الماتىداعى «ءداستۇر» باسپاسىنان تاۋەلسىزدىككە ارنالعان ارقايسىسىنىڭ كولەمى 40 باسپا تاباقتان تۇراتىن ەكى بىردەي كىتاپ جارىققا شىقتى.
العاشقىسى – «تاۋەلسىزدىك تولعاۋى», ەكىنشىسى «حرانيتەلي سوكروۆەننوگو» دەپ اتالاتىن كىتاپتاردىڭ اۆتورى, كوركەمسوز شەبەرى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, ماحمۇد قاشقاري اتىنداعى «تۇرىك الەمىنە ءسىڭىرگەن اسا زور ەڭبەگى ءۇشىن» حالىقارالىق سىيلىقتىڭ لاۋرەاتى ءسابيت دوسانوۆ. «تاۋەلسىزدىك تولعاۋى» «بۇل وسىلاي بولعان» دەگەن دەرەكتى اڭگىمەمەن اشىلادى. اۆتور بۇل شىعارماسىندا پرەزيدەنت ن.ءا.نازارباەۆتىڭ باستاماسىمەن ومىرگە كەلگەن تمد جايلى بايىپتى باياندايدى. «كەمەڭگەرلىك قۇپياسى», «ۇلت باعىنا تۋعان ۇلى تۇلعا», «كورەگەندىكتىڭ تاعى ءبىر كوركەم كورىنىسى» اتتى شىعارمالاردا ەلباسىنىڭ كورەگەندىگى مەن حالىقتىڭ ەرەن ەڭبەگى ارقاسىندا تاۋەلسىزدىك جىلدارى ەلىمىز جەتكەن جەتىستىكتەر كوركەم وبراز, كەلىستى تىلمەن كەستەلەنگەن.
«حرانيتەلي سوكروۆەننوگو» كىتابىنا توپتاسقان «پرەزيدەنت زناەت چايانيا ليۋدەي», «تەرريتوريا ميرا ي سوگلاسيا», «كۋلتۋرا – ەتو پاسپورت ناتسي» دەپ تىزبەكتەلگەن كوكەيكەستى كوسەمسوزدەردە اۆتور تاۋەلسىزدىك جايلى تولىمدى وي تولعايدى.
قازاق, ورىس تىلدەرىندە جارىق كورگەن قوس كىتاپتاعى شىعارمالار – تاۋەلسىزدىك جىلدارىنىڭ كوركەم شەجىرەسى!
ايناش ەسالي,
«ەگەمەن قازاقستان»
