شارانىڭ ۇيىمداستىرۋشىلارى: قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ اناليتيكالىق ورتالىعى, قر تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتى مەن قىتايدى زەرتتەۋ ورتالىعى. سي ءتسزينپيننىڭ كىتابىن قحر ازشىلىق ۇلتتار باسپا ءۇيى قازاق تىلىنە ءتارجىمالادى.
- اتالمىش كىتاپتىڭ قازاق تىلىنە اۋدارىلۋى مەملەكەت باسشىسىنىڭ ۇزدىك زاماناۋي ادەبيەتتەردى قازاق تىلىنە اۋدارۋ بويىنشا قويعان تاپسىرمالارعا جاۋاپ بەرىپ, مەملەكەتتىك تىلدەگى ادەبيەت قورىن جەتىلدىرەتىنىنە نازار اۋدارعىم كەلەدى. سونداي-اق, ونىڭ وقىرمان اۋديتورياسى ايتارلىقتاي ۇلعايادى, - دەدى قر تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىباەۆ.
2014 جىلى جارىق كورگەن «سي تسزينپين ەل باسقارۋ جونىندە» كىتابى الەمدە ۇلكەن سۇرانىسقا يە, بۇل كىتاپ جىل سايىن 25-تەن استام تىلدە ميلليونداعان دانامەن باسىلادى.
ەرجان سالتىباەۆتىڭ سوزىنشە, قازاقستاندا جۇرگىزىلىپ جاتقان ۇشىنشى جاڭعىرتۋ اياسىندا بۇل كىتاپ ۇلكەن سۇرانىسقا يە بولماق.
- ءبىز ءۇشىن شىعىستاعى تابىستى ءارى ناتيجەلى كورشىمىزدىڭ جەتىستىكتەرى مەن رەفورمالىق تاجىريبەلەرى ماڭىزدى. سي ءتسزينپيننىڭ نەگىزگى ماقالالارى, سۇحباتتارى مەن باياندامالارى جيناعىندا قىتايلىق تريۋمف فەنومەنى, ايگىلى جەتەكشىنىڭ ساياسي فيلوسوفياسى, قىتاي حالىق رەسپۋبليكاسىنىڭ ىشكى جانە سىرتقى ساياساتى دامۋىنىڭ نەگىزگى ستراتەگيالىق باعىتتارى انىقتالىپ جازىلعان, - دەدى اەسي ديرەكتورى.
ە. سالتىباەۆتىڭ پىكىرىنشە, كىتاپ قازاقستاندىق وقىرماندار تاراپىنان لايىقتى باعاسىن الادى: «ساراپشىلار مەن زەرتتەۋشىلەر ءۇشىن بۇل قۇجاتتىق دەرەك پەن باستاپقى دەرەكتەردىڭ قاينار كوزى بولىپ تابىلادى. ىسكەر ورتا مەن كاسىپكەرلەر قاۋىمداستىعى ءۇشىن بۇل كىتاپ قىتاي ەكونوميكاسىنىڭ تەتىكتەرىن, ونىڭ جۇمىس ىستەۋىن بىلۋگە, ينۆەستيتسيا ءۇشىن جاڭا يدەيالار مەن جاڭا بيزنەس-جوسپارلاردى تۋدىرۋعا كومەكتەسەدى. كىتاپتىڭ قازاقستاندا جارىق كورۋى مەملەكەتتىك قۇرىلىم, جاڭعىرتۋ مەن تاريحتاعى تۇلعانىڭ ءرولى سەكىلدى سالالاردا جاڭا عىلىمي زەرتتەۋلەر جۇرگىزۋگە تاعى ءبىر سەرپىن بەرەدى دەپ ويلايمىن».
كىتاپتىڭ تانىستىرۋ راسىمىنە قر پرەزيدەنتىنىڭ كەڭسەسى جەتەكشىسىنىڭ ورىنباسارى باقىتجان تەمىربولات, قحر قازاقستانداعى توتەنشە جانە وكىلەتتى ەلشىسى چجان حانحوي جانە قحر مەملەكەتتىك كەڭەسى ءباسپاسوز-كەڭسەسىنىڭ جاھاندىق كوممۋنيكاتسيا بيۋروسى ديرەكتورىنىڭ ورىنباسارى تۋو جەن, سونداي-اق, ل.ن. گۋميلەۆ اتىنداعى ەۇۋ رەكتورى ەرلان سىدىقوۆ, قر تۇڭعىش پرەزيدەنتى – ەلباسىنىڭ كىتاپحاناسى ديرەكتورىنىڭ ورىنباسارى تيمۋر شايمەرگەنوۆ جانە باسقا دا قازاقستاننىڭ قوعام قايراتكەرلەرى قاتىستى.
كىتاپتىڭ تۇساۋكەسەر ءراسىمى قحر توراعاسى سي ءتسزينپيننىڭ 2017 جىلدىڭ 8 ماۋسىمىندا استاناعا رەسمي ساپارمەن كەلۋىنە جانە شىۇ مۇشە-مەملەكەتتەر باسشىلارىنىڭ سامميتىنە قاتىسۋىنا ورايلاستىرىلعان.
تۇساۋكەسەر اياسىندا قوناقتار قىتاي تىلىنە اۋدارىلعان بەلگىلى قازاق جازۋشىلارىنىڭ كىتاپتارىمەن تانىس بولدى. شارا قاتىسۋشىلارىنا كىتاپتىڭ العاشقى دانالارى تانىستىرىلدى.
