قوس بىردەي شارا ءوتتى

جۋىردا ەل تاۋەلسىزدىگىنىڭ 20 جىل­دى­عى­نا وراي استاناداعى ەجەلگى ءبىلىم وردا­سى­نىڭ ءبىرى سانالاتىن قازتۇتىنۋوداعىنىڭ ساۋدا-ەكونوميكالىق كوللەدجىندە قوس بىردەي يگى شارانىڭ تۇساۋى كەسىلدى. ونىڭ ءبىرى «قازاعىمنىڭ ءانى – قازىنام» اتتى ادەبي-سازدى كەش, ەكىنشىسى قازاقستان حالقى ءتىل­دەرىنىڭ ءحىىى قالالىق فەستيۆالى اياسىندا وتكىزگەن «ءتىل – تاۋەلسىزدىك تۇعىرى» اتتى ءتىل اپتالىعى. جيىندى كوللەدج ديرەكتورى مىرزابەك تورە­بەك ۇلى سالتاناتتى تۇردە اشىپ, كەش قوناقتارى مەملەكەتتىك سىيلىقتىڭ لاۋرەاتى, كورنەكتى جا­زۋشى دۇكەنباي دوسجان, م. ماقاتاەۆ اتىنداعى سىيلىقتىڭ يەگەرى, بەلگىلى اقىن نەسىپبەك ايت ۇلى سونداي-اق, سوناۋ ۇلىبريتانيادان تاجىريبە الما­سۋعا كەلگەن 8 كوللەدج باسشىلارىمەن تانىس­تى­رىپ, قاتىسۋشىلارعا ساتتىلىك تىلەدى. بۇل كەشتە كومەيىنە بۇلبۇل ۇيالاعان حالىق­ارالىق جانە رەسپۋبليكالىق بايقاۋلاردىڭ لاۋ­رەات­تارى, حالىق اندەرىن ورىنداۋشى شەبەرلەر ك.تۇلەمباەۆا, گ.سارينا, د.مۇقان سەكىلدى كۇمىس كو­مەي, جەزتاڭداي انشىلەر تىڭدارمان قاۋىمنىڭ دەلەبەسىن قوزدىرىپ, ءبىر قاناتتاندىرىپ تاستادى. ىستىق ىقىلاس-ىنتاسىن دۋ قول شاپالاعى ارقىلى بىلدىرگەن ءاربىر جاننىڭ كوڭىلدەرىنەن وسىلايشا كۇي توگىلىپ سالا بەردى. بەينەبىر تىلسىم قۇدى­رەت­تىڭ قۇشاعىنا ۇيىپ وتىرعانداي. انشەيىندە كۇبىر-شۋعا ۇلاساتىن زال ىشىندە سىلتىدەي تىنىشتىق ور­ناعان. ستۋدەنت جاستاردىڭ ءاربىرىنىڭ جۇرەگى «ءاندى سۇيسەڭ, مەنشە ءسۇي», دەپ وتىرعانداي سەزىلەدى. بۇل ارينە, قازاق ونەرىنە, حالىق انىنە دەگەن ۇلكەن قۇرمەت! ۇلتىمىزدىڭ ۇلى تۇلعالارى اباي, ەستاي, بالۋان شولاق, مۇحيت, ءبىرجان سال, نارتاي سەكىلدى اقىن-جى­راۋ­لارىمىزدىڭ اندەرىن شىرقاپ قانا قويماي, ولەڭ­نىڭ شىعۋ تاريحىنا ەگجەي-تەگجەي توقتالىپ ءوتۋ دە ۇمىت قالمادى. بۇل جونىندە اقىن نەسىپبەك اعامىز­دىڭ: «كوبىنەسە راديودا ورىنداۋشىنىڭ اتىن ايتا­دى دا, ءاندى شىعارعان ادام ۇمىت قالىپ جاتادى», – دەگەن ءسوزى بۇل جولى ەسكەرۋسىز قالماعان سياقتى. ءاننىڭ, كەشتىڭ اسەرى بويعا – قۋات, سەزىمگە شۋاق توكتى. راۋشان تاۋىرحانقىزى,  جۋرناليست.