اقتوبەدە 25 مەترلىك ستەللا بوي كوتەردى

سوڭعى كەزدەرى قالادا ءار ءتۇرلى كومپوزيتسيالىق ستەللالار, باسقا دا ەستەتيكالىق ءمانى بار نىساندار بوي كوتەرىپ, شاھاردى شىرايلاندىرا تۇسۋدە. اقتوبە - كىتاپ كەيىپكەرلەرىنە ەسكەرتكىش ورناتىلعان ەلىمىزدەگى بىردەن ء–بىر قالا. اباي داڭعىلى بويىندا قازاقستاننىڭ حالىق جازۋشىسى ءابدىجامىل نۇرپەيىسوۆتىڭ  «قان مەن تەر» تريلوگياسىنىڭ كەيىپكەرلەرىنە ورناتىلعان ەسكەرتكىش اقتوبەلىكتەردىڭ ەڭ ءجيى باس قوساتىن ورنى بولىپ تابىلادى. بۇعان دەيىن «شەراتون» قوناق ءۇيىنىڭ جانىنا «دومبىرا» ەسكەرتكىشى  ورناتىلعان-دى. ونىڭ بيىكتىگى نەبارى 6,3 مەتر بولاتىن. جاقىندا بوي كوتەرگەن  №12 شاعىن اۋدانداعى اينالما جولدىڭ بويىنداعى «قىزعالداق» ستەللاسىنىڭ بيىكتىگى 25 مەتر بولادى. ونىڭ گۇل وزەگىنىڭ ديامەترى  1,4 مەتر, جالپى فۋندامەنتىنىڭ سالماعى 215,4 توننا, ال, قۇراستىرماسى 7 توننا قۇرايدى. اقتوبەنىڭ باستى سيمۆولى «قىزعالداق» ستەللاسى تەۋەلسىزدىكتىڭ 25 جىلدىعىنا ارنالىپ سالىنعان. بيىل بۇدان باسقا قالادا اۋەندى سۋبۇرقاق جانە  ساعات سىندى نىساندار سالىنىپ, كوشەلەرگە كورىك بەرىپ تۇر №11 شاعىن اۋدانداعى  قۇرىلىسى ءجۇرىپ جاتقان حوككەي ءمودۋلى دە ەڭسەلى سپورت نىسانى بولعالى تۇر. ول كەلەر جىلدىڭ ناۋرىز ايىندا پايدالانۋعا بەرىلەدى. نىساننىڭ اتاۋىن حالىق اراسىندا كونكۋرس وتكىزۋ ارقىلى بەرىلەتىن بولادى. جالپى العاندا, مەملەكەتتىك-جەكەمەنشىك سەرىكتەستىك اياسىندا 10 نىساننىڭ قۇرىلىسى جۇرگىزىلۋدە. ساتىبالدى ءساۋىرباي, «ەگەمەن قازاقستان» اقتوبە.