شىعىس قازاقستاندا جول تازالايتىن قوسىمشا تەحنيكالار ىسكە قوسىلادى

شىعىس قازاقستان وبلىسى اباي اۋدانىندا جول تازالايتىن قوسىمشا تەحنيكالار ىسكە قوسىلىپ, جەم-ءشوپ تاسۋ جۇمىستارى ۇيىمداستىرىلدى. جولداردى تازالاۋ ءۇشىن ءۇش K700 تراكتورى جانە شىنجىر تاباندى تەحنيكالار ءبولىندى. بۇگىن حابارلانعانداي, اباي اۋدانى اكىمىنىڭ شەشىمىمەن اۋداندا اۋا رايىنىڭ قولايسىزدىعى سالدارىنان توتەنشە جاعداي جاريالاندى. ەڭ ۇلكەن قيىندىقتار مال جايۋعا بايلانىستى بولماق. قازىر قاردىڭ بەتىن قالىڭ مۇز جاپقان. سول سەبەپتى 2 مىڭعا جۋىق جىلقى اشىققان. قاراشا ايىنىڭ باسىندا سارىجال اۋىلدىق وكرۋگىندە اۋا رايى قيىندىق تۋعىزىپ وتىر. قالىڭدىعى جارتى مەتردەن استام قار جاۋىپ, ارتىنان جاۋىن-شاشىن بولىپ, سوڭى اياز بەن بورانعا ۇلاستى. قالىڭ قار, جاڭبىر, بۇرقاسىن جانە اياز اباي اۋداندىق باسشىلىعىنىڭ توتەنشە جاعداي جاريالاۋىنا الىپ كەلدى. تۇرعىنداردى ءدارى-دارمەك جانە تاماقپەن قامتاماسىز ەتۋ جونىندە ەشقانداي قيىندىق بولماعانمەن, جىلقىلاردىڭ جايىلىمى وڭايعا تۇسپەيىن دەپ تۇر.