ءبىرجان جاقىپوۆ: كاسىپقوي بوكستا باق سىناپ كورگىم كەلەدى

  ريو-دە-جانەيروداعى وليمپيادادان كەيىن قازاقستان قۇراماسىنداعى ورنىن بوساتقان بوكسشى ءبىرجان جاقىپوۆ ايبا-نىڭ كاسىپقوي بوكس جوباسىنا قاتىسۋعا نيەتتى ەكەنىن ءبىلدىردى. «ارۆ جوباسى ءارى قاراي جالعاسىن تاۋىپ جاتسا, وسى جوبادا ءالى دە باق سىناپ كورگىم كەلەدى» دەگەن ول قازاقپارات اگەنتتىگىنىڭ ءتىلشىسى كۇنسۇلتان وتاربايعا بەرگەن سۇحباتىندا. ءبىرجان جاقىپوۆ 10 جىلدان اسا ۋاقىت ەڭ جەڭىل سالماقتا بوكستان ۇلتتىق قۇراما ساپىندا ءىرى جارىستارعا قاتىسىپ, تولىپ جاتقان جۇلدەلەرگە يە بولعان سپورتشى, الەم چەمپيونى. ءۇش رەت وليمپياداعا قاتىستى, بىراق ۇشەۋىندە دە جۇلدەگە ىلىنە المادى. «باس باپكەر مىرزاعالي قۇلان ۇلى مەنى ءۇش وليمپياداعا اپاردى. قازاق بوكسشىلارىنان ەڭ كوپ وليمپيادا ويىندارىنا بارعان مەن ەكەنمىن. الايدا, بىردە-بىرەۋىندە جولىم بولمادى. تىم قۇرىعاندا ۇشتىككە ىلىنە المادىم. ارمانىم وليمپيادانىڭ ءبىر جۇلدەسى ەدى. ورىندالمادى. قانشا قۋساڭ دا, بۇيىرمايتىن دۇنيە بۇيىرمايدى ەكەن» دەدى ول. «قازىر قايدا, نە ىستەپ ءجۇرسىز؟» دەگەن سۇراققا ءبىرجان جاقىپوۆ «قازىر بوسپىن. جۇمىسسىز جاتىرمىن. ناقتى نە ىستەيتىنىمدى ءالى شەشكەن جوقپىن. قازىر شىمكەنت قالاسىندا وتباسىمنىڭ قاسىندامىن. ريودان كەلگەننەن بەرى دەمالىپ جاتىرمىن. ءالى ەشبىر جاتتىعۋ زالدارىنىڭ ەسىگىن اشقان جوقپىن. وليمپيادا دەپ ۇزاق ۋاقىت دەمالعان جوقپىز. ءبىر ۋاقىت دەنساۋلىققا دا كوڭىل بولمەسەك بولمايدى عوي. وسى تورتجىلدىق دوداسى دەپ وتباسىمىزدىڭ بار ەكەنىن دە ۇمىتىپ كەتۋگە شاق قالدىق. قاشان ءبىر جۇمىستىڭ ىڭعايى كەلگەنشە ۇيدە بولعاندى ءجون سانادىم» دەپ جاۋاپ بەردى. سونىمەن قاتار داڭقتى بوكسشى الداعى جوسپارلارى تۋرالى ايتتى. "ەگەر APB جوباسى ءارى قاراي جالعاسىن تاۋىپ جاتسا, وسى جوبادا ءالى دە باق سىناپ كورگىم كەلەدى» دەدى ول. شاقىرىپ جاتسا ايبا شەڭبەرىندەگى كاسىپقوي بوكس جاستارىنا قاتىسۋعا نيەتتى ەكەنىن جەتكىزدى. «نەگىزىنەن دايىنمىن. اللا قالاسا, جاڭا جىلدان كەيىن, جاتتىعۋ زالدارىنىڭ ەسىگىن قايتا اشاتىن بولامىن. ءوز-وزىمە كەلگەنشە جاتتىعۋىم كەرەك» دەدى جاقىپوۆ. ءتىلشىنىڭ قۇراماداعى ەڭ جەڭىل سالماقتاعى قازىرگى بوكسشىلار تۋرالى سۇراعىنا بايلانىستى ءبىرجان جاقىپوۆ ء"دال بۇگىن تەمىرتاس ءجۇسىپوۆ پەن ەرجان جومارت ەكەۋىنىڭ الەۋەتى تەڭ دارەجەدە. الداعى ۋاقىتتا قايسىسى كوپ ەڭبەكتەنەدى, قايسىسى كوپ جۇمىس جاسايدى, سونىڭ ءباسى جوعارى بولادى. بارلىق ناتيجە تەك ەڭبەكپەن كەلەدى» دەپ پىكىر ءبىلدىردى. ءبىرجان ومىردە ەندى ورىندالمايتىن ارمانى جايلى بىلاي دەگەن: «مەن دە ورىندالماي كەتكەن ارمان قالدى. جالعىز ارمانىم وليمپيادا جۇلدەسى بولاتىن. سول ارمان ماڭگى ۇستاتپاي كەتتى. ەندى, ماڭگى جوق ول ماعان. قانشا جىل سول ارماندى قۋالادىم. جەتە المادىم. جەتكىزبەدى». سۇحبات سوڭىندا وتباسى جايلى سۇراققا الەم چەمپيونى «ءوز وتباسىمدا ءتورت اعايىندىمىز. ءبىر اعام, ءوزىم جانە ەكى قارىنداسىم بار. قازىر ەكى بالانىڭ - ءبىر ۇل, ءبىر قىزدىڭ اكەسى بولدىم. ۇيدەگى ۇلدىڭ كەنجەسى بولعان سوڭ, قارا شاڭىراققا يە بولىپ, اكە-شەشەمدى قولىما الىپ وتىرمىن. اعام دا وتباسىلى, ەكى قارىنداسىم دا تۇرمىستا. اكەم ۇزاق جىل ءبىر كاسىپورىندا ەسەپشى بولىپ قىزمەت ىستەپ, زەينەتكە شىقتى. ال, انام ۇزاق جىل مەكتەپتە وقىتۋشىلىقپەن اينالىسىپ كەلەدى» دەپ جاۋاپ بەرگەن.