راقىمشىلىق كىمدەرگە جاسالادى؟

بەيبىت جيىندار مەن شەرۋ ۇيىمداستىرىپ, ۇلتارالىق ارازدىقتى قوزدىرعانى, سونداي-اق جالعان لاڭكەستىك ءۇشىن سوتتالعاندار راقىمشىلىققا ىلىكپەيدى. بۇل تۋرالى پارلامەنت ماجىلىسىندە «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرال» زاڭ جوباسى بويىنشا جۇمىس توبى وتىرىسىنىڭ الدىندا قر باس پروكۋرورىنىڭ ءبىرىنشى ورىنباسارى يوگان مەركەل مالىمدەدى. «بۇل باپ زاڭ جوباسىنىڭ تىزىمىنە راقىمشىلىققا شەكتەۋ رەتىندە ەنگىزىلگەن. ياعني, وسى باپتار بويىنشا راقىمشىلىق قولدانۋعا شەكتەۋ قويىلعان. سونىمەن قاتار, ءبىر توپ ادام جاساعان جەمقورلىق قىلمىسقا نەمەسە اسا اۋىر قىلمىستارعا دا تىيىم سالىنادى», – دەدى مەركەل. اسا اۋىر جەمقورلىق قىلمىس جاساعاندار شىعىندى تولىعىمەن قايتارعان كەزدە جازا مەرزىمىن قىسقارتا الادى. ايتا كەتەيىك, ەلباسى كونستيتۋتسيانىڭ 61-بابىنىڭ 1-تارماعىنا سايكەس ءوز باستاۋىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزگەن. بۇل باستاما ءماجىلىستىڭ جۇمىسىنا 30 قاراشادا الىنعان بولاتىن. اتالعان زاڭ جوباسى بويىنشا, ازاماتتاردىڭ الەۋمەتتىك ءالسىز توپتارى, ونىڭ ىشىندە كامەلەتكە تولماعاندار, جۇكتى ايەلدەر, كامەلەتكە تولماعان نەمەسە مۇگەدەك بالالارى بار ايەلدەر, مۇگەدەكتەر, قارت ادامدار ءارى اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى.