قازاقستان فۋتبول فەدەراتسياسى فۋتبولدان 2018 جىلعى الەم چەمپيوناتىنىڭ ىرىكتەۋ تۋرنيرىندەگى قازاقستان مەن دانيا قۇرامالارى اراسىنداعى ويىننىڭ بيلەتتەرى ونلاين-ساتىلىمعا شىققانىن حابارلايدى.
بيلەتتەردى www.ticketon.kz, zakazbiletov.kz جانە www.kff.kz سايتتارىنان ساتىپ الۋعا بولادى.
ال, ورتالىق ستاديوننىڭ كاسساسىندا بيلەتتەر 25 مامىردان باستاپ ساتىلىپ جاتىر.
قازاقستان-دانيا ماچتى تۋرالى قىزىقتى دەرەكتەر
فۋتبولدان قازاقستان ۇلتتىق قۇراماسى 2018 جىلعى الەم چەمپيوناتىنىڭ ىرىكتەۋ تۋرنيرىندە ءوز الاڭىندا ءالى ەشبىر قۇرامادان جەڭىلگەن جوق. «استانا ارەنا» ستاديونىندا وتكەن ەكى ويىن تەڭ اياقتالدى - 2:2 (پولشا) جانە 0:0 (رۋمىنيا).
قازاقستان ۇلتتىق قۇراماسى تۋرنير كەستەسىندە سوڭعى ورىندا ورنالاسقانىمەن 2018 جىلعى الەم چەمپيوناتىنا شىعۋعا مۇمكىندىگى بار.
ۇلتتىق قۇراما ويىنشىلارى ەكى جىلدان كەيىن الماتىنىڭ ورتالىق ستاديونىندا قايتا ويناماق. بۇل الاڭدا فۋتبولشىلارىمىز سوڭعى ويىنىن 2015 جىلى تۇركيا قۇراماسىنا قارسى وتكىزىپ, 0-1 ەسەبىمەن ۇتىلعان. الداعى ويىندا دانيا قۇراماسىنىڭ كوشباسشىسى - كريستيان ەريكسەن. ول 2010 جىلى وڭتۇستىك افريكا رەسپۋبليكاسىندا وتكەن الەم چەمپيوناتىندا ەڭ جاس ويىنشى اتاندى.
