ەلىمىزدىڭ باس شىرشاسى تاۋەلسىزدىك كۇنىنەن كەيىن جاعىلادى

بيىل استانادا جاڭا جىل مەرەكەسىنە ارنالعان باس شىرشا تاۋەلسىزدىك كۇنىنەن كەيىن, 18 جەلتوقسان كۇنى جاعىلادى, دەپ حابارلايدى قازاقپارات. استانا قالاسى اكىمىنىڭ ءباسپاسوز قىزمەتى حابارلاۋىنشا, باس شىرشا «حان شاتىر» ويىن-ساۋىق ورتالىعىنىڭ جانىندا ورنالاسپاقشى. جالپى, جىل سايىن شىرشا 1 جەلتوقسان كۇنى ەلباسى نۇرسۇلتان نازارباەۆتىڭ قاتىسۋىمەن جاناتىن. بيىل تاۋەلسىزدىكتىڭ 25 جىلدىعىنا وراي, قالا الدىمەن تاۋەلسىزدىك مەرەكەسىنە دايىندالۋدا. استانا قالالىق مادەنيەت باسقارماسىنىڭ اقپاراتىنا سۇيەنسەك, ەلوردادا 17 شىرشا ورناتىلىپ, ءتورت مۇز قالاشىعى بوي كوتەرمەك. ءبىر عانا ەسىل اۋدانى مەن ۇركەر, قالاماڭى تۇرعىن القاپتارىندا 10 جاڭاجىلدىق شىرشا ورناتۋ جوسپارلانعان. بيىلعى جاڭاجىلدىق بەزەندىرۋدىڭ باستى نىشانى - تاۋىق قانا ەمەس, ەلىمىزدىڭ باستى وقيعاسى - ەكسپو كورمەسى دە بولادى. ايتا كەتەيىك, استانادا اشىق اسپان استىنداعى ەڭ ۇلكەن مۇز ايدىنى «اراي» ساياباعىندا سالىنۋدا. 250 ادامعا ارنالعان مۇز ايدىنىنىڭ جالپى اۋماعى - 5 مىڭ شارشى مەتر.