«التىن ادام» سىيلىعىن الدى

استانا قالاسى جاستار تەاترىنىڭ كوركەمدىك جەتەكشىسى ءارى باس رەجيسسەرى, قازاقستاننىڭ ەڭبەك سىڭىرگەن قايراتكەرى نۇرقانات جاقىپباي تەاتر ونەرىن دامىتۋعا قوسقان ەلەۋلى ۇلەسى ءۇشىن بيىلعى «التىن ادام» ۇلتتىق سىيلىعىن يەلەندى. رەجيسسەردىڭ جىل باسىنان بەرگى ەڭبەكتەرى مەن جەتىستىكتەرى كورەر­مەن­نىڭ ەسىندە. ايتالىق, ناۋرىز ايىندا حالىقارالىق تەاتر كۇنىنە وراي ۇيىمداستىرىلعان بايقاۋعا شەكسپيردىڭ «اساۋعا – تۇساۋ» كومەديا­سى­مەن قا­تىسىپ, «جىلدىڭ ۇزدىك رەجيسسەرى» اتا­لىمىن جەڭىپ العان-دى. ونىمەن قوسا, «ەڭلىكگۇل-2016» كاسىبي سىيلىعىن ەنشىلەدى. قىركۇيەك ايىندا تاۋەلسىز مەملەكەتتەر دوستاستىعىنىڭ 25 جىل­دىعىنا وراي بەلارۋس رەسپۋب­ليكاسىنىڭ برەست قالاسىندا وتكەن «بەلايا ۆەجا» ءححى حالىقارالىق تەاترلار فەستيۆالىنە ش.ايتماتوۆ پەن ءا.كەكىلباەۆتىڭ «شىڭعىسحان» سپەكتاكلىمەن قاتىستى. مۇندا دا ن.جاقىپبايدىڭ تۋىندىسى «ەڭ اسەرلى قويىلىم» اتاندى. وسى ايدا ەل تاۋەلسىزدىگىنىڭ 25 جىل­­دىعىنا وراي اقتوبە قالاسىندا قازاقستان دراما تەاترلارىنىڭ ءححىV رەسپۋبليكالىق فەستيۆالى وتكەن ەدى. ج.پيلو مەن و.شۋلتەزدىڭ «موتسارت» ميۋزيكلىمەن باق سىناعان رەجيسسەر «ەڭ ۇزدىك سپەكتاكل» جۇلدەسىن جەڭىپ الدى. قازان ايىندا تالدىقورعان قالاسىندا مادەنيەت جانە سپورت مينيسترلىگىنىڭ قولداۋىمەن «قازاقستان – ەۋرازيا جۇرەگى» اتتى VI ورتا ازيا مەملەكەتتەرى تەاترلارىنىڭ حالىق­ارا­لىق فەستيۆالىنە شەكسپيردىڭ «اساۋ­عا – تۇساۋ» كومەدياسىن الىپ بار­عان «التىن ادام» سىيلىعىنىڭ يەسى باس تۇعىردان كورىندى. اتالعان قويىلىمداردىڭ بارلىعىن كوپشىلىك جاستار تەاترىنىڭ ساحناسىنان تالانتتى ارتىستەردىڭ ورىنداۋىندا تاماشالاي الاتىندىعىن ايتا كەتكىمىز كەلەدى. اسحات رايقۇل, «ەگەمەن قازاقستان»