ن.ءا.نازارباەۆ تۋرالى الەمنىڭ كورنەكتى ساياساتكەرلەرىنىڭ پىكىرلەرى وسىنداي
ۆلاديمير پۋتين,
رەسەي فەدەراتسياسىنىڭ پرەزيدەنتى:
– ءبىز رەسەي – قازاقستان قاتىناستارىن دامىتۋعا ءسىزدىڭ قانشالىقتى زور جەكە ىقىلاسىڭىزدى بولەتىنىڭىزدى كورىپ وتىرمىز. وسى تىكەلەي ات سالىسۋدىڭ ارقاسىندا ءبىزدىڭ قارىم-قاتىناستارىمىز وتە ءتيىمدى تۇردە ءارى جەدەل قارقىنمەن دامىپ كەلەدى. ەكى مەملەكەت اراسىنداعى تاۋار اينالىمىنىڭ كولەمى وسە تۇسۋدە.
ءسىز ينتەگراتسيالىق ۇدەرىستەردە, اسىرەسە, ونىڭ ەڭ ءماندى نىساندارى مەن تۇرلەرى بويىنشا ءسوزسىز كوشباسشىسىز. قازاقستاننىڭ قول جەتكىزگەن تابىستارى ءسىزدىڭ اتىڭىزبەن تىكەلەي بايلانىستى. ءسىزدىڭ ەڭبەگىڭىزدى ءوز وتانداستارىڭىز عانا ەمەس, ميلليونداعان رەسەيلىكتەر دە شىنايى قۇرمەت تۇتادى.
ءسىز ەۋرازيالىق كەڭىستىكتەگى ينتەگراتسيالىق ۇدەرىستەردىڭ ناعىز ارحيتەكتورى بولىپ ەسەپتەلەسىز.
سي تسزينپين,
قحر توراعاسى:
– ازياداعى ءوزارا ءىس-قيمىل جانە سەنىم شارالارى ءجونىندەگى كەڭەستىڭ باستاماشىسى – نۇرسۇلتان نازارباەۆ. ءبىز ونىڭ ۇلكەن ساياسي كورەگەندىگى مەن ايماقتىق قاۋىپسىزدىك پەن الەمدەگى بەيبىتشىلىكتى قامتاماسىز ەتۋدى ءوزىنىڭ پارىزى سانايتىن قاسيەتىنە ءتانتىمىز.
اوسشك-ءنى قۇرۋ تۋرالى يدەيانى العاش رەت قازاقستان پرەزيدەنتى نۇرسۇلتان نازارباەۆ 1992 جىلى بۇۇ باس اسسامبلەياسىنىڭ 47-سەسسياسىندا جاريا ەتكەن بولاتىن. بۇل باستاما بۇگىندە ءوز ومىرشەڭدىگىن دالەلدەپ, ازيا ەلدەرى اراسىندا بەدەلى بيىك, ابىرويى اسقاق, اۋقىمدى ۇيىمعا ۇلاستى.
باراك وباما,
اقش پرەزيدەنتى:
– ءوز تاۋەلسىزدىگىن العان كەزەڭنەن بەرى قازاقستان مادەني, كونفەسسيالىق جانە ەتنوستىق الۋاندىعىنان قۋات الۋىن جالعاستىرىپ كەلەدى. ۇكىمەت پەن حالىق وراسان الەۋەتىن تانىتاتىن نارىقتىق ەكونوميكا قۇردى. قازاقستان حالقى وسى جەتىستىكتەرىن ورىندى ماقتانىش ەتە الادى. اقش پەن قازاقستان اراسىنداعى ستراتەگيالىق ارىپتەستىك تۋرالى ۇنقاتىسۋ قازىرگى زامانعى شاقىرۋلاردى شەشۋگە دەگەن ورتاق ۇستانىمدارىمىزدىڭ كۋاسى بولىپ تابىلادى. مەن قازاقستانعا اۋعانستانداعى جاعدايعا بايلانىستى ناقتى ۇستانىمى ءۇشىن ريزاشىلىق بىلدىرەمىن. ءسىزدىڭ ۇلتارالىق جانە ءدىني توزىمدىلىكتى ىلگەرىلەتۋدەگى كۇش-جىگەرىڭىزدى جوعارى باعالايمىن.
پان گي مۋن,
بىرىككەن ۇلتتار ۇيىمىنىڭ باس حاتشىسى:
– الەمدىك جانە ءداستۇرلى دىندەر ليدەرلەرىنىڭ سەزىنە قاتىسۋشىلاردىڭ بارلىعىنا سالەم جولداۋ مەن ءۇشىن زور ابىروي. مەن پرەزيدەنت ن.نازارباەۆقا جانە قازاقستان رەسپۋبليكاسىنىڭ ۇكىمەتىنە وسىنداي اسا قاجەتتى ۇنقاتىسۋعا بۇكىل الەمنەن ءدىني ليدەرلەردى جيناعانى ءۇشىن العىس ايتامىن.
تولەرانتتىلىق, قۇرمەت, بۇكىل ادامزاتتىڭ ءوزارا تۇسىنىستىگى مەن تەڭ قۇقىلى بولۋى سياقتى جالپىادامزاتتىق قۇندىلىقتار بارلىق ءدىننىڭ وزەگى بولىپ تابىلادى, سونداي-اق, ول ادام قۇقىقتارىنىڭ بۇكىلالەمدىك دەكلاراتسياسىندا بەكىتىلگەن. قانداي بولماسىن ءدىن جولىن ۇستاناتىن ادامداردى بەيبىتشىلىككە جانە لايىقتى ومىرگە ۇمتىلىس بىرىكتىرەدى. ۇلكەن ءبىر وتباسىنىڭ مۇشەلەرى سياقتى ءبىز ورتاق پروبلەمالارمەن جانە قاۋىپ-قاتەرلەرمەن بەتپە-بەت كەلەمىز, بارلىق دىنگە سەنۋشىلەر ورتاق ىسكە ءوز ۇلەسىن قوسقان جاعدايدا عانا ولاردى ەڭسەرۋ مۇمكىن بولماق.
دەۆيد كەمەرون,
ۇلىبريتانيا جانە سولتۇستىك يرلانديا بىرىككەن كورولدىگىنىڭ بۇرىنعى پرەمەر-ءمينيسترى:
– مەن ەڭ العاش ءسىزدىڭ ەلگە ساپارمەن كەلگەنىمە قۋانىشتىمىن. ءبىزدىڭ ەكىجاقتى قاتىناستارىمىز جاڭا دەڭگەيگە كوتەرىلەتىنىن زور قۋانىشپەن اتاپ وتكىم كەلەدى. وعان ەلدەرىمىز اراسىنداعى ستراتەگيالىق سەرىكتەستىك تۋرالى كەلىسىم ايقىن دالەل بولادى.
قازاقستان بۇگىندە ءسىزدىڭ باسشىلىعىڭىزبەن قارقىندى دامىپ كەلەدى. قازاقستاننىڭ ىقپالى الداعى ۋاقىتتا دا ارتا بەرەتىنىنە سەنىمدىمىز. بىزدەر اۋعانستان بويىنشا بىرلەسكەن جۇمىستى بەلسەندى ءتۇردە دامىتۋدامىز. قازاقستان بۇل ماسەلەدە ماڭىزدى جانە وڭ ءرول اتقارادى. قازاقستاننىڭ بولاشاعى زور, ال ۇلىبريتانيا وسى بولاشاقتىڭ ماڭىزدى بولىگى بولا الادى.
انگەلا مەركەل,
گفر كانتسلەرى:
– جاۋاپتى مىندەتتەردى ءارى قاراي اتقارۋىڭىزدا سىزگە زور تابىستار مەن ساتتىلىك تىلەيمىن. ەكونوميكالىق, قوعامدىق جانە ساياسي رەفورمالاردى جۇرگىزۋدە قازاقستان بۇدان بىلاي دا گەرمانيا تاراپىنداعى قولداۋعا سەنىم ارتا الاتىن بولادى.
الەكساندر لۋكاشەنكو,
بەلارۋس رەسپۋبليكاسىنىڭ پرەزيدەنتى:
– ءبىز ءار جولى استانادا بولعاندا, وزىمىزگە الدەنە الۋعا تىرىسامىز. بۇل قالادا وزىق تەحنولوگيا, قىزعىلىقتى ارحيتەكتۋرالىق ويلار بار. قازاقستاندى ءبىز بەلارۋس ءۇشىن ەڭ ءتيىمدى جانە پەرسپەكتيۆالى سەرىكتەس رەتىندە تانىپ كەلەمىز. ءسىزدىڭ ەلدە ءبىز ءۇشىن ءارتۇرلى جوبالاردى جۇزەگە اسىرۋعا ەشقانداي پروبلەما جوق. بۇل ىنتىماقتاستىعىمىزدىڭ دەڭگەيى جوعارى ەكەنىن كورسەتەدى.
ريم پاپاسى بەنەديكت XVI:
– جوعارى مارتەبەلى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ مىرزا!
قازاقستان رەسپۋبليكاسىنىڭ ۇلتتىق مەرەكەسى سىزگە جانە قازاقستان حالقىنا بەيبىتشىلىك پەن وركەندەۋ يگى تىلەكتەرىمدى جولداۋىما قۋانىشتى مۇمكىندىك تۋعىزىپ وتىر.
ەلىڭىزدىڭ تاۋەلسىزدىگىنىڭ مەرەكەسىنە وراي, جاراتۋشى ەلىڭىزدىڭ تۇرعىندارىنىڭ نەعۇرلىم ۇيلەسىمدى ءارى ادىلەتتى قوعام قۇرۋىنا قۋات بەرىپ, ولاردىڭ وتباسىلىق, الەۋمەتتىك جانە ۇلتتىق ومىرلەرى نۇرلى بولىپ, مادەني جانە رۋحاني قۇندىلىقتاردى قۇرمەتتەۋدى ءناسىپ ەتسىن دەپ تىلەيمىن.
جوعارى مارتەبەلى, سىزگە جانە ەلدىڭ بارلىق ازاماتتارىنا جاراتقاننان شاپاعات تىلەيمىن.
كيريلل,
ماسكەۋ جانە بۇكىل رەسەي پاتريارحى:
– وسكەلەڭ ۇرپاقپەن ءدىني-اعارتۋشىلىق جۇمىس جۇرگىزۋ ءبىلىمدى جانە ۇيلەسىمدى قوعام قۇرۋعا ايتارلىقتاي ۇلەس قوسىپ, ۇلتارالىق قاتىناستارداعى شيەلەنىس دەڭگەيىن تومەندەتۋگە جاعداي جاساي الار ەدى, بۇل بولاشاقتا قازىرگى زامان بەتپە-بەت كەلىپ وتىرعان كوپتەگەن پروبلەمالاردان قۇتىلۋعا كومەكتەسەرى انىق.
قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆقا دىنارالىق ۇنقاتىسۋدى قولداعانى, ءارتۇرلى ءدىن ۇستانۋشىلاردىڭ جۇرەگىنە جاقىن بەيبىتشىلىك پەن ءوزارا كومەك يدەيالارىنىڭ جولىن ۇستانعانى ءۇشىن شىنايى ريزالىعىمدى بىلدىرەمىن.
ابدۋللا گۇل,
تۇركيا رەسپۋبليكاسىنىڭ 11-ءشى پرەزيدەنتى:
– ءار ساپارىمدا وركەندەي ءتۇسكەنىنە كۋا بولىپ جۇرگەن استانا قالاسى – قازاقستاننىڭ ءديناميزمى مەن پرەزيدەنت نازارباەۆ مىرزانىڭ كورەگەندىلىگىن بەينەلەيتىن ەڭ ۇلكەن تۋىندى. استانانىڭ قۇرىلىس جۇمىستارىنا تۇرىك كومپانيالارى مەن جۇمىسشىلارىنىڭ دا ۇلەس قوسۋىن تۇرىك-قازاق ىنتىماقتاستىعىنىڭ ەڭ اسەم نىشاندارىنىڭ ءبىرى رەتىندە باعالايمىز.
لامبەرتو زانەر,
ەقىۇ-نىڭ باس حاتشىسى:
– ءبىز قازاقستانمەن جۇمىس ىستەۋ ءادىسىن جاڭارتۋدى قالايمىز. مۇنداعى قىزمەتىمدى تولىقتاي جاڭعىرتۋعا مۇددەلىمىز. سونداي-اق, قاۋىپسىزدىك تۇرعىسىنداعى ءىس-شارالاردىڭ اسا ماڭىزدىلىعىن اتاپ وتكىم كەلەدى. اتلانتيكادان ۆلاديۆوستوكقا دەيىنگى اۋماقتا تۇراقتىلىقتىڭ ساقتالۋىن قاداعالاۋ باستى مىندەتىمىز. قاۋىپسىزدىك شارالارى كەشەندى تۇردە ءجۇرگىزىلۋى ءۇشىن بىرلەسە قادام جاساۋىمىز قاجەت.
ەمومالي راحمون,
تاجىكستان پرەزيدەنتى:
– اشىق-جارقىندىعى, شىنشىلدىعى, تارتىمدىلىعى, ادامعا سۇيىسپەنشىلىگى – مۇنىڭ ءبارى دە نۇرسۇلتان ءابىش ۇلىنىڭ تابيعاتىنا ءتان قاسيەتتەر.
قازاق جۇرتىنىڭ, ەلىنىڭ كوپ ۇلتتى حالقىنىڭ الدىنداعى, تاريحتىڭ الدىنداعى جوعارى جاۋاپكەرشىلىك سەزىمى ونىڭ بويىنان ءاماندا اجىراعان ەمەس.
ول ۇلى ۇيىمداستىرۋشى رەتىندە قازاقستاندى كەڭەستەن كەيىنگى كەڭىستىكتىڭ دامىعان مەملەكەتتەرىنىڭ بىرىنە اينالدىردى. قازاقستاننىڭ الەۋمەتتىك-ەكونوميكالىق سالاداعى تابىستارى تاعىلىم الارلىق.
ناعىز باسشى عانا وسىنداي ءناتيجەلەرگە جەتە الادى, بۇل جاعىنان العاندا, نۇرسۇلتان ءابىش ۇلى – ءوز حالقىنىڭ داۋسىز باسشىسى.
فرانسۋا وللاند,
فرانتسۋز رەسپۋبليكاسىنىڭ پرەزيدەنتى:
– فرانتسيا ورتالىق ازياداعى ءىرى ەكونوميكاسى بار ەل – قازاقستانمەن ىنتىماقتاستىققا مۇددەلى. سىزدەردىڭ ەلدەرىڭىز ەكونوميكالىق دامۋ ءجونىندەگى ماقساتتارىن تابىستى جۇزەگە اسىرىپ قانا قويعان جوق, ول سونداي-اق, ءوزىنىڭ كورشىلەرىمەن تەڭ دارەجەدە ۇنقاتىسۋ جۇرگىزىپ, ءىرى ساياسي ءمانى بار وقيعالارعا ىقپال ەتۋگە ءمۇمكىندىك بەرەتىن ماڭىزدى ساياسي جانە ديپلوماتيالىق ءرول اتقارادى.
ميلوش زەمان,
چەح رەسپۋبليكاسىنىڭ پرەزيدەنتى:
– قازاقستان مەن چەحيا اراسىنداعى ءتۇرلى سالاداعى ىنتىماقتاستىقتى دامىتۋدىڭ ماڭىزى زور. بۇگىندە جاڭا جىبەك جولىنىڭ الەۋەتىن اشۋ باعىتىندا جۇمىستار جۇرگىزىلىپ جاتىر. ءبىز ءسىزدىڭ ەلدىڭ قازىرگى دامۋىنا عانا ەمەس, ونىڭ الەۋەتىنە دە ورتالىق ازياداعى ماڭىزدى ورىن الاتىنىن ەسكەرە وتىرىپ باعا بەرەمىز.
المازبەك اتامباەۆ,
قىرعىز رەسپۋبليكاسىنىڭ پرەزيدەنتى:
– قىرعىزستاندا ەلەۋلى ەنەرگەتيكالىق پروبلەمالار بار. وسى جانە باسقا دا كوپتەگەن ماسەلەدە بىزگە كومەك كورسەتكەنىڭىز, ءبىزدىڭ جۇرەگىمىز بەن جادىمىزدا ءاردايىم ساقتالادى. مۇنداي ىقىلاس پەن قولداۋعا بۇكىل قىرعىزستان حالقى ءدان ريزا. وسى جىلدار ىشىندە ءسىزدىڭ ەل قانداي سەكىرىس جاساعانىن ءبىز كورىپ وتىرمىز.
يلحام اليەۆ,
ازەربايجان پرەزيدەنتى:
– ازەربايجان مەن قازاقستاندى كوپ عاسىردان بەرى جالعاسىپ كەلە جاتقان دوستىق, تاتۋ كورشىلەستىك پەن ىنتىماقتاستىق بايلانىستىرادى. مەن وسى جاقسى داستۇرلەرگە نەگىزدەلگەن ءبىزدىڭ مەملەكەتارالىق قارىم-قاتىناسىمىز تاتۋ حالقىمىز بەن ەلدەرىمىزدىڭ يگىلىگى ءۇشىن بولاشاقتا دا داميدى دەپ سەنەمىن.
نارەندرا مودي,
ءۇندىستاننىڭ پرەمەر-ءمينيسترى:
– قايتا سايلانۋىڭىز قازاقستان حالقىنىڭ ءسىزدىڭ كورەگەن كوشباسشىلىڭىزعا دەگەن سەنىمىنىڭ جارقىن ايعاعى بولىپ تابىلادى. سىزگە قارقىندى دامىپ جانە وركەندەپ كەلە جاتقان ۇلت قالىپتاستىرۋ جولىنداعى كۇش-جىگەرىڭىزدىڭ تابىستى بولۋىن تىلەگىم كەلەدى. قازاقستان ءسىزدىڭ باسشىلىعىڭىزبەن ىلگەرىلەۋ مەن دامۋدىڭ جاڭا ساتىسىنا اياق باساتىنىنا سەنىمدىمىن. ءسىزدىڭ قولداۋىڭىزبەن ءتۇرلى سالاداعى ىنتىماقتاستىعىمىزدى بولاشاقتا بۇدان دا جوعارى دەڭگەيگە كوتەرە الاتىنىمىزعا سەنىمدىمىن.
حاسان رۋحاني,
يران يسلام رەسپۋبليكاسىنىڭ پرەزيدەنتى:
– حالىق جاساعان تاڭداۋ ءبىزدىڭ ەكىجاقتى ىنتىماقتاستىق اياسىندا جوسپارلانعان باعدارلامالاردى جۇزەگە اسىرۋدا جەمىستى جۇمىس ىستەۋىمىزگە جاقسى مۇمكىندىك بەرەدى. سىزگە مىقتى دەنساۋلىق پەن زور تابىس, ال دوستاس قازاقستان حالقىنا باق-بەرەكە تىلەيمىن.
سالمان بەن ابدەل
ءازيز ءال ساۋد,
ساۋد ارابياسىنىڭ كورولى:
– وسى مۇمكىندىكتى پايدالانا وتىرىپ, ءبىز ساۋد ارابياسى مەن قازاقستاننىڭ اراسىنداعى باۋىرلاستىق, دوستىق بايلانىستى جوعارى باعالايتىنىمىزدى ايتقىم كەلەدى. باۋىرلاس ەلدەرىمىز اراسىنداعى ءوزارا قارىم-قاتىناستاردى بارلىق سالادا بۇدان ءارى دە نىعايتىپ, دامىتا بەرۋگە نيەتتىمىز.
توني تان كەن يام,
سينگاپۋر رەسپۋبليكاسىنىڭ پرەزيدەنتى:
– سينگاپۋر مەن قازاقستان اراسىندا جاقسى دوستىق قارىم-قاتىناس ورناعان. ءسىزدىڭ باسشىلىعىڭىزبەن ەكىجاقتى ىنتىماقتاستىقتىڭ نىعايا بەرەتىنىنە سەنىمدىمىن. حالىقتارىمىزدىڭ يگىلىگى ءۇشىن ءوزارا ىقپالداستىقتى دامىتۋ ماقساتىندا بىرلەسىپ جۇمىس ىستەيمىز دەپ ۇمىتتەنەمىن.
