ەرتەڭ كونفەدەراتسيا كۋبوگى باستالادى

3-4 جەلتوقساندا  الماتىداعى بالۋان شولاق اتىنداعى سپورت سارايىندا سپورتتىق جەكپە-جەك جانە كۇش قولداناتىن سپورت تۇرلەرى كونفەدەراتسياسى كۋبوگىنىڭ فينالدىق كەزەڭى وتەدى. تۇڭعىش رەت بوكس, كۇرەس, دزيۋدو جانە تاەكۆوندو (WTF) سپورتىنان بىرلەسكەن كوماندالىق جارىس رەتىندە وتكىزىلەتىن شارانىڭ جالپى جۇلدە قورى - 125 ملن. تەڭگە. كونفەدەراتسيا كۋبوگى ءۇشىن قاتىسۋشى كوماندالار  جەرەبە بويىنشا  ءتورت توپقا بولىنگەن ەدى: «ا» توبى: قىزىلوردا وبلىسى, الماتى وبلىسى, استانا جانە الماتى قالاسى. «B» توبى: شقو, بقو, سقو جانە اقمولا وبلىسى. «س» توبى: وقو, پاۆلودار وبلىسى, قوستاناي وبلىسى, قاراعاندى وبلىسى. «D» توبى:  جامبىل وبلىسى, اقتوبە وبلىسى, اتىراۋ وبلىسى  جانە ماڭعىستاۋ وبلىسى. ىرىكتەۋ كەزەڭىنىڭ ناتيجەسىندە, گرەك-ريم كۇرەسىنەن جارتىلاي فينالدا الماتى وبلىسى وڭتۇستىك قازاقستان وبلىسىمەن كەزدەسسە, سولتۇستىك قازاقستان قۇراماسى جامبىل وبلىسىمەن جولىعادى. ەركىن كۇرەستەن الماتى وبلىسىنىڭ جارتىلاي فينالداعى قارسىلاسى وڭتۇستىك قازاقستان وبلىسى, شىعىس قازاقستان ءوڭىرى اقتوبەلىكتەرمەن بەلدەسەدى. دزيۋدودان فينالعا بەرىلەر جولاداما ءۇشىن قىزىلوردالىق سپورتشىلار قاراعاندى قۇراماسىمەن تالاسسا, شىعىس قازاقستان وبلىسى جامبىلدىق دزيۋدوشىلارمەن تاتاميگە شىعادى. تاەكۆوندودان الماتى قالاسى وقو سپورتشىلارىمەن كۇش سىناسادى. ال, باتىس قازاقستان وبلىسى جامبىل قۇراماسىمەن كەزدەسەدى. سونىمەن قاتار, جارتىلاي فينالدا بوكس كەزدەسۋلەرى دە وتەدى. بۇعان دەيىن ۇزدىك ءتورت كوماندا انىقتالعان. ماڭعىستاۋ, وڭتۇستىك قازاقستان, الماتى وبلىستارى مەن استانا قالاسى فينالعا شىعاتىن مىقتىلاردى انىقتايدى. سونداي-اق, كونفەدەراتسيا كۋبوگىنىڭ فينالدىق كەزەڭىنە ەلدوس سمەتوۆ (جامبىل وبلىسى, دزيۋدو), ادىلبەك نيازىمبەتوۆ (ماڭعىستاۋ وبلىسى, بوكس), نۇرسۇلتان ماماەۆ (وقو, تاەكۆوندو), جانساي سماعۇلوۆ (قاراعاندى وبلىسى, دزيۋدو), ەرجان شىنكەەۆ (قاراعاندى وبلىسى, دزيۋدو), راسۋل كاليەۆ (شقو, ەركىن كۇرەس), نۇرماحان تىناليەۆ (الماتى وبلىسى, گرەك-ريم كۇرەسى), اسلان كاحيدزە (الماتى وبلىسى, ەركىن كۇرەس), بەرىك ابدراحمانوۆ (ماڭعىستاۋ وبلىسى, بوكس) سىندى تانىمال سپورتشىلار دا قاتىسادى.