پالاتا 2015 جىلعى 8 قىركۇيەكتەگى «تابيعي تەرىدەن جاسالعان كيىم زاتتارى, كيىمگە كەرەك-جاراقتار جانە وزگە دە بۇيىمدار» تاۋار پوزيتسياسى بويىنشا تاۋارلاردى باقىلاۋ (يدەنتيفيكاتسيالاۋ) بەلگىلەرىمەن تاڭبالاۋدى ەنگىزۋ جونىندەگى پيلوتتىق جوبانى 2015-2016 جىلدارى ىسكە اسىرۋ تۋرالى كەلىسىمنىڭ قولدانىلۋ مەرزىمىن ۇزارتۋ جونىندەگى حاتتامانى راتيفيكاتسيالادى.
2017 جىلى پيلوتتىق جوبا ناتيجەلەرىنە تالداۋ جۇرگىزۋ قاجەتتىگىنە بايلانىستى كەلىسىمنىڭ قولدانىلۋ مەرزىمىن 2018 جىلدىڭ 31 جەلتوقسانىنا دەيىن ۇزارتىلاتىن بولدى.
سونداي-اق سەناتورلار قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى (جاي وپەراتسيالار) (واوەى 1 جانە 6-دالىزدەرىن قوساتىن «اقتوبە – ماقات» اۆتوموبيل جولىن رەكونسترۋكتسيالاۋ جونىندەگى جوبا) راتيفيكاتسيالادى.
2016 جىلعى 7 جەلتوقساندا استانادا قول قويىلعان كەلىسىم «اقتوبە – ماقات» اۆتوموبيل جولىن رەكونسترۋكتسيالاۋدى قارجىلاندىرۋعا 240 300 مىڭ اقش دوللارى مولشەرىندە قارىز بەرۋدى كوزدەيدى. رەسپۋبليكالىق بيۋدجەتتەن قارىزدى بىرلەسىپ قارجىلاندىرۋعا 32 765 مىڭ اقش دوللارى بولىنەدى.
قارىز 5 جىلدىق جەڭىلدىكتى كەزەڭدى قوسا العاندا, 18 جىل مەرزىمگە بەرىلەدى. قارىزعا قىزمەت كورسەتۋدى جانە وتەۋدى رەسپۋبليكالىق بيۋدجەت قاراجاتى ەسەبىنەن ەلىمىزدىڭ قارجى مينيسترلىگى جۇزەگە اسىراتىن بولادى. سەناتتىڭ قارجى جانە بيۋدجەت كوميتەتىنىڭ مۇشەسى ەربولات مۇقاەۆ بۇل زاڭنىڭ ماڭىزدىلىعىن ايتا كەلىپ, ۇكىمەتتىڭ نازارىن جولداردىڭ بويىندا دەمالاتىن ورىندار, ۋاقىتشا كولىك توقتاۋ الاڭدارى, تاماقتانۋ, ساۋدا-ساتتىق پۋنكتەرى, تەحنيكالىق قىزمەت كورسەتۋ ستانتسيالارى, قالالاردىڭ كىرەبەرىسىندە كولىك جۋ پۋنكتەرى, اۆاريالىق شاقىرۋ بايلانىسى, جولدار بويىنداعى ەلدى مەكەندەردىڭ تۇسىندا جول جاعاسىنداعى بيزنەس مۇلدەم جوقتىڭ قاسى ەكەندىگىنە اۋداردى. سەناتوردىڭ پىكىرىنشە, مۇنداي قادامدار جۇزەگە اسىرىلسا حالىقارالىق ترانزيتتىك باعىتتىڭ باسەكەگە قابىلەتتىلىگىن ارتتىرۋعا سەپتىگىن تيگىزەدى.
سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكىنشى وقىلىمدا قاراپ قابىلدادى.
بۇل قۇجات بيولوگيالىق ارالۋاندىقتى ساقتاۋ ءۇشىن ەكونوميكالىق, الەۋمەتتىك, ۇيىمداستىرۋشىلىق جانە وزگە دە جاعدايلاردى جاساۋعا باعىتتالعان. اتاپ ايتقاندا, ورمان جانە اڭ اۋلاۋ شارۋاشىلىعى, ەرەكشە قورعالاتىن تابيعي اۋماقتار سالاسىنداعى قولدانىستاعى زاڭناماعا, سونداي-اق ەكولوگيالىق جانە وزگە دە ارالاس زاڭناماعا تۇزەتۋلەر ەنگىزۋ كوزدەلىپ وتىر.
زاڭدا جەكەلەگەن باپتار ورماندى پايدالانۋ, بالىق شارۋاشىلىعى قىزمەتى, جانۋارلار دۇنيەسى وبەكتىلەرىن جاساندى ءوسىرۋدى, جانۋارلاردى ەلىمىزگە اكەلۋ جانە اكەتۋ ماسەلەلەرىن قاراستىرادى. مەملەكەتتىك ۇلتتىق پاركتەر مەن ولاردىڭ قورعالاتىن ايماقتارىنىڭ اۋماقتارىن پايدالانۋ ءتارتىبى ناقتىلانىپ, بيوسفەرالىق رەزەرۆاتتاردىڭ قۇقىقتىق ءتارتىبى بەلگىلەنەدى.
زاڭ 2019 جىلعى 1 قاڭتاردان باستاپ ورمان شارۋاشىلىعى مەن ەرەكشە قورعالاتىن تابيعي اۋماقتار قىزمەتكەرلەرىنىڭ لاۋازىمدىق ەڭبەكاقىلارىن 25 پايىزعا جوعارىلاتۋدى, سونداي-اق ولارعا مال جايۋ مەن ءشوپ شابۋ ءۇشىن جەر ۋچاسكەلەرىن بەرۋدى كوزدەيدى.
وتىرىس بارىسىندا سەناتورلار ساۋالدارى جولداندى. سەناتورلار: سەرىك اقىلباي – تۇزەتۋ مەكەمەلەرى قىزمەتكەرلەرىنىڭ جالاقىلارىن كوتەرۋگە قاتىستى, ۆلاديمير رەدكاكاشين – مەكتەپ بىتىرۋشىلەر شارالارىنا اقشا جيناۋعا بايلانىستى; جابال ەرعاليەۆ – كەڭەس وداعىنىڭ باتىرى مالىك عابدۋلليننىڭ مەرەيتويى وتكەنىمەن, دەپۋتاتتىق ساۋال ارقىلى ۇكىمەتكە جاسالعان ۇسىنىستىڭ اياقسىز قالعانى جونىندە دەپۋتاتتىق ساۋالدارىن جولدادى.
