بۇگىن ماجىلىستە وتكەن ۇكىمەت ساعاتىندا عارىش سالاسىنىڭ دامۋ قارقىنى جان-جاقتى قارالدى.
«جەردى قاشىقتىقتان زوندتاۋدان الىنعان سۋرەتتەردى وڭدەۋ قاجەت. ولاردى وڭدەۋ ءۇشىن ءتيىستى كادرلار, ماتەريالدىق, تەحنيكالىق رەسۋرتار جوق», - دەيدى قر پارلامەنتى ءماجىلىسىنىڭ دەپۋتاتى شافحات وتەمىسوۆ.
بۇل تۇيتكىلدىڭ ءتۇيىنىن تارقاتۋ ءۇشىن ءۇكىمەت مەملەكەتتىك ورگاندار جانىنان گەوپورتال اشۋدى ۇسىنىپ وتىر. سول ارقىلى ماماندار وقىتىلىپ, سپۋتنيك ارقىلى تۇسىرىلگەن سۋرەتتەردى ودان ءارى وڭدەۋ ءىسى قولعا الىنباق. بىراق ءبىر پورتالدى ىسكە قوسۋدىڭ وزىنە شامامەن 100 ملن تەڭگە قاجەت.
«ءار سالاعا ارنايى گەوپورتال سالۋ ءۇشىن 4,8 ملرد تەڭگە قاجەت. ونى دۇرىس پايدالانۋ ءۇشىن ماماندار دايارلاۋ كەرەك», دەيدى قر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ.
عارىش سالاسىن ودان ءارى دامىتۋ ءۇشىن جۇمسالاتىن شىعىن مۇنىمەن شەكتەلمەيدى. سەبەبى, 2023 جىلى KazSat-2 جەرسەرىگىنىڭ قولدانىلۋ مەرزىمى اياقتالادى. سوندىقتان جاڭا اپپاراتتى جوبالاۋ جۇمىسى باستالدى. ۇكىمەت ساعاتىندا «بايقوڭىر» عارىش ايلاعىن دامىتۋ جايى دا قوزعالدى.
«بايقوڭىر» كەشەنىن دامىتۋ جوباسى اياسىندا ونداعى نىسانداردى كۇتىپ-ۇستاۋ مەن پايدالانۋ بويىنشا جۇمىستاردى قارجىلاندىرۋ ماسەلەسىن شەشۋ كەرەك. «بايتەرەك» جاڭا عارىش زىمىران كەشەنىنەن ءبىرىنشى ۇشىرىلىمدى 2025 جىلى جۇزەگە اسىرۋ جوسپارلانىپ وتىر. سول ارقىلى ەكولوگيالىق پروبلەمالاردى شەشۋگە بولادى. جاڭا زىمىران گەپتيلدى «پروتوندى» الماستىرادى», - دەيدى اتامقۇلوۆ.
ءمينيستردىڭ مالىمدەتىنشە, ەل ۇكىمەتى «بايقوڭىر» كەشەنىن دامىتۋ جوباسىن جالعاستىرادى. ياعني 60 جىلعا جۋىق ۋاقىتتان بەرى اسپان مەن جەر اراسىن جالعاعان ايلاق ەل مۇددەسى ءۇشىن جۇمىس ىستەي بەرمەك.
بۇعان قوسا, عارىش اپپاراتتارىن قۇراستىرۋ, سىناق كەشەندەرى مەن جەردى قاشىقتىقتان زوندتاۋ جۇيەسىنە ارنالعان تىڭ باستامالار قولعا الىنادى. ال مامان تاپشىلىعىن جويۋ ءۇشىن ۇكىمەت كۇزگە دەيىن جاڭا زاڭ جوباسىن ازىرلەۋى ءتيىس.
