كەزدەسۋدە اۋىل شارۋاشىلىعى وندىرۋشىلەرى, سالالىق وداقتار مەن قاۋىمداستىقتار وكىلدەرى, قوعامدىق كەڭەس مۇشەلەرى, ورتالىق جانە جەرگىلىكتى اتقارۋشى ورگانداردىڭ وكىلدەرى قاتىستى.
جيىن بارىسىندا مينيستر اۋىل شارۋاشىلىعى سالاسىنىڭ 2016 جىلداعى دامۋ قورىتىندىلارىن اڭگىمەلەپ, ۆەدومستۆانىڭ الدىندا تۇرعان جاڭا مىندەتتەردى تىزبەلەدى.
ونىڭ حابارلاۋىنشا, وتكەن جىل ەكونوميكانىڭ اگرارلىق سەكتورى ءۇشىن اسا تابىستى جىل بولدى. ايتالىق, اۋىل شارۋاشىلىعىنىڭ جالپى ءونىم كولەمى 2016 جىلى 3,6 ترلن تەڭگەنى قۇرادى, بۇل – الدىڭعى جىلدىڭ دەڭگەيىنەن 5,5 پايىزعا جوعارى. ال ءوندىرىس كولەمىنىڭ ءوسىمىن سوڭعى 10 جىلدا العاش رەت بارلىق وبلىستار قامتاماسىز ەتىپ وتىر.
ۆەدومستۆا باسشىسى ەسەپتىك كەزدەسۋىندە اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار كولەمىنىڭ 1,5 ەسەگە وسكەنىن ايتتى.
مىسالى, پاۆلودار, قىزىلوردا, جامبىل, باتىس قازاقستان, اقمولا وبلىستارىندا اۋىل شارۋاشىلىعىنا سالىنعان ينۆەستيتسيالار كولەمى 2 ەسەگە ءوستى. ەسەپتىك كەزدەسۋدە سۋبسيديانىڭ 65 ءتۇرى قايتا قارالىپ, ناتيجەسىندە 11 ءتيىمسىز ءتۇرى الىنىپ تاستالعاندىعى ايتىلدى.
سونداي-اق, اۋىل شارۋاشىلىعى كووپەراتسيالارىن قولداۋ ءۇشىن بيىلعى جىلى 52 ملرد. تەڭگە ءبولىندى. اعىمداعى جىلى 326 كووپەراتيۆ قۇرۋ جوسپارلانعان بولسا, ەندى ونىڭ سانىن 467-گە جەتكىزۋ جوسپارلانىپ وتىر.
«ەلباسى جاڭا جولداۋىندا اگروونەركاسىپتىك كەشەندى باسىمدىق بەرىلگەن سالا رەتىندە بىرنەشە مارتە اتاپ ءوتتى. ياعني, اگرارلىق سەكتور ەل ەكونوميكاسىنىڭ درايۆەرىنە اينالۋعا ءتيىس. اگروونەركاسىپتىڭ ەل ەكونوميكاسىنىڭ جاڭا قوزعاۋشى كۇشى بولىپ قالىپتاسۋىنا بايلانىستى اۋىل شارۋاشىلىعى كووپەراتيۆتەرى زور مانگە يە. ويتكەنى, وندا اگرارلىق سالانى جانە اۋىلداردى دامىتۋدىڭ ۇلكەن الەۋەتى بار. كووپەراتسيا – بۇل اۋىلدىڭ بولاشاعى», - دەدى ا.مىرزاحمەتوۆ.
ەسەپ بەرۋ كەزدەسۋىندە مينيستر تۇرعىنداردى قىزىقتىرعان بارلىق سۇراقتارعا جاۋاپ بەردى. جيىن تىكەلەي ونلاين كورسەتىلىمدە تاراتىلىپ وتىردى.
ميراس اسان,
«ەگەمەن قازاقستان»
قاراعاندى وبلىسى
