اۋىر اتلەتتەر سايىسىپ جاتىر

قىزىلوردادا ەكى كۇننەن بەرى اۋىر اتلەتيكادان ەرلەر مەن ايەلدەر اراسىندا قازاقستاننىڭ تۇڭعىش پرەزيدەنتى كۇنىنە ارنالعان كۋبوك سايىسى ءوتىپ جاتىر. وعان الماتى قالاسى مەن بارلىق وبلىستاردان 152 سپورتشىنىڭ باسىن بىرىكتىرگەن 15 كوماندا قاتىسۋدا. كەشەگە دەيىن ايەلدەردىڭ – 4, ەرلەردىڭ 2 سالماق دارەجەسى بويىنشا جۇلدەگەرلەر بەلگىلى بولدى.  ال 94 كيلوعا دەيىنگى سالماقتىڭ جەڭىمپازىنا يليا ءيليننىڭ ارنايى كۋبوگى مەن سەرتيفيكاتى تابىس ەتىلەدى. جارىستىڭ ءبىرىنشى كۇنى 48 كيلوعا دەيىنگىلەر اراسىندا الماتى وبلىسىنان كەلگەن يۋليا پوتاسوۆا قوسسايىستا 125 كگ (55+70) سالماقتى باعىندىرىپ, ءبىرىنشى ورىندى جەڭىپ الدى. ەكىنشى ورىنعا وسى وبلىستىڭ كەلەسى وكىلى – ناتاليا بەدريك, ءۇشىنشى ورىنعا جامبىلدىق اينۇر ابدىحالىقوۆا ورنالاستى. سونداي-اق, 53 كيلودا الماتى قالاسىنىڭ اتلەتى اسەل امانگەلدى 175 كگ (79+96) سالماقپەن الدىنا جان سالما­دى. كۇمىس مەدال  الماتى وبلى­سىنىڭ وكىلى الەكساندرا لاچكوۆاعا, قولا مەدال اقتوبەلىك اقمارال ۇرگەنىشباەۆاعا بۇيىردى. ەرلەر اراسىندا 56 كيلوعا دەيىنگى سالماقتىڭ باس جۇلدەسىن الماتى وبلىسىنىڭ ساڭلاعى يگور سون ەنشىلەدى. ول 235 كگ (105+130) ناتيجەسىمەن بارىنەن باسىم ءتۇستى. ەكىنشى ساتىعا الماتى قالاسىنىڭ وكىلى اسحات دىلداەۆ, ءۇشىنشى تۇعىرعا قىزىلوردالىق المات اسانحان ۇلى جايعاستى. جارىستىڭ ەكىنشى كۇنىندە ايەل­دەردىڭ 58 كگ سالماعىندا قوس­تانايلىق ساۋلە سادۋاقاسوۆا 183 كگ (83+100) ناتيجەسىمەن توپ جاردى. كەلەسى ەكى ورىندى شىعىس­قازاقستاندىقتار ليديا انۋفريەۆا مەن ءمادينا استاميروۆا الدى. بۇدان كەيىن 63 كگ سالماقتىڭ مىقتىسى بولىپ قىزىلوردالىق اسەم سادى­قوۆا تانىلدى. ول قوسسايىستا 195 كگ (85+110) سالماقتى ەركىن ەڭسەر­دى. ەكىنشى-ءۇشىنشى ورىندارعا شىعىس­قازاقستاندىق داريا پاۆلوۆا مەن الماتى قالاسىنىڭ وكىلى كريس­تينا كراحالەۆا كوتەرىلدى. ال ەرلەردىڭ 62 كيلوعا دەيىنگى سالما­عىندا قىزىلوردالىق ەربولات  جولا­مانوۆ ۇزدىك كورىندى. ول بۇل ءۇشىن جيىن­تىعىندا 263 كگ (117+146) سالماق­تى توبەسىنە تىك ۇستاپ تۇردى. جۇلدە­گەرلەر ۇشتىگىن الماتى قالاسىنىڭ اتلەتتەرى اناتولي ساۆەلەۆ پەن تيمۋر حاساروۆ تياناقتادى. جارىس 5 جەلتوقسان كۇنى مارەگە جەتەدى. لاۋرا شوڭعالوۆا قىزىلوردا