاتتى قىنجىلتاتىنى, جەر-سۋ اتاۋلارىن وزگەرتۋ كەزىندە وڭىردەگى تاريحي تۇلعالاردىڭ ەسىمدەرى ءالى كۇنگە دەيىن ەلەنبەي كەلەدى. ەڭبەك ارداگەرى ساعات قۋاندىقوۆتىڭ وكتيابر كوشەسىنە ماعجان جۇماباەۆتىڭ ەسىمىن بەرۋ تۋرالى تىلەگى ەسكەرۋسىز قالعان.
تىلدەردى دامىتۋ جونىندەگى باسقارمانىڭ ونوماستيكالىق جۇمىس ءبولىمىنىڭ جەتەكشىسى ەرنياز سۇلتانوۆ ءبىزدى بۇلار تۇرعىنداردىڭ ءبىر بولىگىنىڭ عانا وي-پىكىرلەرى, تۇپكىلىكتى شەشىم اۋداندىق اكىمدىك پەن ءماسليحاتتىڭ, اۋىلدىق وكرۋگ اكىمدەرىنىڭ بىرلەسكەن وتىرىسىندا قارالىپ, قابىلدانادى دەپ جۇباتقانمەن, كوڭىلدى كۇپتى ەتەتىن جايتتار جوق ەمەس. اتاپ ايتقاندا, جۇرتشىلىقتىڭ ۇسىنىستارىنا جەرگىلىكتى بيلىك وكىلدەرىنىڭ وزگەرىس-تولىقتىرۋلار ەنگىزۋىنە قۇقى جوق ەكەنى بەلگىلى. ولاي بولسا, وزگەرتىلمەگەن كۇيى, شالا قارپىلعان كيىز قۇساپ, قابىلدانىپ كەتۋى ابدەن مۇمكىن عوي. كوشە اتاۋلارىن تاڭداۋ حالىقتىڭ يەلىگىندەگى ماسەلە بولعانىمەن, ولارعا ىشكى ساياسات جانە تىلدەردى دامىتۋ جونىندەگى ءبولىمنىڭ ماماندارى جالپى باعىت-باعدار بەرەتىنىن جۇرت جاقسى بىلسە كەرەك. بىزدىڭشە, تۇرعىندار اراسىندا ءتۇسىندىرۋ جۇمىستارى جەتە جۇرگىزىلمەگەنگە ۇقسايدى. وسى سياقتى نەمقۇرايدىلىققا, جالپاقشەشەيلىككە سالىنۋ سالدارىنان پەتروپاۆل قالاسىنىڭ وزىندە كوشەلەرگە ەش ءمان-ماعىناسى جوق جەڭىل-جەلپى اتاۋلار بەرىلىپ ءجۇر. ابىلايحان, قوجابەرگەن جىراۋ, سەگىز سەرى, ءبىرجان سال, اقان سەرى, ۇكىلى ىبىراي سەكىلدى تۇلعالاردى ايتپاعاندا قىزىلجار وڭىرىندە ەڭبەك ەتكەن, ەلدىڭ دامۋىنا ولشەۋسىز ۇلەس قوسقان سماعۇل سادۋاقاسوۆ, جۇمابەك تاشەنوۆ, سافۋان شايمەردەنوۆ, شاحمەت قۇسايىنوۆ جانە تاعى باسقا دا اسىلدارىمىزدىڭ ەسىمدەرى قاشانعا دەيىن ەسكەرۋسىز قالا بەرەدى؟
ەلباسى «بولاشاققا باعدار: رۋحاني جاڭعىرۋ» اتتى ماقالاسىندا: «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس», – دەدى. دەمەك, ەلىمىز جاڭا تاريحي كەزەڭگە اياق باسىپ, مىقتى ءارى جاۋاپكەرشىلىگى جوعارى ءبىرتۇتاس ۇلت بولۋ ءۇشىن بولاشاققا قالاي قادام باساتىنىمىز جانە بۇقارالىق سانانى قالاي وزگەرتەتىنىمىز تۋرالى ايتىلىپ جاتقان شاقتا تاپتاۋرىن بولعان ەسكى اتاۋلارعا جابىسىپ قالماي, سانامىزعا سەرپىلىس بەرەتىن ۋاقىت جەتكەن سياقتى. ەندەشە, وسى كەزەڭدى پايدالانىپ, ەل مەن جەرىمىزدىڭ, كوشەلەرىمىزدىڭ اتاۋلارىن ۇلتتىق كودىمىزدى ساقتاي وتىرىپ, جاڭا تۇرپاتتا جاڭعىرتىپ العانىمىز ءجون ەمەس پە؟
ءلايلا جانىسوۆا,
جۋرناليست
سولتۇستىك قازاقستان وبلىسى
