يەريحونداعى حيشام سارايىنىڭ ەدەنى ارقايسىسى ءبىر شارشى سانتيمەتر بولاتىن 7 ميلليون موزايكا تاستارىمەن كومكەرىلگەن. كوپ جىلدار بويى بۇل ونەر تۋىندىسى قۇپيا ساقتالىپ, تەك وتكەن ايدا عانا كوپشىلىك نازارىنا رەسمي تۇردە ۇسىنىلدى, دەپ حابارلايدى
CNN.
بۇل جەردى ەڭ العاش 1935 جىلى پالەستينالىق ارحەولوگ دميتري بارامكي مەن بريتان ارحەولوگ روبەرت گاميلتون تاپقان. بىراق جەر ەروزياسىنان ساقتاۋ ءۇشىن تاستار قۇم استىندا جاتقان.
ءۇش اي بويى جۇرگىزىلگەن قازبا جۇمىستارىنان كەيىن تاستاردان گەومەرتيالىق ورنەكتەر انىقتالعان. ول 900 شارشى مەتر جەردى الىپ جاتىر.
پالەستينا تۋريزم مينيسترلىگىنىڭ يەريحونداعى ءبولىمىنىڭ باس ديرەكتورى ەياد حامداننىڭ ايتۋىنشا, بۇل جوباعا جاپونياداعى حالىقارالىق سەرىكتەستىك اگەنتتىگى 12 ملن دوللار قاراجات سالعان. ال بۇل جەردى كورمەگە اينالدىرىپ, تاستاردىڭ بەرىك ساقتالۋى ءۇشىن قاجەتتى جۇمىستاردى اتقارۋعا 1,5 جىل ۋاقىت كەرەك ەكەن.
بۇل موزايكا تاستار ورنالاسقان حيشام سارايى ب.ز.ب. 8 عاسىردا سالىنعان. ءبىر قىزىعى, بارلىق تاستار بىرىگىپ وسىنداي ادەمى ءبىرتۇتاس ونەر تۋىندىسىن قۇرايدى.
حيشام سارايى پالەستيناداعى تۋريستەر ەڭ كوپ باراتىن جەرلەردىڭ ءبىرى. بىراق وسى تاستار اشىلعالى بۇل جەردىڭ ءتۋريزمى دە ارتىپتى. بۇرىن اي سايىن 1000 تۋريست كەلسە, ءبىر ايدىڭ ىشىندە بۇل كورسەتكىش 6 مىڭ ادامعا جەتكەن.
