ەڭسەلى ەل ەكونوميكاسىنىڭ دامۋى, ارينە, كاسىپكەرلىك سالاسىمەن تىعىز بايلانىستى. بۇگىنگى كۇنى وبلىس كولەمىندە شاعىن جانە ورتا بيزنەستى دامىتۋ قازاقستان رەسپۋبليكاسى پرەزيدەنتىنىڭ جولداۋىنان تۋىنداعان 2010-2014 جىلدارعا ارنالعان مەملەكەتتىك ۇدەمەلى يندۋستريالىق-يننوۆاتسيالىق دامۋ, «بيزنەستىڭ جول كارتاسى-2020», ۇكىمەتتىڭ «2010-2014 جىلدارعا ارنالعان قازاقستاندىق قامتۋدى ارتتىرۋ جونىندەگى», جاڭا كەدەن وداعى بيزنەستى جۇرگىزۋدە اكىمشىلىك كەدەرگىلەردى ازايتۋ, «جۇمىسپەن قامتۋ-2020», ت.ب. باعدارلامالار, ءىس-شارالار اياسىندا جۇرگىزىلۋدە.
ەلباسىنىڭ تاپسىرماسى بويىنشا ايماقتا ءجۇزەگە اسىرىلىپ جاتقان يندۋستريالىق-يننوۆاتسيالىق جوبالاردىڭ ماڭىزى ەرەكشە. 2010 جىلى جالپى سوماسى 26,0 ميلليارد تەڭگەنى قۇرايتىن 11 جوبا ىسكە قوسىلىپ, جاڭادان 401 جۇمىس ورنى اشىلسا, تاياۋداعى جىلدارى وبلىس وڭىرىندە 54 جوبا ءجۇزەگە اسىرىلادى. قازىردىڭ وزىندە 22 جوبا قولعا الىنىپ, قازىعى قاعىلىپ, كىرپىشى قالانىپ جاتىر.
شاعىن جانە ورتا بيزنەسكە ءبىردەن-ءبىر ۇلكەن كومەك كورسەتىپ, جول اشىپ وتىرعان «بيزنەستىڭ جول كارتاسى-2020» باعدارلاماسى اياسىندا ءبىزدىڭ وبلىسقا رەسپۋبليكالىق بيۋدجەتتەن 3,0 ميلليارد تەڭگەدەن استام قارجى ءبولىندى.
وسىنداي كومەككە يە بولعان جوبالاردىڭ ءبىرى – ساۋىقتىرۋ كەشەنىن سالعان (جابىق باسسەين مەن فيتنەس ورتالىعى) «تەمىرحان» جشس ەكەنىن ايتا كەتكەن ابزال. ەسكى عيماراتتىڭ ورنىنا 300 ورىندىق بالاباقشا سالعان «سىمبات ويل», تەمىر-بەتون ونىمدەرى ءوندىرىسىن كەڭەيتۋگە كىرىسكەن «ادەمجان» كومپانيالارىنىڭ دا ەڭبەگى ەرەن. سونداي-اق, بۇل باعدارلامانىڭ باسقا دا مۇمكىندىكتەرى ارقىلى كاسىپكەرلەرىمىزگە سەرۆيستىك قولداۋ قىزمەتتەرى تەگىن كورسەتىلۋدە, «نازارباەۆ ۋنيۆەرسيتەتى» بازاسىندا كاسىپكەرلەردىڭ بىلىكتىلىگى ارتتىرىلۋدا.
سونىمەن قاتار, «ءوندىرىستىك ينفراقۇرىلىمدى دامىتۋ» باعىتى بويىنشا بىلتىردان باستاپ كاسىپكەرلەرىمىز ءۇشىن ماڭىزدى بولىپ تابىلاتىن ءونەركاسىپ الاڭى, يندۋستريالىق ايماق جانە «قامباش دەمالىس» ايماعى ۇيىمداستىرىلىپ جاتىر.
مەملەكەت تاراپىنان كورسەتىلگەن قامقورلىققا بيزنەس وكىلدەرى جاۋاپ رەتىندە الەۋمەتتىك جاۋاپكەرشىلىكتى ارتتىرۋ باعىتىنداعى ءىس-شارالاردى بەلسەنە ۇيىمداستىرۋدا. جىل سايىنعى وتكىزىلەتىن قايىرىمدىلىق اكتسيالارى, «سىر مەيىرىمى», «جۇرەك جىلۋى», مەكتەپ ءجارمەڭكەسى, باعانى تۇراقتاندىرۋ باعىتىنداعى ءىس-شارالاردا, ءتىپتى باسقا وبلىستاردا بولعان اپاتتارعا دا ءوز قامقورلىقتارىن بەلسەنە كورسەتىپ, وبلىس ەكونوميكاسىن دامىتۋعا قوماقتى ۇلەس قوسىپ وتىر.
قازاقستان رەسپۋبليكاسى تاۋەلسىزدىگىنىڭ 20 جىلدىعى قارساڭىندا ىنتىماعى جاراسقان ەلىمىزگە تىنىشتىق, بەرەكە-بىرلىك پەن دامۋ جولىندا بيىك بەلەستەردەن كورىنە بەرۋىنە تىلەكتەستىك بىلدىرەمىن.
الماس تۇرتاەۆ, قازاقستاننىڭ «اتامەكەن» ۇلتتىق ەكونوميكالىق پالاتاسى قىزىلوردا فيليالىنىڭ ديرەكتورى.
