«ءال كايدا» ۇيىمىنىڭ مۇشەلەرى وزدەرىنىڭ وپات بولعان كوسەمى ۋساما بەن لادەننىڭ بەينەۇندەۋىن تاراتقان.
ۇندەۋدە باتىستىڭ تاياۋ ۋاقىتتاردا كۇيرەۋگە ۇشىرايتىنى, ال اقش-تىڭ يسلام الەمىنە قارسى تۇرۋدا جەڭىلىسكە جاقىن ەكەنىن مويىنداۋعا كۇشى جەتپەي وتىرعانى ايتىلعان. سونىمەن بىرگە وندا «اراب كوكتەمى» دەگەن اتاۋ العان وقيعالاردىڭ «ءال كايدانىڭ» قولىمەن جاسالىپ وتىرعانى دا اتاپ كورسەتىلگەن.
تاعى دا اتىس باستالدى
يەمەننىڭ استاناسى سانادا ۇكىمەت اسكەرلەرى مەن وپپوزيتسيا كۇشتەرى اراسىندا تاعى دا اتىس باستالدى.
رەجىمگە قارسى توپتىڭ باس الاڭدا تۇرعىزعان پالاتكالى لاگەرىنە ەكى سنارياد كەلىپ تۇسكەن. الدىن-الا مالىمەتتەر بويىنشا, ەكى ادام قازا تاۋىپ, تاعى بەس ادام جاراقاتتانعان كورىنەدى. ايتا كەتۋ كەرەك, وسىنىڭ الدىندا عانا يەمەن ارمياسى مەن وپپوزيتسيا كۇش قولدانباۋ تۋرالى كەلىسىمگە كەلدى دەپ حابارلانعان بولاتىن.
تۇركيا كيپرگە اسكەر جونەلتپەك
انكارا حالىقارالىق قوعامداستىق مويىنداماعان سولتۇستىك كيپر تۇرىك رەسپۋبليكاسىمەن بىرگە شىعىس جەرورتا تەڭىزىندە مۇناي مەن گاز ءوندىرۋدى باستاماق.
بۇل ءىس-قيمىل كيپر رەسپۋبليكاسىنىڭ ارالداعى شەلفتى تالداۋ جۇمىستارىنا جاۋاپ رەتىندە جاسالىپ وتىر. كيپر رەسپۋبليكاسى ءوزىنىڭ عانا ەكونوميكالىق ايماعى دەپ سانايتىن اۋدانعا قاتىستى ءبىزدىڭ كوزقاراستارىمىز ءارتۇرلى, دەپ اتاپ كورسەتكەن تۇركيا پرەمەر-ءمينيسترى ت.ەردوعان. ءبىز بۇرىن ولارعا اتالعان ەكونوميكالىق اۋماقتىڭ داۋلى ەكەنىن, وندا بۇل سياقتى قادامدار جاساۋ دۇرىس ەمەس ەكەنىن ايتقان بولاتىنبىز. سونداي-اق, ول احۋالدى باقىلاۋ ءۇشىن ارالعا اسكەري-تەڭىز كۇشتەرى مەن اسكەري اۆياتسيانىڭ جىبەرىلەتىنىن دە جەتكىزگەن.
«ازشىلىق» تا اسكەري قىزمەت اتقارادى
اقش-تا وزدەرىن «ازشىلىق» سانايتىن گوموسەكسۋالدار مەن لەسبيانكالاردىڭ قارۋلى كۇشتەر قاتارىندا قىزمەت ەتۋىنە شەكتەۋ قويۋدىڭ كۇشىن جوياتىن زاڭ كۇشىنە ەندى.
پرەزيدەنت باراك وباما قول قويعان زاڭنىڭ ءمانى گوموسەكسۋالدار مەن لەسبيانكالاردىڭ اسكەري قىزمەت اتقارۋىنا رۇقسات بەرۋگە, ولاردىڭ وزدەرى تۋرالى شىندىقتى ايتپاۋلارىنا, ال اسكەري باسشىلىقتىڭ ول جونىندە سۇراق قويماۋىنا كەلىپ سايادى.
بەيبىت تۇرعىندار قازا بولۋدا
«فرانس پرەسس» اگەنتتىگى باني ۆاليد اۋدانىندا كاددافيگە ادال وتريادتار مەن جاڭا بيلىك اسكەرىنىڭ اراسىندا كەسكىلەسكەن ۇرىس ءجۇرىپ جاتقانىن حابارلاعان.
توڭكەرىسشىلەر العاشىندا باني ۆاليدقا كىرگەنىمەن, كەيىن كاددافي كۇشتەرىنىڭ تەگەۋرىنىنە شىداماي, قالانى تاستاپ شىعۋعا ءماجبۇر بولعان. ال كۋاگەرلەر بولسا, سيرت قالاسىندا ناتو اسكەرلەرىنىڭ بومبالاۋىنان 300-دەن استام بەيبىت تۇرعىننىڭ قازا بولعانىن, 500 پاتەردىڭ قيراعانىن ايتقان.
جاپوندار ەلەكتردەن باس تارتۋعا دايىن
جاپونداردىڭ جارتىسىنان استامى (ەرلەردىڭ 60 %-ى جانە ايەلدەردىڭ 70%-ى) وزدەرىنىڭ تۇرمىس دەڭگەيلەرىن ءتومەندەتە وتىرىپ, ەلەكتر پايدالانۋدى قىسقارتۋ جونىندە پىكىر بىلدىرگەن.
«ماينيتي» گازەتى جۇرگىزگەن ساۋالناما قورىتىندىسى وسىنداي ناتيجە كورسەتكەن كورىنەدى. سۇراۋ سالىنعانداردىڭ 60 پايىزى نەعۇرلىم ۇلكەن قاتەر توندىرەتىن رەاكتورلاردان باستاي وتىرىپ, ەلدەگى اەس-تەر سانىن قىسقارتۋ قاجەت دەپ اتاپ كورسەتكەن. ال 20 پايىزى اەس-تەر سانىن كوبەيتپەي-اق, قازىرگى بارلارىن عانا پايدالانا بەرۋ كەرەك دەگەن ۇستانىمدا بولعان.
گرۋزيانىڭ تالاپ-ارىزى قارالماق
ستراسبۋرگ قالاسىنداعى ەۋروپالىق سوتتىڭ جوعارعى پالاتاسى 22 قىركۇيەكتە گرۋزيانىڭ رەسەيگە قارسى بەرگەن تالاپ-ارىزىن قاراماق.
گرۋزيا تارابى رەسەيگە 2008 جىلعى تامىز سوعىسى كەزىندە ادام قۇقىقتارىن قورعاۋ جونىندەگى ەۋروپالىق كونۆەنتسيانىڭ 1,2,3,5 جانە 8-ءىنشى باپتارىن بۇزدى دەگەن ايىپ تاعىپ وتىر. ال رەسەي جاعى بولسا, تاعىلعان ايىپتار نەگىزسىز جانە دالەلسىز دەگەندى قايتالاۋدان تانباي كەلەدى.
مەركەل تۇركيانىڭ ەۋرووداققا وتۋىنە قارسى
گەرمانيا كانتسلەرى انگەلا مەركەل ءتۇركيانىڭ ەۋرووداققا وتۋىنە قارسى شىقتى, دەپ حابارلايدى Augsburg Allgemeine باسىلىمى.
وندا كەلتىرىلگەن مالىمەتتەر بويىنشا نەمىس ۇكىمەتىنىڭ باسشىسى تۇركيانىڭ ەۋرووداققا تولىققاندى مۇشە بولۋىنا قارسى, بىراق ول سونىمەن بىرگە انكارا مەن بەرليننىڭ ارىپتەستىگىنىڭ ماڭىزدى ەكەنىن دە اتاپ كورسەتكەن. ايتا كەتۋ كەرەك, ەو-عا مۇشەلىك جونىندەگى گەرمانيا مەن تۇركيا اراسىنداعى كەلىسسوزدەر انكارا مەن كيپر اراسىنداعى قارىم-قاتىناستاردىڭ شيەلەنىسۋى جاعدايىندا ءوتىپ وتىر.
ابباس ازىرگە ايتقانىندا تۇر
ارابتىڭ كوپتەگەن بۇقارالىق اقپارات قۇرالدارى نيۋ-يورككە كەلگەن پۇا باسشىسى ماحمۋد ابباستىڭ بۇۇ باس حاتشىسى پان گي مۋنمەن كەزدەسۋى جايىندا حابارلاۋدا.
ولاردىڭ جازۋلارىنا قاراعاندا, ماحمۋد ابباس پالەستينا مەملەكەتىن مويىنداۋ جونىندە قاۋىپسىزدىك كەڭەسىنە ۇسىنىس ءبىلدىرۋ نيەتىن ءالى وزگەرتپەگەن كورىنەدى. سونىمەن بىرگە وسى قادامعا بايلانىستى اقش تاراپىنان بەرىلەتىن قارجىلىق كومەك توقتاتىلاتىن بولسا, پالەستينا جاعدايىنىڭ قيىنداي تۇسەتىنى دە ايتىلۋدا.
عارىش قوقىسى قايدا قۇلايدى؟
سالماعى جارتى توننا بولاتىن عارىشتىق قوقىس جەرگە قاراي اسقان جىلدامدىقپەن جاقىنداپ كەلەدى.
ناسا ماماندارىنىڭ ايتۋلارىنشا, جۇمىس ىستەمەيتىن امەريكالىق سپۋتنيكتىڭ سىنىقتارىنىڭ جۇما كۇنى پلانەتامىزدىڭ ۇستىنە كەلىپ قۇلاۋى مۇمكىن. ماسەلە ونىڭ ءدال قاي جەرگە كەلىپ تۇسەتىنىندە بولىپ وتىر. ويتكەنى, ودان ادامدارعا كەلەر قاۋىپ وتە زور. ساراپشىلاردىڭ ءبىر بولىگى سولتۇستىك ەندىكتىڭ 57 گرادۋسى مەن وڭتۇستىك ەندىكتىڭ 57 گرادۋسىنا دەيىنگى ارالىقتا قۇلاۋى مۇمكىن دەگەندى ايتۋدا. ال ول سىنىقتار ماسكەۋ ماڭىنا قۇلايدى دەگەندى بىلدىرەدى ەكەن. بىراق, رەسەيلىك عارىش ماماندارى سىنىقتار ءۇندى مۇحيتى ايدىنىنا قۇلايدى دەپ حالىقتى تىنىشتاندىرعان كورىنەدى.
ينتەرنەت ماتەريالدارى نەگىزىندە ازىرلەندى.
