الىس اۋىلداعى سپورت كەشەنى

قازاقستان رەسپۋبليكاسىنىڭ تۇڭعىش پرەزيدەنتى كۇنى قارساڭىندا پەتروپاۆلدان الىس ورنالاسقان زاگرادوۆكا ەلدى مەكەنىندە ساۋلەتتى سپورت كەشەنى پايدالانۋعا بەرىلدى. بۇعان دەيىن بالالار قىسقى سپورت تۇرلەرىنەن جاتتىعۋلاردى اشىق اسپان استىندا وتكىزىپ كەلسە, ەندى 2 مىڭ شارشى اۋماقتى الىپ جاتقان ءزاۋلىم عيماراتقا قاراي كۇن سايىن اسىعاتىن بولادى. «پرومەتەي-اگرو» جشس ديرەك­تورى يۋري شولدىڭ ايتۋىنشا, الەۋمەتتىك نىسان سەرىك­تەستىكتىڭ جەكە قاراجاتىنان تۇر­عىزىلىپ, اۋىلداستارىنا ۇلكەن سىي ازىرلەگەن. سپورت كەشەنىنىڭ اشىلۋ سالتاناتىنا قاتىسقان وبلىس اكىمى ەرىك سۇلتانوۆ زاگرادوۆكا اۋىلدىق وكرۋگىنىڭ حوككەي كومانداسىنا سپورت جابدىقتارىن تارتۋ ەتتى. – وسىدان ەكى جىل بۇرىن وب­لىس ورتالىعىندا قۇرىلعان «قۇلاگەر» حوككەي كومانداسى بيىل ەلىمىزدىڭ كۋبوگىن جەڭىپ الدى. ءبىرىنشى ليگادا ونەر كور­سەتەتىن «قىزىلجار» فۋتبول كومانداسى ەل بىرىنشىلىگىندە قو­لا جۇلدەنى يەلەندى. قازىر ءوڭىر تۇرعىندارىنىڭ ۇشتەن ءبىرى سپورتپەن شۇعىلدانىپ, سالاماتتى ءومىر سالتىن ۇستانادى. سوڭعى ەكى جىلدا 100 حوككەي كورتى, 250 فۋتبول الاڭى ىسكە قوسىلدى, – دەدى ەرىك حامزا ۇلى قۇتتىقتاۋ سوزىندە. ەرەسەكتەر مەن بالالار مۇندا قىستا حوككەي, جازدا فۋتبول, ۆولەيبول, باسكەتبول وينايدى. كونكي, شورت-ترەك, مانەرلەپ سىرعاناۋ, ۇستەل تەننيسى سپورت ءتۇر­لەرىمەن اينالىسۋعا دا بار­لىق جاعداي جاسالعان. ءتۇرلى مەرەكەلىك شارالار دا وتكىزۋگە بولادى. نىساننىڭ اشى­لۋى­نا وراي بىرنەشە اۋدان حوك­كەي­شىلەرىنىڭ قاتىسۋىمەن شاي­بالى حوككەيدەن تۋرنير ۇيىم­داستى­رىلدى. وبلىس اكىمى « ۇلى دالا ەلى – تاۋەلسىزدىكتىڭ 25 نەگىزى» اتتى اكتسيا اياسىندا كورنەەۆكا گيمنازياسىندا وتكەن شاراعا قاتىسىپ, ۇجىمعا كومپيۋتەر سىيلادى. ۇلتتىق كيىم كيگەن وقۋشىلار قوناقتاردى ءتورت تىلدە قارسى الىپ, قۇرمەت كورسەتتى. مۇنداي وقۋ ورىندارى ەلىمىزدە جەتەۋ عانا. 2009 جىلدان بەرى «مەك­تەپتەر – بولا­شاق ارىپتەستەر» باعدارلاماسى قولدانىلادى. مۇعالىمدەردىڭ ەڭبەك­اقىسىنان باسقا قاراجاتتار گەر­مانيا مەن اۆستريا ەسەبىنەن وتەلەدى. گيمنازيا ديرەكتورى ەكا­تەرينا دۋنينا 255 وقۋشىنىڭ ءبىلىم الاتىنىن, 20 كابينەتتىڭ جۇمىس ىستەيتىنىن, بارلىق سى­نىپتارعا ين­تەراكتيۆتى تاقتالار ورنا­تىلعانىن جەتكىزدى. 85 ورىندى ينتەرناتتا 14 ەلدى مەكەننىڭ وقۋ­شىلارى تۇرادى. اسحانا, ناۋبايحانا بار. سپورت زالدىڭ كۇردەلى ءجون­دەۋىنە نەمىس كاسىپكەرلەرى 10 ميلليون تەڭگە بولگەن ەكەن. مەيبۋكان گودزيۋريۋ كاراتە بويىنشا جات­تىقتىرۋشى ولەگ انتانكين بيىل وسىندا قازاقستان بىرىنشىلىگى وتكەنىن, 9 وبلىستان قاتىسقان 160 جاس بالعىندار اراسىندا گيمنازيا 3-ورىندى جەڭىپ العانىن ايتتى. ءومىر ەسقالي, «ەگەمەن قازاقستان» سولتۇستىك قازاقستان وبلىسى, ەسىل اۋدانى سۋرەتتى تۇسىرگەن تالعات تانىباەۆ