قالا اكىمى باۋىرجان بايبەك كوررەكتسيالىق مەكتەپتەردىڭ وقۋشىلارى سالعان سۋرەت كورمەسىندە بولدى. رەسپۋبليكا سارايىندا ن.وستروۆسكي اتىنداعى سوقىر جانە ءالسىز كورەتىن بالالار تاربيەلەنەتىن №4 جالپى ءبىلىم بەرۋ مەكتەپ-ينتەرناتىنىڭ جانە ءتىلى جەتىلمەگەن بالالار ءدارىس الاتىن №9 كوررەكتسيالىق مەكتەپ-ينتەرناتتىڭ, «جانۇيا» ارنايى كەشەنىنىڭ, كەرەڭ بالالار وقيتىن №5 مەكتەپ-ينتەرناتتىڭ, №1 جالپى ءبىلىم بەرەتىن مەكتەپ-ينتەرناتتىڭ وقۋشىلارى سالعان سۋرەت كورمەسى ۇيىمداستىرىلدى.
ب.بايبەك ۇسىنىلعان جۇمىستاردىڭ ساپاسى مەن شەبەرلىگىن جوعارى باعالاپ, اسىرەسە اقىل-وي دامۋى كەشەۋىلدەگەن بالالار وقيتىن №7 مەكتەپ-ينتەرنات وقۋشىلارى سالعان «ەكسپو-2017 – بالالار كوزىمەن» تريپتيحىنە ايرىقشا توقتالدى. تاربيەشىلەر ءتريپتيحتى بالالاردىڭ 3 ايعا جۋىق سالعانىن, ونىڭ وتە قيىن جۇمىس ەكەنىن, جىپتەردى وراپ, كيىزدى جەلىمدەۋدىڭ, قازاقتىڭ ەرتەدەگى ءادىسى بويىنشا كەستە تىگۋدىڭ وتە كۇردەلى ەكەنىن ايتتى.
«بۇگىنگى كورمەگە ءوز قولدارىمەن جاساعان جۇمىستارىن قويعان بالالاردىڭ بارلىعىنا شەكسىز ريزاشىلىعىمدى بىلدىرەمىن. ويتكەنى, بۇيىمداردىڭ ءبارى دەرلىك ساپالى جاسالىپتى. بۇل جۇمىستاردىڭ بارىنەن ومىرگە دەگەن سۇيىسپەنشىلىك, كۇش-جىگەر, رۋح سەزىلەدى. وسى بيىكتىكتى تومەندەتپەڭدەر, مەن سەندەرگە سەنەمىن», – دەدى شاھار باسشىسى.
الماتىلىق بالالار ءۇشىن كوڭىلدى شارالارمەن باستالعان مەرەكەدە 5 مىڭ بالا قاتىسقان جاستار مۋزىكالىق وركەسترلەرى مەن انسامبلدەرىنىڭ شەرۋى ءوتتى. ال ورتالىق مادەني جانە دەمالىس ساياباعىندا بالالاردىڭ شىعارماشىلىق ۇجىمدارىنىڭ كونتسەرتتەرى قويىلدى. بۇل مادەني شاراعا «سەنىم»,«نارگيز», ء«مولدىر», «نەپوسەدى», «تاماشا», «سيۋرپريز», «ەركە ناز» بالالار توپتارى, ت.جۇرگەنوۆ اتىنداعى ونەر اكادەمياسىنىڭ ستۋدەنتتەرى قاتىستى, سونىمەن قاتار, «بوزتورعاي-2017» حالىقارالىق كونكۋرس جەڭىمپازدارىنىڭ گالا-كونتسەرتى ءوتتى.
بالالار ءۇشىن قۋىرشاقتار, انيماتورلار, تسيرك ارتيستەرى ءوز ونەرلەرىن ورتاعا سالدى, ەرتەگى كەيىپكەرلەرى, جاندى داۋىستاعى مۋزىكا كىشكەنتاي الماتىلىقتاردىڭ كوڭىلدەرىن كوتەردى. ساياباقتا «مەنىڭ سۇيىكتى قالام», «باقىتتى بالالىق شاق», «ەكسپو-2017», «قازاقستان رەسپۋبليكاسى» اتتى سۋرەت كورمەلەرى ۇيىمداستىرىلدى.
ميرا بايبەك,
«ەگەمەن قازاقستان»
الماتى
