«قازاقستاننىڭ ەڭبەك سىڭىرگەن قايراتكەرى» ءسۇيىنباي قازباەۆتىڭ جەتەكشىلىگىندەگى پرەزيدەنتتىك وركەستردىڭ «بيگ بەند» ءانسامبلى حاباروۆسك جەرىندە العاش رەت ونەر كورسەتۋدە.
رەسەيدىڭ قيىر شىعىستاعى استاناسىنىڭ تۇرعىندارى ءۇشىن قازاقساندىق اسكەري مۋزىكانتتار ارنايى باعدارلاما دايىندادى. انسامبل رەپەرتۋارىندا الەمدىك كلاسسيكالىق دجاز اندەرىمەن قاتار, وتاندىق كومپوزيتورلاردىڭ شىعارمالارى دا بار. سونىڭ ىشىندە اسىرەسە, پرەزيدەنتتىك وركەستردىڭ قۇرامىنداعى مۋزىكانتتاردىڭ ءتول تۋىندىلارىنا باسا نازار اۋدارىلعان.
«بيگ بەند» مۋزىكالىق ۇجىمى حاباروۆسك تۇرعىندارىن الەمدىك دجاز مايتالماندارى بيللي سترەيحوردتتىڭ «تake the A train», فرەنك سيناترانىڭ «May Way» جانە لارا فابياننىڭ «Je t’aime» اندەرىن سوليستتەر الىبەك ءىزباساروۆ پەن گۇلسىم مىرزابەكوۆانىڭ وزىندىك ەرەكشە ورىنداۋ مانەرلەرىمەن تاڭ قالدىردى.
پرەزيدەنتتىك وركەستردىڭ باستىعى, پولكوۆنيك تالعات بەردىعۇلوۆتىڭ وسى فەستيۆالگە ارنايى جازعان «امۋر جاعاسىندا» دەپ اتالاتىن كومپوزيتسياسى زالدا وتىرعان كورەرمەننىڭ ءار قايسىسىن تەبىرەنتكەنى انىق. سونداي-اق, كورەرمەننىڭ ەرەكشە ىقىلاسىنا بولەنگەن شىعارمالاردىڭ قاتارىندا پرەزيدەنتتىك وركەستردىڭ ءسوليسى ولجاس سۇلەيمەنوۆتىڭ اۆتورلىعىمەن ءارى جەكە دومبىرامەن ورىندۋىنداعى «شىعىس-باتىس» تۋىندىسى مەن جاندوس مۇحتاروۆتىڭ « ۇلى دالا» كۇيلەرى بولدى. دومبىرانىڭ ۇنىمەن شىققان ۇلتتىق بولمىسىمىزدى حالىقارالىق كونكۋرستاردىڭ لاۋرەاتى, ءبيشى اسەل الىبەكوۆا ۇلتتىق بيمەن ارلەي ءتۇستى.
«امۋر تولقىندارى» اتتى VI حالىقارالىق اسكەري-مۋزىكالىق فەستيۆالگە قاتىسۋشى وزگە دە شىعارماشىلىق ۇجىمداردان قازاقستاندىق مۋزىكانتتاردىڭ ونەرى جان-جاقتىلىعىمەن, ورىنداۋ مانەرلەرىندەگى جاڭاشىلدىقپەن جانە كەز-كەلگەن مۋزىكالىق اسپاپتا شەبەر ويناۋلارىمەن ەرەكشەلەنىپ تۇرعانى اقيقات. بۇعان دالەل, كونتسەرت بارىسىنداعى كورەرمەن قاۋىمنىڭ ىستىق ىقىلاستارى مەن مۋزىكانتتارعا بىلدىرگەن جىلى لەبىزدەرى.
ادرەي گرۋدنەۆ, شىعىس اسكەري ايماق شتابىنىڭ اسكەري وركەسترىنىڭ جانە «بوەۆوە براتستۆو» ەسترادالىق-كونتسەرتتىك ءانسامبلىنىڭ ء سوليسى: «رۋحاني تۇرعىدان ۇلكەن لياززات الدىم. ۇجىم جوعارى پروفەسسيونالدىق دەڭگەيدە جۇمىس ىستەيدى. وركەستر ءۇنى مۋزىكا تىلىمەن ايتقاندا نازىك, ءارى ناقتى, كەرەمەت ۇندەستىكتە شىعادى. اسىرەسە, ۆوكاليست سوليستتەر گۇلسىم مىرزابەكوۆا مەن الىبەك ءىزباساروۆتىڭ ونەرلەرىنە ريزا بولدىم. ترۋبا مەن گيتارادا جەكە پارتيانى ورىنداعان مۋزىكانتتاردىڭ دا ونەرىنە باس يەمىن. جالپى, حاباروۆسك تۇرعىندارى دجازدى وتە جاقسى كورەدى. سوندىقتان, قازاقستاندىق ۇجىم رەپەرتۋار تاڭداۋدا ەش جاڭىلمادى دەپ ايتۋعا تولىق نەگىز بار.»
كيمونكو نادەجدا, حاباروۆسك ايماعىنىڭ مادەنيەت مينيسترلىگىنىڭ ءداستۇرلى مادەنيەت ءبولىمىنىڭ باسشىسى, فەستيۆال ۇيىمداستىرۋشىسى: « «بيگ بەند» ۇجىمىنىڭ ارقاسىندا ءبىز پرەزيدەنتتىك وركەستردىڭ سانقىرلىلىعىمەن, رەپەرتۋاردىڭ اۋقىمدىلىعىمەن تانىستىق. ءبىز ءۇشىن سىزدەر بۇگىن ۇمىتىلۋعا جاقىن قالعان الەمدىك دجاز كلاسسيكاسىنىڭ تۋىندىلارىن قايتا جاڭعىرتىپ, قازاق حالقىنىڭ ءداستۇرلى مۋزىكاسىن دومبىرا ارقىلى پاش ەتتىڭىزدەر. ولجاس سۇلەيمەنوۆ دومبىرادا شەبەر ويناۋىمەن تاڭ قالدىردى. حالىقتىق ىستىق ىقىلاس بىلدىرۋىنە قاراعاندا ەكى ەل اراسىنداعى مادەني بايلانىس نىعايىپ, مادەني ديالوگتىڭ ءساتتى شىققاندىعىنا كوز جەتكىزۋگە بولادى. ءار مۋزىكالىق شىعارمانى كورەرمەن ەرەكشە ىلتيپاپتپەن جىلى قابىلدادى. ونىڭ دالەلى رەتىندە سوڭعى «نۇر استانا» ءانى ورىندالىپ جاتقان ساتتە ولاردىڭ ۇيالى تەلەفوندارىنىڭ جارىقتارىن قوسۋپ, قولداۋ بىلدىرگەندەرىنەن اڭقارۋعا بولادى.».
يرينا, كورەرمەن: «ماعان, حاباروۆسك تۇرعىنى رەتىندە قازاقستاننان كەلگەن قوناقتاردىڭ ەرەكشە دايىندىقپەن كەلگەندىگى ۇلكەن اسەر ەتتى. اسىرەسە, «امۋر جاعاسىنداعى» ءانى وتە قاتتى ۇنادى. سونداي-اق, دومبىرانىڭ ۇنىنە تەبىرەنىپ, قازاق حالقىنىڭ مۋزىكالىق داستۇرىمەن تانىستىق. ءبىز ءۇشىن قالا كۇنى مەرەكەسىنە وتە كەرەمەت سىيلىق جاساعاندارىڭىزعا العىسىمدى بىلدىرەمىن.»
