ساياسي شارالارعا تولى اپتا

قازاقستان سىرتقى ىستەر مينيسترلىگىنىڭ رەسمي وكىلى اسقار ابدراحمانوۆ جۋرناليستەرگە ارنالعان ءداستۇرلى اپتالىق بريفينگتە مەملەكەت باسشىسى نۇرسۇلتان نازارباەۆتىڭ بىرنەشە شەتەلگە ساپارى باستالعانىن حابارلادى. 19 قىركۇيەكتە فرانتسيا پرەزيدەنتى نيكوليا ساركوزيدىڭ شاقى­رۋى­مەن قازاقستان پرەزيدەنتى نۇر­سۇل­تان نا­زار­باەۆتىڭ پاريجگە جۇمىس ساپارى بولدى, دەدى بريفينگتە رەسمي وكىل. ەكى مەملەكەت باسشىسىنىڭ ارا­سىندا ءوت­كەن كەلىسسوزدەر بارى­سىندا «نازارباەۆ – ساركوزي» پرەزيدەنتتىك كوميس­سيا­نىڭ جۇمىسى, 2008 جىلى قابىل­دان­عان كەلىسىم-شارتقا نەگىزدەلەتىن ساياسي, ەكونوميكالىق, مادەني-گۋمانيتارلىق سالالارداعى سترا­تە­گيالىق ارىپتەس­تى­ك­تىڭ قازىرگى جاعدايى جانە كەلەشەگى قاراس­تى­رىل­دى.  بۇل تۋرالى ماتەريال گازەتتىڭ وسى ءنو­مىرىندە جان-جاقتى جازىل­عان­دىقتان, وعان كوپ توقتالماعاندى ءجون كوردىك. ال 20 قىركۇيەكتە قازاقستان پرەزيدەنتى نۇرسۇلتان نازارباەۆ بىرىككەن ۇلتتار ۇيىمى باس اسسامبلەياسىنىڭ 66-شى سەسسياسىنا قاتىسۋعا نيۋ-يورك­كە ساپارمەن بارادى, دەپ جال­عا­دى ءسوزىن ا.ابدراحمانوۆ. بۇۇ-عا مۇشە مەملەكەتتەر   سەسسيا بارىسىندا تاياۋ شىعىس پەن سولتۇستىك افريكاداعى احۋال جانە يزرايل-پالەستينا قارىم-قاتىناسىن رەتتەۋ ماسەلەلەرىن قاراس­تىراتىن بو­لادى. سونىمەن قاتار, يادرو­لىق قارۋدى تاراتپاۋ, دەنساۋلىق ساقتاۋ, ەكولوگيا, دىنارالىق ۇنقاتىسۋ جايى بىرقاتار پىكىرتالاس الاڭدارىندا تال­قى­لانادى دەپ كۇتىلۋدە. رەسمي وكىل وسى ساپار كەزىندە يادرولىق سىناقتارعا جاپپاي تىيىم سالۋ شارتىنىڭ كۇشىنە ەنۋىن ىلگەرىلەتۋ جونىندەگى كونفەرەنتسيا, جۇقپايتىن اۋرۋلاردىڭ الدىن الۋ مەن باقىلاۋ, تۇراقتى دامۋ مەن جۇتاڭ­شى­لىقتى جويۋ, شولگە اينالۋ, توپىراق قۇ­نارسىزدانۋى مەن قۇرعاقشىلىققا قار­سى  كۇرەس, بەيبىتشىلىك ءۇشىن ءدىن­ارا­لىق ىنتىماقتاستىق جونىندە  جوعارى دەڭگەيدەگى كەزدەسۋلەر وتكىزىلمەك ەكەنىن اتاپ ءوتتى. بۇۇ باس حاتشىسى پان گي مۋن جاھاندىق يادرولىق قارۋسىزدانۋ مەن تاراتپاۋ ۇدەرىسىنە قازاقستاننىڭ بىرەگەي ۇلەسىن ەسكەرە وتىرىپ, ياد­رولىق قاۋىپسىزدىك جونىندەگى 22 قىركۇيەكتە بولاتىن جوعارى دەڭ­گەيدەگى كەزدەسۋگە نۇرسۇلتان نا­زارباەۆتى قاتىسۋعا جانە ءسوز سويلەۋگە شاقىرىپتى. اتال­­عان كەزدەسۋگە اقش, رەسەي, فران­­تسيا, جاپونيا, برازيليا, ۋكراينا جانە كورەيا رەسپۋبليكاسى – جال­پى سانى سەگىز مەملەكەتتىڭ باسشى­لارى شاقىرتۋ الىپ وتىر ەكەن. جۋرناليستەر سىرتقى ساياسات ۆە­دومستۆوسىنىڭ رەسمي وكىلىنەن ساپار بارىسىندا نۇرسۇلتان نازارباەۆتىڭ بىرقاتار ەلدەردىڭ باسشىلارىمەن ەكى جاقتى كەزدەسۋلەر وتكىزەتىنى جوس­پار­لانىپ وتىرعانىن ەستىدى. پرەزيدەنت نۇرسۇلتان نازارباەۆتىڭ بىرىككەن ۇلتتار ۇيىمى باس اسسامبلەياسىنىڭ 66-شى سەسسياسىنا قاتىسۋى جانە جالپىساياسي پىكىرتالاس پەن يادرو­لىق قاۋىپسىزدىك جونىندەگى كەزدەسۋلەردە ءسوز سويلەۋى مەملەكەتتىك تاۋەلسىز­دى­گىمىزدىڭ 20 جىلدىق مە­رەي­تويىنىڭ قارساڭىندا قازاق­ستاننىڭ ايماق­تا­عى جانە الەمدەگى ماڭىزدى ءرولىن اي­قىنداۋى ءتيىس, دەدى ا.ابدراحمانوۆ. انار تولەۋحانقىزى.