اتالعان ءىس-شاراعا قازاقستاننىڭ ۇلىبريتانياداعى ەلشىسى ەرلان ىدىرىسوۆ, قالا مەرى دجون پاركەر, حەمپشير گرافتىعىنىڭ جوعارى شەريفى مەري مونتاگۋ-سكوتت, بريتانيا پارلامەنتى قاۋىمدار پالاتاسىنىڭ مۇشەسى كەرولين نوۋكس, سونداي-اق گرافتىقتىڭ مادەني-تاريحي قاۋىمداستىقتارىنىڭ وكىلدەرى مەن رومزي قالاسىنىڭ تۇرعىندارى قاتىستى.
ءىس-شارا بارىسىندا ە.ىدىرىسوۆ قاتىسۋشىلارعا قازاقستان جايىندا جان-جاقتى اقپارات بەرىپ, پرەزيدەنت نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى مەن «قازاقستان-2050» ۇزاق مەرزىمدى ستراتەگياسى اياسىندا جۇرگىزىلىپ جاتقان ەكونوميكا جانە ساياسي جۇيەنى جاڭارتۋ جونىندەگى رەفورمالار, قوعامدىق سانانى جاڭعىرتۋ تۋراسىنداعى جاڭا باعدارلامامەن تانىستىردى.
ءوزىنىڭ سوزىندە ەلشى قازاقستاننىڭ ەرتە زاماننان كەلە جاتقان سان عاسىرلىق باي تاريحى بار مەملەكەت ەكەنىن اتاپ ءوتتى. «تاۋەلسىزدىك العان از ۋاقىت ىشىندە قازاقستان ۇلكەن جەتىستىكتەرگە قول جەتكىزىپ, الەمدەگى جىلدام دامىپ كەلە جاتقان ەكونوميكالاردىڭ بىرىنە جانە حالىقارالىق قوعامداستىقتىڭ سەنىمدى سەرىكتەسىنە اينالدى», دەدى ەلشى.
ە.ىدىرىسوۆ اتالعان ءىس-شارانىڭ قازاقستان مەن ۇلىبريتانيا اراسىنداعى ديپلوماتيالىق قاتىناستاردىڭ ورناتىلعانىنا 25 جىل تولعان جىلى وتكىزىلىپ وتىرعانىن ەرەكشە اتاپ ءوتتى. «بىرىككەن كورولدىك ءبىزدىڭ ەكونوميكامىزدىڭ التىنشى ەڭ ءىرى ينۆەستورى, ال قازاقستان بريتانيا ءۇشىن ساۋدا جانە ينۆەستيتسيالاردى كەڭەيتۋگە جانە دامىتۋعا قاجەتتى باستى مەملەكەتتەردىڭ ءبىرى», دەدى قازاقستاندىق ديپلومات.
ەكى ەل اراسىنداعى قارىم-قاتىناستاردىڭ جوعارى دەڭگەيدە ەكەندىگىن اتاپ وتكەن قازاقستان ەلشىسى بەلگىلى بريتاندىق زەرتتەۋشى جانە ساۋلەتشى توماس اتكينسوننىڭ ەلىمىزدىڭ مادەني مۇراسىنا قوسقان ماڭىزدى ۇلەسىنە توقتالدى. قازاقستانعا ءحىح عاسىردا كەلگەن بريتاندىق ساياحاتشى قازاق حالقىنىڭ ءومىرى تۋرالى كوپتەگەن سۋرەتتەر مەن جازبالار قالدىرعان.
كەشتە بريتاندىق جۋرناليست جانە جازۋشى نيك فيلدينگ ت.اتكينسون تۋرالى جان-جاقتى بايانداما جاساپ, قوناقتارعا ونىڭ قازاق جەرىنە جاساعان ساياحاتى جايىندا ايتىپ بەردى. سونىمەن بىرگە, بريتاندىق زەرتتەۋشىنىڭ ۇرپاقتارى ستيۆ جانە دجيل براۋن وزدەرىنىڭ بىلتىرعى جازدا ەلىمىزگە بارعانى جايىنداعى اسەرلەرىمەن ءبولىستى.
ءىس-شارا سوڭىندا قوناقتار «قازاقستان تابيعاتى» فوتوكورمەسىن تاماشالاۋعا مۇمكىندىك الدى.
