اۋىل حالقى ءۇشىن سپورت زالدار تەگىن بولماق

اۋىل حالقى سپورت زالدارىنا تەگىن بارا الادى. مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆتىڭ ايتۋىنشا, بۇگىندە وسى ماسەلە بويىنشا جەرگىلىكتى اتقارۋشى ورگاندارعا ءتيىستى كەڭەستەر جىبەرىلدى. وعان كەلىسىم بەرگەن اكىمدىكتەر دە جوق ەمەس, دەپ حابارلايدى قازاقپارات. «اشىعىن ايتۋ كەرەك, بۇگىندە اۋىلدىق جەردە مەكتەپتىڭ سپورت زالىنان باسقا سپورتپەن اينالىساتىن نىسان جوق. سوندىقتان ونداي زالدار بارىنە قولجەتىمدى بولۋى قاجەت. بىزدە بولسا, سول زالدى قايتا-قايتا جوندەمەي, تازا كۇيىندە ۇستايمىز دەپ, ساباق بىتكەن بويدا ق ۇلىپ سالىپ قويادى. ال اۋىل حالقى, ىشىندە سپورتپەن اينالىسامىن دەۋشىلەر بولسا دا, وعان كىرە المايدى. وسىعان بايلانىستى ءبىز ءبىلىم جانە عىلىم مينيسترلىگى مەن ۇكىمەت ارقىلى ءتيىستى كەڭەستەرگە قول جەتكىزدىك. سوعان سايكەس, ەلىمىزدەگى بارلىق سپورت نىساندارى, اسىرەسە, جوعارى وقۋ ورىندارى, كوللەدجدەر مەن مەكتەپتەر جانىنداعى سپورت زالدار جۇمىستان تىس ۋاقىتتا جەرگىلىكتىحالىق ءۇشىن اشىق بولۋى ءتيىس. ماسەلەن, سەنبى-جەكسەنبى كۇندەرى ول جەردە سان الۋان سەكتسيالاردى ۇيىمداستىرۋعا بولادى. وسىنى اياعىنا دەيىن ىسكە اسىرا الساق, جاقسى بولار ەدى» – دەيدى ە.قاناعاتوۆ. سونىمەن قاتار, كوميتەت باسشىسى بۇگىندە اتالعان باستاماعا قولداۋ بىلدىرگەن وبلىستاردىڭ بار ەكەنىن جەتكىزدى. ول: «قازىر قىزىلوردا وبلىسىندا جانە تاعى بىرنەشە وڭىردە اكىمدەرمەن سونداي شەشىم قابىلداندى. نەگىزگى ماقسات - ينستيتۋتتار, كوللەدجدەر مەن مەكتەپتەر جانىنداعى سپورت زالداردى ساباقتان تىس ۋاقىتتا جەرگىلىكتى حالىققا ۇسىنۋ», – دەدى.