تالدىقورعاندا 40 پاتەردىڭ كىلتى تاپسىرىلدى

تۇڭعىش پرەزيدەنت كۇنى جانە قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىندا تالدىقورعان قالاسىندا 40 پاتەرلى كوممۋنالدىق ءۇي پايدالانۋعا بەرىلدى. ءبىرىنشى كەزەكتە پاتەرلەرگە جەتىم بالالار, مۇگەدەكتەر, كوپ بالالى انالار, تولىق ەمەس وتباسىلار, ۇوس مۇگەدەكتەرى مەن باسقا دا كەزەكتەگى ازاماتتار يە بولدى. «بۇگىن كوپشىلىكپەن بىرگە مەرەكەلىك كوڭىل كۇيدە وزدەرىڭىزگە 40 پاتەرلى كوممۋنالدىق ءۇيدىڭ كىلتىن تاپسىرعالى تۇرمىز. بۇل ايتۋلى وقيعانىڭ تۇڭعىش پرەزيدەنت كۇنى جانە ەل تاۋەلسىزدىگىنىڭ 25 جىلدىعى قارساڭىندا ءوتىپ وتىرعانى ۇلكەن قۋانىش. سىزدەردى كوپتەن كۇتكەن جاڭا باسپاناعا يە بولۋلارىڭىزبەن قۇتتىقتايمىن! وتباسىلارىڭىزعا بەرەكە, مولشىلىق پەن تابىس تىلەيمىن. مەرەكەلەرىڭىز قۇتتى بولسىن!» – دەدى وبلىس اكىمى اماندىق باتالوۆ. جالپى, تالدىقورعان قالاسىندا 2012 جىلدان بەرى جالپى الاڭى 87,8 مىڭ شارشى مەتر بولاتىن 23 تۇرعىن ءۇي پايدالانۋعا بەرىلدى. سونىڭ ناتيجەسىندە 2 مىڭعا جۋىق وتباسى باسپانالى بولدى. وسى جىلدىڭ 9 ايىندا وبلىس ورتالىعىندا 4 ءۇي پايدالانۋعا بەرىلدى. جىل سوڭىنا دەيىن تاعى 60 پاتەرلى كوممۋنالدىق ءۇي ىسكە قوسىلادى دەپ جوسپارلانعان. سونىمەن قاتار, 9 ءۇيدىڭ قۇرىلىسى ءجۇرىپ جاتىر. ونىڭ 4-ەۋى – جەكە ينۆەستيتسيا ەسەبىنەن سالىنۋدا. بۇل ءوز كەزەگىندە تاعى 873 وتباسىنىڭ جاڭا پاتەرلى بولۋىنا مۇمكىندىك بەرەدى.