پاۆيلوندار دا, قىزمەتكەرلەر دە دايىن
«سوڭعى بىرنەشە اپتا بويى ءبىز كوپتەگەن وقۋ-جاتتىعۋ وتكىزىپ, توتەنشە جاعدايلارعا دايىندىق جۇرگىزدىك. نەگىزگى دايىندىق بارىسىنا كورمەنىڭ بۇكىل اۋماعى جۇمىلدىرىلدى. ايتا كەتەرلىگى, 10 ماۋسىمعا دەيىن كورمە اۋماعى كەلۋشىلەر ءۇشىن جابىق بولادى», دەيدى باسقارۋشى ديرەكتور. حالىقارالىق قاتىسۋشىلارمەن جۇمىس دەپارتامەنتىنىڭ ديرەكتورى ءىليا ورازاقوۆ قاتىسۋشىلاردىڭ 126 مىڭ شارشى مەتر پاۆيلونى تولىق دايىن ەكەندىگىن ايتتى. «قازىرگى ۋاقىتتا ءتورت-بەس ەل عانا قالدى. ولار وزدەرىنىڭ قۇرىلىس-مونتاج جۇمىستارىن اياقتايدى. ءبىز حالىقارالىق قاتىسۋشىلاردىڭ وپەراتسيالىق قۇرامىن دەر ۋاقىتىندا جاساقتادىق. ءاربىر پاۆيلوننىڭ 30-دان 150-گە دەيىن قىزمەتكەرى بار. ولاردىڭ بارلىعى استانادا, جۇمىستارىندا بەلسەندى, دەيدى ول.
ۇيىمداستىرۋشىلاردىڭ سوزىنشە, جوسپارلانعان ءىس-شارالار تولىق كولەمدە ورىندالعان. قاجەتتى قۇرال-جابدىقتار ساتىپ الىنىپ, ورناتىلعان. بەينەباقىلاۋ, دابىل جانە كىرىپ-شىعۋدى باسقارۋ جۇيەلەرى ءجۇز پايىز دايىن. قاۋىپسىزدىكتى قامتاماسىز ەتۋگە جۇمىلدىرىلاتىن قىزمەتكەرلەر – قۇقىق قورعاۋ ورگاندارى مەن جەكە كۇزەت قۇرىلىمدارىنىڭ قىزمەتكەرلەرى قاجەتتى وقىتۋ كۋرسىنان, تىلدىك دايىندىقتان ءوتتى. جەكسەنبىلىك توپتار ءبىر ساعاتتىڭ ىشىندە شامامەن 13 مىڭ ادامدى قابىلداي الادى. بۇل رەتتە كۇتۋ ۋاقىتى 30-40 مينۋتتان اسپايدى.
سەرۆيستىك قامتاماسىز ەتۋ دەپارتامەنتىنىڭ ديرەكتورى دياس ازبەرگەنوۆتىڭ ايتۋىنشا, كورمە اۋماعىندا ورنالاسقان 7 مەديتسينالىق بەكەت پەن 8 جەدەل جاردەم كولىگى تۇراقتى تۇردە كەزەكشىلىك اتقارادى. شارا بارىسىندا جۇمىلدىرىلاتىن 210 مەديتسينالىق قىزمەتكەردىڭ قاتارىندا دارىگەرلەر, فەلدشەرلەر, رەانيماتولوگتار بار.
كورمەگە نەشە ادام كەلەدى؟
كورمەگە كەلەتىن قوناقتار مەن تۋريستەردىڭ ناقتى سانى كوپ كوڭىلىن كۇپتى قىلىپ جۇرگەن. ۇيىمداستىرۋشىلاردىڭ مالىمەتىنە سەنسەك, كورمەگە 2,4 ميلليون ادام كەلەدى ەكەن. ولاردىڭ 15 پايىزى شەتەلدىك تۋريست بولۋى كەرەك.
«تاجىريبەگە سۇيەنسەك, كورمەگە كەلۋشىلەر سانى بولجامنىڭ 70-80 پايىزى بولادى. ال ءبىزدىڭ جاعدايىمىزدى بۇل كورسەتكىش 85 پايىزدى قۇراماق. ونىڭ 15 پايىزى – شەتەلدەردەن كەلەتىن قوناقتار. مولشەرمەن ايتقاندا ادامدار سانى 600-دەن 750 مىڭعا دەيىن بولادى. كورمەگە كەلەتىن تۋريستەردىڭ 70 پايىزى جاقىن شەت ەلدەردەن بولاتىنى ايتپاسا دا تۇسىنىكتى. ولار نەگىزىنەن ءبىزدىڭ كورشىلەرىمىز. بۇگىنگى تاڭدا قىتايدان شامامەن 150-200 مىڭ قوناق كەلەدى دەپ كۇتىلۋدە. ويتكەنى, قىتايلىق تۋريزم اگەنتتىكتەرى بۇل شاراعا قاتتى قىزىعىپ وتىر. تاعى 150-200 مىڭ قوناق ەۋروپا, سولتۇستىك امەريكا سياقتى ايماقتارداعى مەملەكەتتەردەن كەلەدى. وكىنىشكە وراي, ىشكى ءبولىنىس قالاي بولاتىنىن ايتا المايمىز», دەيدى «استانا ەكسپو -2017» ۇك» اق حالىقارالىق قاتىسۋشىلارمەن جۇمىس دەپارتامەنتىنىڭ ديرەكتورى يليا ورازاقوۆ.
قازىرگى تاڭدا قانداي مەملەكەتتەن قانشا ادام بيلەتتەردى ساتىپ الىپ جاتقانى انىقتالۋدا. جالپى, مۇنى قاداعالاۋ قيىن پروتسەس كورىنەدى. ويتكەنى, ول بەلگىلى ءبىر وپەراتور ارقىلى جۇزەگە اسىرىلادى ەكەن. سوندىقتان بۇل مالىمەت كەيىن تاعى حابارلانباق.
بيىلعى جارمەڭكە ەكسپو-عا باعىشتالعان
ەل وڭىرلەرىنىڭ استاناداعى اۋىلشارۋاشىلىق جارمەڭكەسى بيىل ەكسپو-2017 كورمەسىنە ورايلاستىرىلعان. ءداستۇرلى شارانىڭ كورىگىن وتكەن اپتادا قىزىلوردا, اتىراۋ, باتىس قازاقستان وبلىستارىنىڭ ديقاندارى قىزدىردى. وڭىرلىك تاۋار وندىرۋشىلەر «قازاقستان» سپورت سارايىنىڭ اۋماعىنا ورنالاسقان 24 ساۋدا شاتىرىندا 500 تونناعا جۋىق ءونىم ۇسىندى. «مەملەكەت باسشىسىنىڭ تاپسىرماسىمەن جانە ۇكىمەت شەشىمىمەن اۋىل شارۋاشىلىعى مينيسترلىگى حالىقارالىق كورمە كەزىندە استاناعا جەتكىزىلەتىن اۋىلشارۋاشىلىق ونىمدەرىنىڭ كولەمىن ارتتىرۋدى شەشكەن-ءتىن. ەلوردا اكىمدىگىمەن بىرلەسىپ, قاجەتتى ونىمدەردىڭ كولەمىن ەسەپتەدىك. جالپى ەسەپ بويىنشا 120000 توننا قاجەت. قازىرگى تاڭدا كەستە قۇرىلىپ, بارلىق وبلىستارمەن كەلىسىمگە قول قويىلدى», دەيدى اۋىل شارۋاشىلىعى ۆيتسە-ءمينيسترى تولەۋتاي راحىمبەكوۆ.
باس قالا تۇرعىندارى مەن قوناقتارىنا قاجەت تاۋارلاردىڭ 81000 تونناعا جۋىعىن ءداستۇرلى ريتەيلەرلەر اكەلەتىن بولسا, قوسىمشا 39000 تونناسى تۇراقتى جارمەڭكەلەر ارقىلى جەتكىزىلمەك. مۇنداي جارمەڭكەلەرگە قاتىسۋعا ەلدىڭ ءار وڭىرىنەن 600 مىڭ تاۋار ءوندىرۋشى نيەت بىلدىرگەن كورىنەدى. «بيىلعى ماۋسىمدا قالا تۇرعىندارى مەن قوناقتارى ءۇشىن اۋىلشارۋاشىلىق ونىمدەرىنە تاپشىلىق بولمايدى», دەپ سەندىردى ۆيتسە-مينيستر. شەنەۋنىك باعانى رەتتەۋ ماسەلەسى دە تۇراقتى قاداعالاۋدا بولاتىنىن جەتكىزدى.
«بىزگە ونىمدەردى جەتكىزۋ, لوگيستيكا جانە ساۋدا ورىندارىن ۇسىنۋ بويىنشا استانا اكىمدىگى ۇلكەن قولداۋ تانىتۋدا. وسى جولى قىزىلوردا وبلىسىنان 45 ملن تەڭگەنىڭ 200 توننادان استام ءونىمىن جەتكىزدىك. جارمەڭكەگە 40 تاۋار ءوندىرۋشى قاتىستى. ءداستۇر بويىنشا, 112 توننا كۇرىش, كوكونىس, بالىق جانە كونديتەرلىك ونىمدەر ۇسىندىق. ەكسپو كەزەڭىندە جالپى 7648 توننا ءونىم اكەلەمىز دەپ جوسپارلاۋدامىز, ولاردىڭ باسىم كوپشىلىگى – كۇرىش, بالىق ونىمدەرى جانە باقشا داقىلدارى», دەيدى اۋىل شارۋاشىلىعى باسقارماسىنىڭ باسشىسى باقىت جاقانوۆ.
ماۋسىمنىڭ 11-12 كۇندەرى وڭىرلىك اۋىلشارۋاشىلىق جارمەڭكەسىن اتىراۋ مەن جامبىل وبلىستارى جالعاستىرادى.
اسحات رايقۇل,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
