سولاردىڭ ىشىندە اتالعان سالادا ءوز قىزمەتىنە ادال بەرىلگەن قىزمەتكەر, قاراعاندىلىق داۋرەن التاەۆ تا بار. داۋرەن قاسىمجان ۇلى قاراعاندى قالاسى ىشكى ىستەر ءبولىمى جاڭا مايقۇدىق پوليتسيا ءبولىمىنىڭ جەرگىلىكتى پوليتسيا قىزمەتى بولىمشەسىنىڭ ۋچاسكەلىك پوليتسيا ينسپەكتورى, پوليتسيا مايورى. ءوز قىزمەتىنە ادال بەرىلگەن داۋرەن قاسىمجان ۇلىنىڭ ىشكى ىستەر ورگاندارىندا قىزمەت اتقارىپ جۇرگەنىنە قازىرگى تاڭدا 20 جىل تولىپ وتىر.
داۋرەن قاسىمجان ۇلى 1976 جىلدىڭ كوكتەمىندە قاراعاندى وبلىسى, بۇرىنعى تالدى اۋدانى, قازىرگى ۋاقىتتا شىعىس قازاقستان وبلىسى, ابىرالى اۋدانى, العاباس اۋىلىندا دۇنيەگە كەلگەن. 1982 جىلدىڭ كۇزىندە العاشقى مەكتەپ تابالدىرىعىن اتتاپ, سول مەكتەپ قابىرعاسىندا 11 جىلدىق ءبىلىمىن الىپ شىعادى. مەكتەپ بىتىرگەن سوڭ, وتان الدىنداعى بورىشىن اتقارۋ ءۇشىن اسكەرگە اتتانادى. اسكەردەن كەيىن, 1996 جىلى ىشكى ىستەر ورگانىندا ەڭ العاش رەت ەڭبەك جولىن باستايدى. جول-پاترۋلدىك قىزمەتىندە ەڭبەك ەتىپ, ءوز ارىپتەستەرىنە سىيلى, بەدەلدى قىزمەتكەر اتانادى. سول جىلداردا جيناعان ءبىلىم مەن بىلىكتىلىگى ناتيجەسىندە كەزەكشى ءبولىمنىڭ جەدەل كەزەكشىسىنىڭ كومەكشىسى بولىپ لاۋازىمى اۋىسادى. ەڭبەك پەن وقۋدى قاتار الىپ جۇرگەن ول ب.بەيسەنوۆ اتىنداعى قاراعاندى جوعارى مەكتەبىنە سىرتتاي ءتۇسىپ, زاڭگەر ماماندىعىن الىپ شىعادى. وقۋىن 2005 جىلى اياقتاپ, وفيتسەر اتانادى. سودان باستاپ, ياعني 2006 جىلدان بەرى ۋچاسكەلىك پوليتسيا ينسپەكتورى قىزمەتىن ادال اتقارۋدا. وتباسىندا زايىبى ەكەۋى ءتورت بالا تاربيەلەپ وتىرعان ۇلگى تۇتار اكە. داۋرەن قاسىمجان ۇلى ءوزىنىڭ ىشكى ىستەر ورگانىنداعى قاجىرلى ەڭبەگىنىڭ ارقاسىندا وبلىستىق ءىىد جانە قالالىق ءىىب باسشىلىعى تاراپىنان بىرنەشە مارتە, سونداي-اق, ءمىنسىز قىزمەتى ءۇشىن II جانە III دارەجەلى مەدالدارمەن ماراپاتتالعانىن ايتا كەتكەن ءجون. ىشكى ىستەر مينيسترلىگى تاراپىنان 2006 جىلى «ۇزدىك قىزمەتى ءۇشىن» توسبەلگىسىمەن ماراپاتتالعان.
د.التاەۆتىڭ سوڭعى ۋاقىتتاعى ەرەن ەڭبەگىنىڭ بىردەن-ءبىر دالەلى رەتىندە قىزمەت اتقارۋ بارىسىندا ءبىر وتباسىنىڭ ءتورت بىردەي بالاسىن ورتتەن قۇتقارىپ الىپ شىققان ەرلىگىن ايتۋعا بولادى.
وقيعا بارىسىن قىسقاشا تارقاتاتىن بولساق, سول كۇنى ادەتتەگىدەي جۇمىس ۋاقىتىندا داۋرەن قاسىمجان ۇلىن مايقۇدىق ەلدى مەكەنىندە ءوز اۋماعىنداعى ۇيلەردىڭ بىرىنە جەتۋى تۋرالى حابارلاما تۇسەدى. ادەتتەگىدەي وتباسى جانجالى بولار دەپ, حابارلاما تۇسكەن مەكەن-جايعا جەتكەندە بەس قاباتتى ءۇيدىڭ بەسىنشى قاباتىنىڭ ورتەنىپ جاتقانىن كورەدى. ەس-تۇستەرىنەن ايىرىلا شۋلاعان كورشىلەر ءۇيدىڭ ىشىندە بالالاردىڭ بارىن ايتادى. سول ساتتە ءورتتىڭ قارا تۇتىنىنە قاراماستان, داۋرەن قاسىمجان ۇلى بىلەك سىبانا بالالاردى قۇتقارۋعا تىرىسادى. «پاتەرگە كىرسەم, تۇتىننەن باسقا ەشتەمە كورىنبەيدى ەكەن. دەرەۋ ءبىر ماتانى سۋعا مالىپ, بەتىمە وراپ, بولمەلەردىڭ ىشىنەن بالالاردى ىزدەدىم. قاراسام, ءتورت بالا كەرەۋەتتىڭ ۇستىندە ءبىرىنىڭ ۇستىنە ءبىرى ۇيمەلەپ جاتىپ قالعان. ەس-ءتۇسسىز. سول ساتتە, دەمىم دە تاۋسىلۋعا شاق قالدى... سوڭعى كۇشىمدى سارقىپ, بالالاردى يىعىما ارقالاپ سىرتقا الىپ شىقتىم. العاشىندا ەكەۋىن, كەيىن ەكى بالانى شىعاردىم. ەكىنشى رەت كىرەيىن دەگەنىمدە, ءورت ودان ءارى ءورشىپ, ماڭايلاتپايدى. سوندا دا ەش كىدىرمەستەن, جانىمدى شۇبەرەكتىڭ ۇشىنا ءتۇيىپ, بالالاردى قۇتقاردىم», – دەيدى د.التاەۆ سىناقتى ءساتتى ەسكە الىپ.
مىنە, قىزمەتىنە دەگەن وسىنداي ادالدىعىنىڭ ارقاسىندا, ءتورت ءسابيدىڭ ءومىرىن اجالدان اراشالاپ الىپ قالدى. قىرشىنىنان قيىلار ەدى, قايىرا ءومىر سىيلادى. حالقىمىز «ەر – ەڭبەگىمەن ەڭسەلى» دەپ بەكەر ايتپاسا كەرەك. ەندەشە, وسىنداي ەڭسەسى بيىك ازاماتتارىمىز امان بولىپ, ەلىنە ەڭبەگى ءسىڭسىن دەپ تىلەك بىلدىرەمىز. ورتامىزدا, داۋرەن التاەۆتاي قايسار جاندار كوپ بولعاي.
ميراس اسان,
«ەگەمەن قازاقستان»
قاراعاندى وبلىسى
