شىعىس قازاقستان وبلىستىق دراما تەاترىنىڭ 20 اكتەرى باسپانالى بولدى. ەستەرىڭىزدە بولسا, بىلتىر وبلىس ورتالىعىندا جاڭادان سالىنعان تەاتر عيماراتىنىڭ تۇساۋىن ەلباسى نۇرسۇلتان نازارباەۆ كەسىپ, شىعارماشىلىق ۇجىمعا ساتتىلىك تىلەگەن بولاتىن. ەندى اكتەرلەر قاۋىمىنىڭ قۋانىشىن وسكەمەن قالاسىنىڭ ابلاكەتكا ىقشاماۋدانىنان بەرىلگەن جاڭا باسپانا ەسەلەي ءتۇستى. 20 پاتەر كىلتىنىڭ تابىستالۋى – وبلىستىق دراما تەاترىنىڭ قازاق, ورىس جانە جاستار ترۋپپالارىنىڭ ارتىستەرى ءۇشىن تاۋەلسىزدىكتىڭ 25 جىلدىق مەرەكەسى قارساڭىنداعى ەڭ ۇلكەن تارتۋ بولدى.
تەاتر ديرەكتورى دىنمۇحامەد ۇياباي وبلىس اكىمى دانيال احمەتوۆتىڭ سوڭعى ەكى جىلعا جۋىق ۋاقىتتا جاڭا زاماناۋي عيماراتتا جۇمىس ىستەۋگە مۇمكىندىك العان شىعارماشىلىق ۇجىمنىڭ الەۋەتىن كوتەرۋگە ۇلكەن قولداۋ كورسەتىپ وتىرعانىن, سونىڭ باستىسى وسى و باستا ۋادە ەتىلگەن 20 پاتەر بولىپ وتىرعانىن جەتكىزدى. ويتكەنى, تەاتردىڭ شىعارماشىلىق الەۋەتىن كوتەرۋ ءۇشىن تالانتتى اكتەرلەر قۇرامىن جاساقتاۋ قاجەت. وسى ۇدەدەن شىعۋ ماقساتىندا استاناداعى "شابىت" قازاق ۇلتتىق ونەر ۋنيۆەرسيتەتى مەن الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسىن تامامداعان جاس اكتەرلەر وسكەمەن قالاسىنا شاقىرتۋ العان ەدى. ولاردىڭ اراسىندا العاشقى شىعارماشىلىق ەڭبەك جولىن شىعىس وڭىرىندە باستاعاندار دا, وسىعان دەيىن الماتى, سەمەي, پاۆلودار قالالارىنداعى تەاترلاردا تاجىريبە جيناپ ۇلگەرگەن جاس اكتەرلەر دە بار. ولار شىعىس قازاقستاندا شىعارماشىلىق قاۋىمعا قاجەتتى قولداۋ بار ەكەنىن ايتادى.
– ء"وز ءۇيىم – ولەڭ توسەگىم" دەگەندەي, وزىمىزگە تيەسىلى شاڭىراققا قول جەتكىزگەنىمىز ءۇشىن قۋانىشتىمىز. اسىرەسە, بالالاردىڭ ءوز ۇيىڭدە الاڭسىز ويناعانىن كورۋ دە باقىت ەكەن, دەيدى ەكى بولمەلى پاتەرگە قول جەتكىزگەن جاس اكتەرلەردىڭ ءبىرى ەلدوس ءماسالىم. ال اكتەردىڭ جارى رىسگۇل جاڭا پاتەردىڭ كەڭ, جارىق ءارى جىلى بولعانىنا قۋانىپ ءجۇر.
تەاتر باسشىسى دىنمۇحامەد ۇيابايدىڭ ايتۋىنشا, وبلىستىق تەاترعا جاڭا سپەكتاكل قويۋ ءۇشىن دەكوراتسيا مەن كيىم دايارلاۋعا جانە مۋزىكامەن ارلەۋگە 25 ميلليون تەڭگە بولىنگەن ەكەن. قازىر شىعارماشىلىق قۇرام تاۋەلسىزدىكتىڭ 25 جىلدىق مەرەكەسىنە ارنالعان جاڭا قويىلىمعا قىزۋ ازىرلىك ۇستىندە.
دۋمان اناش,
"ەگەمەن قازاقستان"
وسكەمەن.
