ءوڭىردىڭ وڭ وزگەرىسى – تاۋەلسىزدىك جەمىسى

قازاقستان حالقى بۇدان شيرەك عاسىر بۇرىن, ياعني 1991 جىلدىڭ 1 جەلتوقسانىنداعى پرەزيدەنتتىك سايلاۋدا نۇرسۇلتان نازارباەۆقا داۋىس بەرىپ, ەلباسى رەتىندە ەل تىزگىنىن ۇستاۋعا سەنىم ءبىلدىردى. سودان بەرگى كەزەڭدە تاۋەلسىز قازاقستان الەمگە تانىلدى. ۇلتتىق ەكونوميكا ءار سالادا جانداندى. حالىقتىڭ الەۋمەتتىك احۋالىن جاقسارتۋ باعىتىنداعى سان الۋان رەفورمالار جەمىسىن بەردى. ءبىر سوزبەن ايتقاندا, ەل ەڭسە تىكتەدى, الەمدىك وركەنيەتتىڭ يگىلىكتەرىنە قول جەتكىزدى. تاۋەلسىزدىك جىلدارىنداعى جاسامپاز ىستەردىڭ جارقىن مىسالى اتىراۋ وبلىسى تۇرعىندارىنىڭ ومىرىندە لايىقتى كورىنىسىن تاپتى. وڭىردە تاۋەلسىزدىك جىلدارىندا, اسىرەسە ءبىلىم بەرۋ مەن دەنساۋلىق ساقتاۋ سالاسى وڭدى وزگەرىستەرگە تولى بولدى دەۋگە نەگىز بار. وعان مىسال رەتىندە 80 مەكتەپ پەن 18 مەكتەپكە دەيىنگى تاربيە وشاعىنىڭ, 1 كوللەدج بەن 5 مەكتەپ-ينتەرناتتىڭ, سونىمەن بىرگە, 63 جاڭا ۇلگىدەگى ەمدەۋ نىسانىنىڭ بوي كوتەرگەنىن ايتا الامىز. الەمنىڭ 50-دەن استام ەلىمەن ەكونوميكالىق, ىسكەرلىك بايلانىس ورناتقان مۇنايلى اتىراۋدا قازىر 700-دەن اسا بىرلەسكەن جانە شەتەلدىك كومپانيالار جۇمىس جاسايدى. – قازاقستاندىقتاردىڭ تاريحي تاڭداۋى بولعان تۇڭعىش پرەزي­دەنت كۇنى مەرەكەسى تاۋەلسىزدىكتىڭ نەگى­زىن قالاۋشى ەلباسى نۇرسۇلتان نازارباەۆقا دەگەن زور سەنىمى مەن ايرىقشا قۇرمەتى رەتىندە بەلگىلەندى. قازاقستان 25 جىلدا تالاي قيىندىقتى ەڭسەردى. ەلباسىنىڭ سارابدال ساياساتى­نىڭ ناتيجەسىندە بۇگىندە الەمدىك قاۋىم­داستىقتا لايىقتى ورنى بار ىرگەلى مەملەكەتكە اينالدىق. ءبىزدىڭ العان باعىتىمىز, جەتەتىن مەجەمىز ايقىن, – دەدى وبلىس اكىمى نۇرلان نوعاەۆ مەرەكەگە وراي وتكەن سالتاناتتى شارادا. مەرەكەلىك شارادا ءوڭىردىڭ ءار سالاسىندا ەڭبەگىمەن تانىلعان ءبىر توپ ۇزدىك مامانعا سىي-سيا­پات جاسالدى. ءوڭىر ونەرپاز­دارى كونتسەرتتىك باعدارلاما ۇسىن­دى. «سامال» توبىمەن بىرگە «التىناي», «قازاعىم» اندەرىن تارتۋ ەتكەن بەلگىلى ءانشى ۇ.جول­داسوۆ رينات زايىتوۆتىڭ ءانى مەن سوزىنە جازىلعان «قازاعىم» ءانىنىڭ تۇساۋىن كەستى. جولداسبەك شوپەعۇل, «ەگەمەن قازاقستان» اتىراۋ