تالدىقورعاندا جاڭا قوناق ءۇي كەشەنى اشىلدى

بۇگىن تالدىقورعاندا 16 قاباتتى قوناق ءۇي پايدالانۋعا بەرىلدى. ەل تاۋەلسىزدىگىنىڭ 25 جىلدىعى قارساڭىندا اشىلعان كەشەن قالانىڭ وڭتۇستىك-باتىس اۋدانىندا بوي كوتەردى, دەپ حابارلادى قازاقپارات. قوناق ءۇي قۇرىلىسى بىلتىر كوكتەمدە باستالعان. «كوكتەم گراند» اتتى كەشەن جەكە ينۆەستوردىڭ قارجىسىنا سالىنىپ, مۇندا قوناق ءۇي جانە بيزنەس ورتالىق قىزمەتى قاتار ۇسىنىلادى. «تاۋەلسىزدىكتىڭ 25 جىلدىعى اياسىندا اشىلىپ وتىرعان تالدىقورعان قالاسىنداعى «گراند كوكتەم» قوناق ءۇي كەشەنى قالاداعى ەڭ زاماناۋي, سوڭعى ۇلگىدەگى, جوعارى كلاستى كەشەن بولعالى وتىر. استانادا وتەتىن ەكسپو-2017 حالىقارالىق كورمەسىنىڭ وتۋىنە بايلانىستى جوعارى دەڭگەيدەگى قولايلى جاعداي قاراستىرىلعان قوناق ۇيلەرگە دەگەن قاجەتتىلىك ءوسىپ وتىر. شەتەلدىك تۋريستەرگە ۇسىنىلعان نىساندار تىزىمىندە الماتى وبلىسىنىڭ دا كورنەكتى ورىندارى ەنگىزىلگەن. تۋريستىك سالا وڭىردەگى ەڭ ماڭىزدى سالاعا اينالىپ كەلەدى. سوندىقتان وبلىس ورتالىعى تالدىقورعان قالاسىن كوركەيتە ءتۇسۋ – ءبىزدىڭ باستى ماقساتىمىز. قوناق ءۇي كەشەنى جەكە ينۆەستيتسياعا سالىنعان, ورتاق ىسكە ءوز ۇلەسىن قوسىپ, تالدىقورعاننىڭ تارتىمدى قالا بولۋىنا اتسالىسادى دەپ سەنەمىن», – دەدى ءوز سوزىندە ءوڭىر اكىمى اماندىق باتالوۆ. جالپى, بۇل قوناق ءۇي كەشەنى ءتۇرلى كولەم مەن كەسىندەگى ءۇش بلوكتان تۇرادى. قوناق ءۇيدىڭ 3-10 قاباتقا دەيىن بيزنەس ورتالىقتىڭ كەڭسەلەرى. سول سياقتى نىساندا ءماجىلىس زالى, مەيرامحانا كەشەنى مەن سالتانات زالى, باسسەينى بار فيتنەس ورتالىق, جاتتىعۋ جانە قوناق زالدارى بار.