وتىرىسقا كوميسسيا مۇشەلەرى – رەسپۋبليكالىق بۇقارالىق اقپارات قۇرالدارىنىڭ, شىعارماشىلىق بىرلەستىكتەردىڭ, جۋرناليستەردىڭ قوعامدىق ۇيىمدارىنىڭ جانە مۇددەلى مەملەكەتتىك ورگانداردىڭ وكىلدەرى قاتىستى. باسقوسۋدا مەملەكەتتىك حاتشى قازاقستاننىڭ مەملەكەتتىلىگىن نىعايتۋداعى بۇقارالىق اقپارات قۇرالدارىنىڭ ماڭىزدى ءرولىن اتاپ ءوتتى.
«بۇگىنگى كەزدەسۋىمىز قوعام ءومىرىنىڭ بارلىق سالاسىن جاڭعىرتۋعا باعىتتالعان ينستيتۋتتىق رەفورمالاردىڭ تەرەڭدەي تۇسكەن جاۋاپتى كەزەڭىندە ءوتىپ وتىر. مەملەكەت باسشىسى بەلگىلەگەن قازاقستاننىڭ وزىق دامىعان 30 ەلدىڭ قاتارىنا قوسىلۋ جونىندەگى ستراتەگيالىق مىندەتتەرى وتاندىق باق-قا دەگەن زور سۇرانىس تۋدىرىپ, ەرەكشە ءرول اتقارۋدى تالاپ ەتەدى. جۋرناليستەردىڭ كاسىبي مەرەكەسىنە وراي, جىل سايىنعى اقپارات سالاسىنىڭ ۇزدىكتەرىن بەلگىلەيمىز. بۇقارالىق اقپارات قۇرالدارى سالاسىنداعى پرەزيدەنت سىيلىعىن بەرۋ, گرانتىن تاپسىرۋ جانە العىسىن جاريالاۋ – ءباسپاسوز وكىلدەرى اسىعا كۇتەتىن ءداستۇرلى ءىس-شارامىز. ەلباسىنىڭ جۋرناليستەرگە ارنالعان سىيلىعى مەن گرانتى العاش رەت 1997 جىلى بەرىلدى. سودان بەرى, مىنە, 21-رەت وتكىزىلگەلى وتىر», – دەدى گ.ابدىقالىقوۆا.
مەملەكەتتىك حاتشى, سونداي-اق, اقپاراتتىق قولداۋ مەملەكەتتىك ساياساتتى جانە ەل ىشىندەگى رەفورمالار باعىتىن ءتيىمدى ىسكە اسىرۋدىڭ ماڭىزدى تالاپتارىنىڭ ءبىرى بولىپ تابىلاتىنىنا توقتالدى.
«جاھاندانۋ پروتسەسى بەلەڭ العان قازىرگى زاماندا ءباسپاسوزدىڭ باسەكەگە قابىلەتتى بولۋى – ماڭىزدى مىندەتتەردىڭ ءبىرى. سوندىقتان مەملەكەت باسشىسى نۇرسۇلتان نازارباەۆ باق وكىلدەرىنىڭ, بۇقارالىق اقپارات قۇرالدارىنىڭ جۇمىسىنا اسا كوڭىل بولەدى جانە ارنايى قولداۋ ءبىلدىرىپ وتىرادى. وسىعان بايلانىستى مەملەكەتتىك سىيلىق پەن گرانتتار بەلگىلەنگەن. بيىل ەلباسىنىڭ «بولاشاققا باعدار: رۋحاني جاڭعىرۋ» اتتى تاريحي ماقالاسى جاريالاندى. قوعامدىق سانانى دامىتۋ مەن رۋحاني جاڭعىرۋدى ىسكە اسىرۋدا باق وكىلدەرىنىڭ دە ءرولى وراسان زور», – دەدى گ.ابدىقالىقوۆا.
مەملەكەتتىك حاتشى تاياۋ كۇندەرى استانادا ەكسپو-2017 كورمەسى ءوز جۇمىسىن باستايتىندىعىن, ونىڭ جۇمىسىن كورسەتۋدە, ناسيحاتتاۋدا باق وكىلدەرىن ۇلكەن جۇمىس كۇتىپ تۇرعانىن تىلگە تيەك ەتتى. سونداي-اق, بيىلعى قوعامدىق كوميسسيانىڭ وتىرىسىندا جۋرناليستىك ماتەريالدار دەڭگەيىنىڭ جوعارى ەكەنى ايتىلىپ, قازاقستان دامۋىنىڭ ماڭىزدى قوعامدىق-ساياسي جانە الەۋمەتتىك-ەكونوميكالىق اسپەكتىلەرىن جاريا ەتۋدەگى مەديا قوعامداستىعى وكىلدەرى ۇلەسىنىڭ زور ەكەندىگى نازاردان تىس قالمادى.
تالقىلاۋ قورىتىندىسى بويىنشا قوعامدىق كوميسسيا اشىق داۋىس بەرۋ ارقىلى, باق سالاسىنداعى پرەزيدەنتتىك سىيلىقتاردى تاپسىرۋ ەرەجەسىنە سايكەس, باق وكىلدەرىنە ەكى سىيلىق جانە ەكى گرانت ءبولۋ, ءتورت شىعارماشىلىق ۇجىمعا پرەزيدەنت العىسىن جاريالاۋ جونىندە مەملەكەت باسشىسىنا ۇسىنىم جاساۋعا ءبىراۋىزدان قاۋلى ەتتى.
نۇرلىبەك دوسىباي,
«ەگەمەن قازاقستان»
