قر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ ءتورتىنشى عارىشكەردى قاشان ۇشىرۋ جوسپارلانىپ وتىرعانىن ايتتى, دەپ حابارلايدى Sputnik قازاقستان.
"بۇل اقشاعا بايلانىستى. ءبىر عارىشكەردى عارىشقا ۇشىرۋ 30 ميلليون دوللار شاماسىندا. ەكىنشىدەن, عارىشكەردى تۋريست رەتىندە جىبەرمەي, ول عارىشتا عىلىمي-زەرتتەۋ جۇمىستارىن جۇرگىزۋى كەرەك. ال بۇل عىلىمي-زەرتتەۋ جۇمىستارىنىڭ جوسپارى بولۋى قاجەت. بۇل جوسپاردى ءبىزدىڭ مينيسترلىكتەر, مەملەكەتتىك ورگاندار بەرۋى كەرەك. وسى جۇمىس ءبارى جاسالسا جانە پارلامەنت قولداسا, جوسپار بار", — دەپ حابارلادى اتامقۇلوۆ ماجىلىستە ءوتىپ جاتقان ۇكىمەت ساعاتىندا.
عارىشتى وسى كۇنگە دەيىن قازاقتىڭ ءۇش عارىشكەرى باعىندىردى. قازاقتىڭ تۇڭعىش عارىشكەرى توقتار اۋباكىروۆ 1991 جىلى عارىشقا ۇشتى. عارىشتا وتكىزگەن ۋاقىتى — 7 كۇن 22 ساعات 13 مينۋت.
تاۋەلسىز قازاقستاننان شىققان تۇڭعىش عارىشكەر تالعات مۇساباەۆ عارىشقا ءۇش رەت – 1994, 1998 جانە 2001 جىلى ۇشتى. عارىشتا بولعان جالپى ۋاقىتى — 341 كۇن 9 ساعات 48 مين.
ال ايدىن ايىمبەتوۆ قازاقستان ازاماتى رەتىندە ۇشقان تۇڭعىش عارىشكەر, ول 2015 جىلى عارىشتى باعىندىردى. ايدىن ايىمبەتوۆ عارىشتا 9 كۇن 20 ساعات 13 مين بولدى.
ءۇش باتىرعا دا عارىش كەڭىستىگىن يگەرۋگە سىڭىرگەن اسا زور ەڭبەگى, عارىشقا ۇشۋ كەزىندە كورسەتكەن باتىرلىعى مەن ەرلىگى ءۇشىن "حالىق قاھارمانى" اتاعى بەرىلگەن.
