تاسماعامبەتوۆ بالالار ءۇيى تاربيەلەنۋشىلەرىنە قاتىستى تاپسىرما بەردى

قر پرەمەر-ءمينيسترىنىڭ ورىنباسارى يمانعالي تاسماعامبەتوۆتىڭ توراعالىعىمەن بالالار ۇيلەرى تاربيەلەنۋشىلەرىنىڭ سانىن ازايتۋ جونىندە ءماجىلىس ءوتتى. كەڭەسكە پارلامەنت ءماجىلىسىنىڭ دەپۋتاتتارى, ءبىلىم جانە عىلىم ءمينيسترى ەرلان ساعاديەۆ, قر بالا قۇقىقتارى جونىندەگى ۋاكىل زاعيپا باليەۆا, سونداي-اق, ورتالىق اتقارۋشى ورگانداردىڭ, ۇكىمەتتىك ەمەس جانە كوممەرتسيالىق ۇيىمداردىڭ وكىلدەرى قاتىستى. «ەلباسى مەملەكەتتىك ورگاندارعا بالالار ۇيلەرىندە تاربيەلەنىپ جاتقانداردىڭ سانىن ازايتۋ تۋرالى تاپسىرما بەرگەنى بەلگىلى. وسى باعىتتا مەملەكەتتىك ورگاندار تاراپىنان جوسپارلى جانە دايەكتى جۇمىس جۇرگىزىلىپ جاتىر. بالالاردى وتباسىنا ورنالاستىرۋدىڭ بالامالى فورمالارى كوبەيىپ, اسىراپ الۋ, قامقورلىققا الۋ, پاتروناتتان وزگە, 2017 جىلدان باستاپ قابىلداۋ جانە قوناقجاي وتباسىلارى فورماسى ەنەدى. بۇلاردىڭ بارلىعى مەملەكەت تاراپىنان ماتەريالدىق قولداۋعا يە بولادى», – دەدى  يمانعالي تاسماعامبەتوۆ. ءوز كەزەگىندە ءبىلىم جانە عىلىم ءمينيسترى ەرلان ساعاديەۆ بالا اسىراپ الۋدىڭ اشىقتىعى مەن قول جەتىمدىلىگىن قامتاماسىز ەتۋ ءۇشىن بيىل ءساۋىر ايىنان بەرى جەتىم بالالار مەن اتا-اناسىنىڭ قاراۋىنسىز قالعان بالالاردىڭ, سونداي-اق ءوز وتباسىنا بالا اسىراپ الۋعا نيەت بىلدىرگەن تۇلعالاردىڭ رەسپۋبليكالىق مالىمەتتەر بانكى قالىپتاسقانىن مالىمدەدى. جىل سايىن التى مىڭنان استام بالا جاسوسپىرىمدەردى بەيىمدەۋ ورتالىقتارى ارقىلى اسىراپ الۋعا, قامقورلىققا جانە پاتروناتتىق تاربيەگە بەرىلەدى, تۋعان اتا-انالارىنا قايتارىلادى نەمەسە جەتىمدەر مەن اتا-اناسىنىڭ قورعاۋىنسىز قالعان بالالارعا ارنالعان مەكەمەلەرگە جىبەرىلەدى. ال جاڭا تۋعان نارەستەلەردىڭ اتا-اناسى انىقتالماعان جاعدايدا, جەرگىلىكتى اتقارۋشى ورگانداردىڭ قورعانشى جانە قامقورشى ورگاندارى سابيلەردى بىردەن وتباسىلارىنا تاربيەگە بەرە الادى. «بارلىق قۇزىرلى مەملەكەتتىك ورگاندار بالالاردى اسىراپ الۋعا, پاتروناتتىق تاربيەگە جانە وتباسىلارىنا بەرۋ ارقىلى جەتىم بالالار ۇيلەرىندەگى تاربيەلەنۋشىلەردىڭ سانىن قىسقارتۋ ءۇشىن بەلسەندى جۇمىس جۇرگىزۋى قاجەت», - دەدى ۆيتسە-پرەمەر. سونىمەن قاتار, ءماجىلىس قورىتىندىسىندا ي.تاسماعامبەتوۆ جاۋاپتى قۇرىلىمدارعا بالا قۇقىقتارى جونىندەگى ۋاكىلمەن جانە ۇكىمەتتىك ەمەس ۇيىمدارمەن بىرلەسىپ جەتىم بالالاردى قازاقستاندىق ازاماتتاردىڭ وتباسىنا تاربيەلەۋگە بەرۋدە ۇكىمەتتىك ەمەس ۇيىمداردىڭ قاتىسۋى بولىگىندە زاڭانامانى جەتىلدىرۋ بويىنشا ۇسىنىستار ازىرلەۋدى تاپسىردى.