1414-كە جۇگىنىڭىز, ءجون سىلتەيدى

1414 بىرىڭعاي بايلانىس ورتالىعىنا حابارلاساتىن ازاماتتاردىڭ باسىم كوپشىلىگى تولقۇجات, جەكە جانە جۇرگىزۋشى كۋالىگىن, مەكەنجاي تۋرالى انىقتامانى الۋ, سونىمەن قاتار بالانىڭ دۇنيەگە كەلۋى مەن كۇتىمىنە بايلانىستى جاردەماقىنى رەسىمدەۋ سۇراقتارى بويىنشا حابارلاسادى. ورتالىق ماماندارى كۇنىنە 10-15 مىڭ ءوتىنىم وڭدەيدى. وتكەن جىلى سوعىلعان قوڭىراۋلاردىڭ جالپى سانى 3,6 ميلليوندى قۇراسا, بۇل كورسەتكىش بيىلعى ون ايدا 3,7 ميلليونعا جەتكەن. مەملەكەتتىك قىزمەتتەر بويىنشا تاۋلىگىنە جيىرما ءتورت ساعات تەگىن قىزمەت كورسەتەتىن 1414 بىرىڭعاي بايلانىس ورتالىعىنا كەشە بەس جىل تولدى. «ۇلتتىق اقپاراتتىق تەحنولوگيالار» اق ەلەكتروندى ۇكىمەت بايلانىس ورتالىعىنىڭ نەگىزىندە ىرگە قالاعان مەكەمەدە باستاپقى جىلى نەبارى 30 قىزمەت ءتۇرى كورسەتىلسە, بۇگىنگى تاڭدا ورتالىق وپەراتورلارى حالىققا 736 قىزمەت ءتۇرى بويىنشا ءجون سىلتەيدى. جىل سوڭىنا دەيىن اتالعان سان تاعى دا ۇلعايۋى مۇمكىن. بۇل مالىمەتتەردى اتاۋلى كۇنگە وراي وتكەن باسقوسۋدا بىرىڭعاي بايلانىس ورتالىعىنىڭ ديرەكتورى انار ۇلمانوۆا ايتتى. «ءبىزدىڭ مەكەمە باستاپقىدا قاراپايىم عانا بايلانىس ورتالىعى بولاتىن. ال قازىرگى ۋاقىتتا ازاماتتارمەن قارىم-قاتىناس ورناتۋدىڭ قوسىمشا ارنالارى بار. ەندى مەملەكەتتىك قىزمەتتەرگە قاتىستى سۇراقتار بويىنشا 1414.kz سايتى, ەلەكتروندى پوشتا جانە ۆيرتۋالدى ونلاين-كومەكشىلەر ارقىلى دا حابارلاسىپ, جاۋاپ الۋعا ابدەن بولادى», دەيدى انار ۇلمانوۆا. ورتالىق باسشىسىنىڭ ايتۋىنشا, 1414 بايلانىس قىزمەتى حالىق­ارالىق ستاندارتتارعا سايكەس «EN 15838» سەرتيفيكاتىن يەلەن­گەن جانە «WSIS PROJECT PRIZES-2016» حالىقارالىق كونكۋر­سى­نىڭ جەڭىمپازى. اتالعان جەتىستىكتەر كەڭەس بەرۋ قىزمەتىنىڭ جوعارى ساپادا كورسەتىلەتىنىن,  تۇتىنۋشىلارعا قىزمەت كورسەتۋ پروتسەسىنىڭ جۇيەگە قويىلعاندىعىن دالەلدەيدى. بۇگىندە ورتالىق تۇتىنۋ­شىلارىنا 127 وپەراتور قىزمەت كورسەتەدى. ولاردىڭ قاتارىندا مۇمكىندىگى شەكتەۋلى جاندار دا بار, قىزمەتكەرلەردىڭ جۇمىس ىستەۋىنە بارلىق جاعداي جاسالعان. «جۇمىسقا قابىلداۋ الدىندا وپەراتورلار اڭگىمەلەسۋدەن وتەدى, بۇل كەزدە ديكتسيالارى, كۇيزەلىس جاعدايلارىندا سابىر ساقتاۋى, مەملەكەتتىك ءتىل ءبىلىمى تەكسەرىلەدى. سودان كەيىن ۇمىتكەرلەر ءبىر اپتادان ءۇش اپتاعا دەيىن وقۋ كۋرستارىنا قاتىسىپ, ناتيجەسىن انىقتاۋ ءۇشىن تەست تاپسىرادى. وپەراتورلار تاجىريبەسى مەن بىلىكتىلىگىنە قاراي ءۇش توپقا بولىنەدى», دەيدى ورتالىق ديرەكتورى. «قازىرگى تاڭدا ازاماتتاردىڭ كوبى مەملەكەتتىك قىزمەتتەردى ونلاين تۇردە الادى, سوندىقتان ءبىز ەلەكتروندى تسيفرلى قولتاڭبانى قالاي, قاي جەردە الۋعا بولاتىنى تۋرالى كوپ سۇراق قابىلدايمىز. وتكەن جىلى ەتسق تۋرالى 320 مىڭنان استام ساۋالعا جاۋاپ بەردىك», دەيدى ادىستەمە ءبولىمىنىڭ باستىعى اقمارال ەرعاليەۆا. ايتا كەتكەن ءجون, ەلىمىزدىڭ كەز كەلگەن وڭىرىنەن جانە كەز كەلگەن تەلەفوننان تاۋلىك بويى جۇمىس ىستەيتىن 1414 نومىرىنە حابارلاسۋ ارقىلى مەملەكەتتىك قىزمەتتەر جونىندە تەگىن كەڭەس الۋعا بولادى. مۇنداي بايلانىس ورتالىعىنىڭ بالاماسى الەمنىڭ بىرنەشە دامىعان مەملەكەتىندە عانا بار. اسحات رايقۇل, «ەگەمەن قازاقستان»