ۇلەسكەرلەرگە سەنىمدى كەپىلدىك بەرىلەدى

قازاقستاندا ۇلەسكەرلەردىڭ قۇقىعىن قورعايتىن تۇرعىن ءۇي قۇرىلىسىنا كەپىلدىك بەرۋ تەتىگى قىزمەت ەتەدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا «تۇرعىن ءۇي قۇرىلىسىنا كەپىلدىك بەرۋ قورى» اق باسقارما توراعاسى داۋرەن وڭاەۆ ءمالىم ەتتى. «قۇرىلىس سالۋشى جانە ونىڭ ۋاكىلەتتى كومپانياسى قور كەپىلدىگىن نە جەرگىلىكتى اتقارۋشى ورگاننىڭ رۇقساتىن المايىنشا قۇرىلىسقا ۇلەسكەرلەردىڭ اقشاسىن تارتا المايدى», – دەدى د. وڭاەۆ. ول «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭنىڭ كۇشىنە ەنۋىنە بايلانىستى قۇرىلىس سالۋشىلارعا قاتال تالاپتار قويىلعانىن اتاپ ءوتتى. ەندى تۇرعىن ءۇي قۇرىلىسىنا ۇلەسكەرلەردىڭ اقشاسىن تارتۋ ءۇشىن قۇرىلىس سالۋشى استانا جانە الماتى قالالارىندا كەمىندە ءۇش جىل جالپى اۋدانى 18 مىڭ شارشى مەتر نەمەسە باسقا وڭىرلەردە 9 مىڭ شارشى مەتر تۇرعىن ءۇي سالعان بولۋى ءتيىس. بۇدان باسقا, قۇرىلىس سالۋشىنىڭ سوڭعى ەكى جىلدا شىعىنسىز قىزمەتى بولۋى قاجەت. باسقارما توراعاسىنىڭ ايتۋىنشا, زاڭ بىرنەشە كەپىلدىك بەرۋ جاعدايلارىن كوزدەيدى, ونىڭ ءبىرىن ىسكە اسىرۋ بارىسىندا تۇرعىن ءۇي قۇرىلىسىنا كەپىلدىك بەرۋ قورى تۇرعىن ءۇي قۇرىلىسىن اياقتاۋ جانە كەيىننەن ۇلەسكەرلەرگە ۇلەستەرىن بەرۋ بويىنشا مىندەتتەمەلەردى وزىنە الادى. «ءبىز الدىمىزعا كەپىلدىك العان نىساندار بويىنشا ۇلەسكەرلەردىڭ مۇددەلەرىن قورعاۋدى قامتاماسىز ەتۋدە ءتيىمدى ءىس-ارەكەتتەر ارقىلى ۇلەسكەرلەردىڭ سەنىمىن اقتايتىن ۇيىم بولۋدى شارت ەتىپ قويامىز», – دەدى د. وڭاەۆ. ايدار ورىسباەۆ, "ەگەمەن قازاقستان".