ەلوردادا ۇيىمداستىرىلعان رەسپۋبليكالىق جاستار فورۋمىنا قاتىسىپ, ەلباسىنىڭ الدىندا ءسوز سويلەگەن بەلسەندى ازاماتتاردىڭ ءبىرى - ارمان دوسحانباەۆ دەگەن جاس كاسىپكەر. ول العاشقى كاسىبىن 17 جاسىندا باستاپتى.
«مەن ول كەزدە قاراعاندى قالاسىندا كومپيۋتەرلىك تەحنيكا بويىنشا جەكە كاسىبىمدى اشىپ, سونى دوڭگەلەتتىم. ايىنا 300 مىڭ تەڭگەگە جۋىق قارجى تاباتىنمىن. ول مەكتەپ وقۋشىسى ءۇشىن ۇلكەن تابىس ەدى. قازىر جاسىم 25-تە. مەنىڭ 4 كومپانيام بار. ونىڭ بىرەۋىنىڭ وزىنەن جىلىنا 168 ميلليون تەڭگە قاراجات تۇسەدى. 33 جۇمىس ورنىمەن قامتاماسىز ەتەدى», - دەدى ول.
سونىمەن قاتار, ارماننىڭ «وتان» برەندىمەن ساعات جاسايتىن كاسىپورنى بار ەكەن.
«بۇل كاسىپورنىم «قازاقستاندا جاسالعان» جوباسىن ىسكە اسىرۋعا ۇلەس قوسۋدا. ءسىزدىڭ تاپسىرماڭىزبەن جۇزەگە اسىرىلىپ جاتقان «بيزنەس 2020» باعدارلاماسىنىڭ ارقاسىندا ءبىزدىڭ كاسىپورىن ۇلكەن سەرپىلىس الدى. وسى ءۇشىن سىزگە زور العىس ايتا وتىرىپ, وزىڭىزگە ارناپ جاساعان قولساعاتتى سىيعا تارتۋعا رۇقسات ەتىڭىز»,- دەدى ارمان دوسحانباەۆ.
ال پرەزيدەنت جاس كاسىپكەردىڭ سىيلىعىن ەرەكشە ىقىلاسپەن قابىل الا وتىرىپ, «جارايسىڭ! ەندى ءبىز شۆەيتسارلىق ەمەس, ءوزىمىزدىڭ ساعاتىمىزدى تاعاتىن بولامىز», دەپ ءوز ريزاشىلىعىن ءبىلدىردى.
ءلايلا ەدىلقىزى,
«ەگەمەن قازاقستان»
سۋرەتتەردى تۇسىرگەن: ەرلان وماروۆ
