400 مىڭ ءتۇپ راۋشان رەسەيگە ەكسپورتتالدى

ەكىباستۇزدا راۋشان گۇلدەرىنىڭ 400 مىڭ ءتۇبى رەسەيگە ەكسپورتتالدى, دەپ حابارلادى pavlodarnews.kz. جىلىجاي كەشەنىنىڭ ديرەكتورى ايماعانبەت سارسەنبەك ۇلىنىڭ ايتۋىنشا, قازىر بۇل جەردە ايىنا 600 مىڭ ءتۇپ گۇل الىنادى. ونىڭ 60 پايىزى سوڭعى ەكى ايدان بەرى رەسەي ەلىنە جەتكىزىلە باستاعان. اسىرەسە, ماسكەۋ, كراسنودار, ومبى, ءنوۆوسىبىر ايماقتارىنان سۇرانىس كوپ. «تاپسىرىس بەرۋشىلەردى ەڭ الدىمەن, گۇلدىڭ ۇزاق ۋاقىتقا ساقتالۋ قاسيەتى مەن ءتيىمدى باعاسى قىزىقتىرادى. قازاقستان بويىنشا گۇل نارىعىن جاۋلاپ الدىق دەسەك بولادى. باتىس وڭىرلەردەن باسقا, وڭتۇستىك, سولتۇستىك, ورتالىق قازاقستاندى وسى راۋشان گۇلدەرمەن قامتيمىز. الايدا باتىس قازاقستانعا جەتكىزۋ ازىرگە قيىنعا سوعىپ تۇر. الداعى ۋاقىتتا بۇل ماسەلە دە شەشىمىن تابادى. قازىر راۋشان گۇلدەردىڭ قوسىمشا تاعى التى ءتۇرىن وتىرعىزامىز. بۇل – «اۆالاني», «بيكولور», «شەرپا» اتاۋىنا يە قىزىل, اق, سارى جانە ارالاس گۇلدەر. سۇرانىستىڭ ارتۋىنا بايلانىستى كەلەسى جىلى تاعى 5 گا اۋماققا كەڭەيۋ جوسپاردا بار. قازىر كاسىپورىندا 70-كە تارتا ادام جۇمىس ىستەيدى», – دەدى ينۆەستور. ايتا كەتەرلىگى, كەشەن بيىل اقپان ايىندا ىسكە قوسىلعان. جوباعا 3,2 ملرد تەڭگە ينۆەستيتسيا قۇيىلدى. گوللانديالىق تەحنولوگيامەن سالىنعان جىلىجايدىڭ اۋماعى 5 گا قۇرايدى. بولات نۇرجانوۆ اتىنداعى «ەكىباستۇز ماەس – 1» جشس-ءنىڭ جانىندا اشىلعان جىلىجاي ەلەكتر قۋاتىن ارزان باعامەن وسى ستانتسيادان الادى. گوللانديالىق راۋشان گ ۇلىنىڭ 20-عا تارتا ءتۇرى ارنايى مينەرالدى ماقتادا تامشىلاتىپ سۋارۋ تاسىلىمەن وسىرىلەدى. ونىڭ ىشىندە «Red naomi» سۇرىبى جوعارى سۇرانىسقا يە.