باتىس قازاقستان وبلىسىنىڭ اكىمى التاي كولگىنوۆ ورال قالاسىنداعى نازارباەۆ زياتكەرلىك مەكتەبىندە بولىپ, اتالمىش ءبىلىم ورداسىنىڭ دامۋ باعىتى, شاكىرتتەرىنىڭ تابىسى مەن وزىق تاجىريبەنى تاراتۋ ماسەلەلەرى قوزعالعان قامقورشىلىق كەڭەسىنىڭ وتىرىسىنا قاتىستى, دەپ حابارلايدى نازارباەۆ زياتكەرلىك مەكتەبىنىڭ ءباسپاسوز قىزمەتى. سونداي-اق كەڭەس وتىرىسىنان كەيىن ءوڭىر باسشىسى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «كەيىپكەرگە 25 سۇراق» جوباسى اياسىندا جوعارى سىنىپ وقۋشىلارىمەن كەزدەستى.
بۇل جوبانىڭ ماقساتى - زياتكەرلەردى ەلگە جانە وڭىرگە تانىمال, ىسىمەن ۇلگى-ونەگە بولاتىن جاندارمەن كەزدەستىرۋ ارقىلى ولاردىڭ تۇلعالىق-كوشباسشىلىق قاسيەتتەرىن دامىتۋ.
ەركىن فورماتتاعى كەزدەسۋدە زياتكەرلەر التاي سەيدىر ۇلىنا وزدەرىن تولعاندىرعان ساۋالدارىن قويدى. كەزدەسۋ بارىسىندا كوشباسشىلىق قاسيەتتەردى دامىتۋ, سۇيىكتى كىتاپ جانە تۇلعا, شەتەلدە ءبىلىم العان جاستاردىڭ ەلىمىزگە قايتا ورالۋى جانە مەملەكەت الدىنداعى جاۋاپكەرشىلىك, سىن جانە ونىڭ تۇلعانى دامىتۋعا اسەرى تۋرالى اڭگىمە ءوربىدى.
